حالىق بانك ەلباسىنىڭ باستاماسى – «7-20-25» جوباسىن قولدايدى، الايدا قانداي دا ءبىر مالىمدەمە بەرەتىندەي اقپارات جەتكىلىكسىز. بۇل تۋرالى قازاقستان حالىق بانكىنىڭ ءتورايىمى ءۇمىت شاياحمەتوۆا ايتتى، دەپ حابارلايدى Qamshy.kz اقپارات اگەنتتىگى.

–بۇل – حالىق ءۇشىن تەڭدەسىز جوبا. ءبىز باعدارلامامەن تولىق تانىس ەمەسپىز، تەك نەسيەلەردى ساتىپ الاتىن ۇلتتىق بانكتىڭ ەنشىلەس كومپانياسى بولاتىنى ءمالىم. ول سحەما وتە قيىن، جۇزەگە اسىرۋ مەن مونيتورينگ جاساۋ دا ءتيىمسىز. ءبىز ەكىنشى دەڭگەيدەگى بانكتەردە ورنالاستىرۋ مۇمكىندىگىن ۇسىنامىز. بۇل – ءتيىمدى ءارى وڭاي جۇيە. مۇنداي باعدارلاما 2009 جىلى دا بولعان، – دەدى شاياحمەتوۆا.

20 ناۋرىزدا وتكەن باسپا ءسوز ءماسليحاتىندا ءۇمىت شاياحمەتوۆا «قازاقستان حالىق بانكى» اق-نىڭ 2017 جىلعى 12 ايعا شوعىرلاندىرىلعان قارجىلىق ناتيجەلەرى تۋرالى ايتا ءوتىپ، 2018 جىلعا ارنالعان بولجامدارمەن ءبولىستى.

باسقارما ءتورايىمىنىڭ ايتۋىنشا، 2017 جىلى بانكتىڭ تازا كىرىسى 173،4 ملرد تەڭگە بولعان. بۇل 2016 جىلعى كورسەتكىشتەن 32%-عا ارتىق. Qazkom توبىن ەسكەرمەگەندە، حالىق بانكىنىڭ تازا كىرىسى 2016 جىلمەن سالىستىرعاندا 25%-عا ءوسىپ، 154،3 ملرد تەڭگە بولدى. Qazkom توبىنىڭ 2017 جىلعى تازا كىرىسى 16،6 ملرد تەڭگە بولدى.

ال 2018 جىلدىڭ ەكىنشى جارتىسىندا Qazkom-مەن كەلىسىم اياقتالادى. ناتيجەسىندە نەگىزگى برەند حالىق بانك بولىپ قالادى.

بۇعان قوسا «كازاحينستراح» جانە «قازكوممەرس-پوليس» ساقتاندىرۋ كومپانيالارىن بىرىكتىرۋ ماسەلەسى تۋرالى شەشىم قابىلداندى.

قاڭتاردا قازكوممەرسبانكتىڭ كورسەتكىشى تومەن بولدى – شىعىن 5 ملرد تەڭگەگە دەيىن جەتكەن. 2018 جىلدىڭ شىلدەسىندە كورسەتكىش قايتا قالپىنا كەلەدى.

–2017 جىلى Halyk Group ۇيىمىنىڭ ءارى قاراي دامۋى ءۇشىن ەرەكشە تاريحي مانگە يە بولدى. ءبىز قازكوممەرسبانكتى ساتىپ الۋداعى ءىرى مامىلەنى اياقتاي كەلە، ءوزىمىزدىڭ جەتەكشىلىك ورنىمىزدى نىعايتا تۇستىك جانە قازىرگى نارىقتىڭ 34%-ىن يەمدەنىپ وتىرمىز. بيىلعى جىلداعى باستى ماقساتىمىز – جۇيە قۇرۋشى بانكتەر مەن توپتىڭ ساقتاندىرۋ كومپانيالارىنىڭ اعىمداعى بىرىكتىرىلۋ پروسەسىن اياقتاۋ، – دەدى ءۇمىت شاياحمەتوۆا.