ق ر بالا قۇقىقتارى جونىندەگى ۋاكىلى زاعيپا بالييەۆا  زورلىققا ۇشىرادى دەلىنگەن 7 جاستاعى وڭتۇستىكقازاقستاندىق بالا وتباسىنىڭ الەۋمەتتىك مارتەبەسى تۋرالى ايتتى، دەپ حابارلايدى قازاقپارات.

 «بۇگىندە اكەلەرى ولارمەن بىرگە تۇرمايدى. قايدا ەكەندىگىن دە ەشكىم بىلمەيدى. بالانىڭ تۋۋ تۋرالى كۋالىگىندە اكەسى جازىلعان، اناسى دا بىرگە تۇرمايدى. سەنىمحات 2017 جىلدىڭ جەلتوقسانىنان اجەسى مەن تاتەسىندە بار جانە ولار بالانىڭ زاڭدى وكىلى سانالادى. بالا ولارمەن ءۇش ايلىق كەزىنەن بىرگە تۇرادى»، - دەدى زاعيپا بالييەۆا ورتالىق كوممۋنيكاسيالار قىزمەتىندەگى بريفينگتە.

ونىڭ اتاپ وتۋىنشە، اجەسى مەن تاتەسىندە بالانىڭ قۇقىعىن قورعاۋعا قاجەتتى بارلىق قۇقىق بار.

«2017 جىلدىڭ جەلتوقسانىنان اناسىنىڭ سەنىمحاتى بويىنشا اجەسى مەن تاتەسى بالانىڭ زاڭدى وكىلى بولىپ تابىلادى. ەگەر بۇگىن ولار وزدەرىنە جاۋاپكەرشىلىك الاتىن بولسا، وندا ولاردىڭ تولىق قۇقىقتارى بار. ويتكەنى، اتالعان سەنىمحاتتا بالاعا قاتىستى مىندەتتەر مەن قۇقىقتاردىڭ بارلىعى جازىلىپ، اناسى قول قويعان جانە نوتاريۋس كۋالاندىرعان. ولار وقو سارىاعاش اۋدانىنا قاراستى اباي ەلدى مەكەنىندە جەكە پاتەردە تۇرادى»، - دەدى بالا قۇقىقتارى جونىندەگى ۋاكىل.