وڭتۇستىك قازاقستان وبلىسىندا كامەلەتكە تولماعان بالا اكەسىن ۇرىپ ءولتىرىپ، ءمايىتتى قالا سىرتىنداعى شۇڭقىرعا اپارىپ تاستاعان. ول وسى ارەكەتى ءۇشىن 7 جىل باس بوستاندىعىنان ايىرىلدى، دەپ حابارلادى Qamshy.kz اقپارات اگەنتتىگى TVK ارناسىنىڭ دەرەگىن نەگىزگە الا وتىرىپ.

شەشىم قىلمىستىق ىستەر جونىندەگى مامانداندىرىلعان اۋدانارالىق سوتتا شىعارىلدى. سۋديا سوتتالۋشىنىڭ 18 جاسقا تولماعانىن جانە ىستەگەن قىلمىسى ءۇشىن قاتتى وكىنەتىنىن ەسكەرىپ، جەڭىلدەتىلگەن جازا تاعايىندادى. سوت ورمان باعداۋلەت اكەسىن ابايسىزدا ولتىرگەنىن نەگىزسىز دەپ تاپتى.

«ورمان باعداۋلەت باقىت ۇلى ق ر قك 99-بابىنىڭ 1-بولىگىنە سايكەس كىنالى دەپ تانىلىپ، وعان وسى باپ نەگىزىندە 7 جىلعا باس بوستاندىعىنان ايىرۋ جازاسى تاعايىندالسىن. جازاسىن قىلمىستىق اتقارۋ جۇيەسىنىڭ ورتاشا ءقاۋىپسىز مەكەمەسىندە وتەسىن. كۇزەتپەن ۇستاۋ بۇلتارتپاۋ شاراسى وزگەرىسسىز قالدىرىلسىن»، — دەدى وقو قىلمىستىق ىستەرى جونىندەگى مامانداندىرىلعان اۋدانارالىق سوتىنىڭ ءتوراعاسى جانىبەك سەيىتجاپپاروۆ.

قاندى وقيعا قازىعۇرت اۋدانىندا بولعان. وتكەن جىلدىڭ 19 قاراشاسى كۇنى ورمان باعداۋلەت اكەسىنىڭ كەپىلدەگى كولىگىن رۇقساتسىز ايداپ كەتىپ، سوعىپ العان. بۇعان اشىنعان اكەسى ماس كۇيىندە بالاسىنا قول كوتەرگەن. ءجاسوسپىرىم اكەسىنىڭ الىمجەتتىگىنە شىداي الماي، تەمىر زاتپەن باسىنان ۇرىپ ولتىرگەن. مۇنان سوڭ ءمايىتتى وزگە كولىكتىڭ جۇكسالعىشىنا سالىپ، قالا سىرتىنداعى شۇڭقىرعا اپارىپ تاستاعان. پوليسەيلەر دەنەنى ءبىر اپتادان كەيىن تاپقان.