جەتى جاستاعى بالانىڭ «زورلانۋىنا» بايلانىستى وقو-دا بىرنەشە شەندى قىزمەتىنەن بوساتىلدى، دەپ حابارلايدى Qamshy.kz اقپارات اگەنتتىگى. بۇل تۋرالى شىمكەنتتە وتكەن وتىرىستا وبلىس اكىمى جانسەيىت تۇيمەبايەۆ مالىمدەدى.

«سارىاعاش اۋدانى جەرگىلىكتى پوليسيا قىزمەتىنىڭ باسشىسى بەردالى ورازگەلدييەۆ قىزمەتىنەن بوستاتىلدى. سارىاعاش اۋدانى مەن اباي اۋىلىنىڭ جەرگىلىكتى پوليسيا قىزمەتى ءبولىمىنىڭ باسشىلارى جۇمىستان شىعارىلدى. وقو اكىمىنىڭ يدەولوگيا جونىندەگى ورىنباسارى ۇلاسبەك سادىبەكوۆ قاتاڭ ەسكەرتۋ الدى. سارىاعاش اۋدانىنىڭ اكىمى قاتاڭ سوگىس الدى. اۋداندىق ءبىلىم باسقارماسىنىڭ باسشىسى يساتاي ساعىندىقوۆ سوگىس الدى»، - دەدى تۇيمەبايەۆ.

سونداي-اق وبلىس اكىمى سارىاعاش اۋدانىنىڭ اكىمىنەن اۋدان اكىمىنىڭ يدەولوگيا جونىندەگى ورىنباسارىنا قاتىستى شارا قولدانۋىن تالاپ ەتتى.

بۇعان قوسا، ءىىد باسشىسىنىڭ بۇيرىعىمەن مەكتەپ ينسپەكتورى ناريمان جۇمابايەۆ قىزمەتىنەن بوساتىلدى. ال №73 جانە №74 مەكتەپ ديرەكتورلارى ءىستىڭ ءمان-جايى انىقتالعانشا قىزمەتتەرىنەن شەتتەتىلدى.

بۇگىن شىمكەنتتە وبلىس اكىمنىڭ ءتوراعالىق ەتۋىمەن سارىاعاش اۋدانى اباي اۋىلىنداعى وقيعاعا قاتىستى وتىرىس ءوتىپ جاتىر.

كۇنى كەشە بالا قۇقىقتارى جونىندەگى ۋاكىل، دەپۋتات زاعيپا بالييەۆا شىمكەنتكە بارىپ، زارداپ شەكتى دەلىنگەن بالامەن كەزدەسىپ قايتتى. ول جۋرناليستەرگە بەرگەن سۇحباتىندا بالانىڭ جاعدايى تۇراقتى ەكەنىن، الايدا قاۋىپسىزدىگى ءۇشىن بالانى ازىرگە ەشكىممەن كەزدەستىرمەۋ كەرەگىن ەسكەرتكەن ەدى. ال بالانى جاقىندارىمەن بىرگە استاناعا اپاراتىن بولىپ شەشتى. 

ايتا كەتەيىك، «وقو-داعى سارىاعاش اۋدانى اباي اۋىلىنىڭ جەتى جاستاعى تۇرعىنى زورلىقتىڭ قۇربانى بولدى» دەگەن حابار باق-تىڭ نازارىنا ءىلىنىپ، الەۋمەتتىك جەلىلەردە قاتتى تالقىلانىپ جاتىر.