وڭتۇستىك قازاقستان وبلىسى سارىاعاش اۋدانىندا زورلىققا ۇشىرادى دەلىنگەن جەتى جاستاعى وقۋشى بالا جاقىندارىمەن بىرگە استاناعا جەتكىزىلدى. بۇل تۋرالى Qamshy.kz اقپارات اگەنتتىگى 24.kz-كە سىلتەمە بەرىپ حابارلايدى. ەلىمىزدىڭ بالا قۇقىقتارى جونىندەگى ۋاكىلى زاعيپا بالييەۆا شىمكەنتكە ارنايى بارىپ، كەلەڭسىز وقيعاعا دۋشار بولعان جەتكىنشەكتى وزىمەن بىرگە ەلورداعا الىپ كەلگەنىن مالىمدەدى.

ەستەرىڭىزگە سالا كەتەيىك، وڭتۇستىك قازاقستانداعى جاعدايدان كەيىن وڭىردەگى جاۋاپتى شەنەۋنىكتەردىڭ ءبىرازى قىزمەتىنەن بوساتىلىپ، كەيبىرى قاتاڭ سوگىسپەن قۇتىلدى.

وبلىس اكىمى جانسەيىت تۇيمەبايەۆ ءوز ورىنباسارى ۇلاسبەك سادىبەكوۆكە قاتاڭ ەسكەرتۋ بەرىپ، ايماقتىڭ ءبىلىم سالاسىنا جاۋاپتى يساتاي ساعىندىقوۆ پەن سارىاعاش اۋدانىنىڭ اكىمى قايرات ابدۋالييەۆكە دە سوگىس بەردى. ال سارىاعاش اۋداندىق جەرگىلىكتى پوليسيا قىزمەتىنىڭ باسشىسى بەردالى ورازعالييەۆ پەن اباي اۋىلدىق جەرگىلىكتى پوليسيا بولىمشەسىنىڭ باسشىسى اسەت يبراگيموۆ جانە يۋۆەنالدى پوليسيا بولىمشەسىنىڭ №73 جانە 74-مەكتەپتەرگە جاۋاپتى پوليسيا ينسپەكتورى قالدىباي سارييەۆ قىزمەتتەرىنەن بوساتىلدى.

قازاقستاننىڭ بالا قۇقىقتارى جونىندەگى ۋاكىلى، پارلامەنت ءماجىلىسىنىڭ دەپۋتاتى زاعيپا بالييەۆا اتالعان ىسكە قاتىستى تىلشىلەرگە قىسقا عانا جاۋاپ بەرىپ، تاعدىرى تالكەككە ۇشىراعان بالانىڭ ەلوردادا ءتيىستى مامانداردىڭ نازارىندا ەكەنىن ايتتى. ق ر بالا قۇقىقتارى جونىندەگى ۋاكىلى پارلامەنت ءماجىلىسىنىڭ دەپۋتاتى زاعيپا بالييەۆا: ءبىز بۇل ماسەلەگە قاتىستى بىرنەشە ماماندى شاقىرامىز. ءبىلىم مينيسترلىگى مەن ىشكى ىستەر مينيسترلىگىنىڭ دە وكىلدەرى كەلەدى. ولار بارلىق سۇراقتارعا تولىق جاۋاپ بەرۋى ءتيىس. بۇگىن مەن ءبىر ساعات عانا ۇيىقتادىم. سوندىقتان دەمالىپ الىپ، ەرتەڭ ارنايى باسپا ءسوز ءماسليحاتىن ۇيىمداستىرامىز،-دەدى.