مەملەكەت باسشىسى نۇرسۇلتان نازاربايەۆتىڭ شاقىرۋىمەن بۇگىن ەلىمىزگە تاجىكستان پرەزيدەنتى ەمومالي راحمون رەسمي ساپارمەن كەلدى، دەپ جازادى Qamshy.kz اقپارات اگەنتتىگى.

«تاجىكستان دەلەگاسياسىنا قوش كەلدىڭىزدەر دەيمىز. قانشاما جىلداردان بەرگى دوستىق قارىم-قاتىناسىمىزدىڭ، باۋىرلاس ەل رەتىندە ارالاسۋىمىزدىڭ ارقاسىندا ءبىز ۇلكەن سەنىمگە يە بولدىق. ەكى ەلدىڭ اراسىندا قانداي دا ءبىر ساياسي ماسەلەلەر تۋىنداعان ەمەس. ءبىز قاشان دا بارلىق باعىتتار بويىنشا تاجىكستاندى قولداۋعا، كومەك كورسەتۋگە دايىنبىز»، - دەدى ەلباسى تاجىكستان پرەزيدەنتىمەن كەزدەسۋ بارىسىندا.

بۇگىنگى رەسمي كەزدەسۋدە ەكى ەلدىڭ باسشىلارى ءبىراقاتار ماسەلەلەردى تالقىلاپ، جاڭا مەملەكەتارالىق كەلىسسوزدەرگە قول قويادى دەپ كۇتىلۋدە.

سونىمەن قاتار، قازاقستان مەن تاجىكستان ازاماتتارىنىڭ سول ەلدەرگە كەلىپ-كەتۋ ەرەجەسىن، كوشى-قون ەرەجەلەرى جانە دە قارسى تاراپتىڭ ازاماتتارىن ەلدە قابىلداۋ ەرەجەلەرىنە دە قاتىستى كەلىسسوزدەر جاسالماق.

ايتا كەتسەك، ەكى جاق جوعارى دەڭگەيدە كەلىسسوزدەر جۇرگىزىپ، ارىپتەستىك كوكجيەگىن كەڭەيتپەك.  سوڭعى جىلدارى ەكى ەلدىڭ قارىم-قاتىناسى قارقىن الىپ كەلەدى. بىلتىر ءوزارا  الىس-بەرىس 800 ملن دوللارعا جۋىقتاعان. 2016 جىلمەن سالىستىرعاندا ءوسىم 32 پايىز. ەندى وسى قارقىننان تايماي، ساۋدا-ساتتىقتى ەسەلەي ءتۇسۋ ماڭىزدى. وسى ورايدا بۇگىنگى كەلىسسوزدەرىڭ قوس ەل ءۇشىن دە ماڭىزى زور.

كوشباسشىلار وڭىرلىك، حالىقارالىق كۇن تارتىبىندەگى ماسەلەلەرگە دە نازار اۋدارادى دەپ جوسپارلانىپ وتىر. بۇعان قوسا، كولىك-لوگيستيكا سالاسىنداعى سەرىكتەستىككە سەرپىن بەرۋ دە ويدا بار. الداعى ۋاقىتتا وزبەك-تاجىك شەكاراسىندا كولىك وتكىزەتىن 16 قوسىن اشىلادى. بۇل جاعداي ورتالىق ازيا مەملەكەتتەرىنىڭ الىس-بەرىسىن ارتتىرۋعا سەپتىگىن تيگىزۋى ءتيىس. دەمەك، ەندى قازاقستان مەن تاجىكستان ساۋدا-ساتتىعىن دامىتىپ، كولىكتىك قارىم-قاتىناسىن ودان ءارى نىعايتا تۇسپەك.

ەستەرىڭىزگە سالا كەتسەك، 15 ناۋرىزدا نۇرسۇلتان نازاربايەۆ پەن ەمومالي راحمون ورتالىق ازيا ەلدەرى باسشىلارىنىڭ استانادا وتەتىن جيىنىنا قاتىسادى.