اقتوبەدە ازاماتتىق نەكەدەگى كۇيەۋىنەن تاياق جەپ شارشاعان كەلىنشەك بالالارىن تاستاپ، ۇيىنەن قاشىپ كەتتى. 38 جاستاعى گۇلسىم جيەنبايەۆا وتاعاسى بالتا الىپ ۇمتىلعاندا، كىشكەنتايلارىما قارايلاماق تۇگىلى، ويلانۋعا ۋاقىتىم بولمادى دەيدى. بۇل تۋرالى «ەۋرازيا» ءبىرىنشى ارناسى حابارلايدى.
«قۇلاعىم ءىسىپ كەتتى، ۇرعاندا مىنا جەردە سوترياسەنيە العانمىن» - دەيدى جابىرلەنۋشى.
گۇلسىمنىڭ ازاماتتىق نەكەدەگى كۇيەۋىمەن كوڭىل جاراستىرعانىنا بەس جىل بولعان. سودان بەرى كورگەنىم تەك قورلىق دەپ وتىر. قيت ەتسە جۇدىرىعىن الا جۇگىرەتىن كۇيەۋى ەشتەڭەدەن قايمىقپايتىن كورىنەدى. ويتكەنى گۇلسىم – جەتىم، ىزدەۋشىسى جوق، اكە شەشەدەن ەرتە ايىرىلعان. ءبىرىنشى كۇيەۋىنەن تۋعان ۇلىن شەتتەتكەنى بىلاي تۇرسىن، ءوزىنىڭ ەكى بالاسىن دا تۇرتپەكتەيتىندى شىعارىپتى.
— قولىمەن ۇرادى، پىشاقپەن ۇرادى، بالتامەن قۋىپ شىعادى. بەس جىل بويى قورلىق كورىپ كەلە جاتىرمىن،- دەيدى قورلىق كورگەن گۇلسىم جيەنبايەۆا.
ايەلى مەن بالالارىنا كۇن كورسەتپەيتىن 61 جاستاعى ازاماتقا پوليسەيلەر تەك ايىپپۇل سالۋدان باسقا شارا قولدانا المايتىندىقتارىن ايتادى. ويتكەنى ول پسيحونيەۆرولوگيالىق ديسپانسەردىڭ ەسەبىندە تۇرعان كورىنەدى. جۇيكەسى سىر بەرگەن اكەمەن بالالاردى قالدىرۋدان سەسكەنگەن ماماندار ەكى جانە بەس جاستاعى ەكى بالاسىن گۇلسىمگە الىپ بەردى. ءقازىر كەلىنشەككە قالادان ۋاقىتشا جاتىن ورىن مەن جۇمىس تاۋىپ بەرگەن. ال بالالارى ساۋىقتىرۋ ورتالىعىندا ەم قابىلداپ جاتىر.
