بەس باستامانىڭ ىشىندەگى تاعى ءبىر وزەكتىسى مەملەكەتتىك گرانتتاردىڭ سانىن ارتتىرۋ جانە بىلىمگەرلەردى جاتاقحانامەن قامتۋ ماسەلەسى. ءيا، اتالمىش سالا بويىنشا دا اتقارىلار ءىس اۋقىمدى. ەلباسىنىڭ شەشىمىمەن 2018-2019 جىلى بولىنەتىن قوسىمشا گرانتتار ءبىلىم سالاسىنا ەلەۋلى سەرپىن بەرەتىنى انىق. وقۋ وقىپ، ىزدەنەمىن دەگەن جاستاردى قولداۋ، بىلىمگە، جاتاقحاناعا دەگەن قولجەتىمدىلىك بويىنشا جاريا ەتىلگەن جاقسى جاڭالىق - جالپىعا ورتاق جاعىمدى ءىس، دەپ حابارلايدى Qamshy.kz اقپارات اگەنتتىگى الماتى وبلىسى اكىمدىگىنىڭ باسپا ءسوز قىزمەتىنە سىلتەمە جاساي وتىرىپ.

بۇعان دەيىن ەلىمىز بويىنشا مەملەكەت تاراپىنان جوعارى وقۋ ورىندارىنا 54 مىڭ گرانت ءبولىنىپ كەلگەن. ەندىگى كەزەكتە ەلباسى باستاماسىمەن اتالمىش تەگىن وقۋ جۇيەسى 20 مىڭ گرانتپەن تولىقتىرىلماق. ال وڭىرىمىزدە وبلىس اكىمىنىڭ گرانتىمەن جەرگىلىكتى بيۋدجەت ەسەبىنەن 438 بىلىمگەر ءتالىم السا، ەندى بۇل كورسەتكىش 100 گرانت كولەمىندە كوبەيمەك. بۇل ۇلكەن جەتىستىك، ۇلكەن مۇمكىندىك. بولاشاققا دەگەن ۇمتىلىسى بيىك ءار بالا ءۇشىن جوعارى دەڭگەيدەگى قولداۋ - اسقاق ارماننىڭ ورىندالۋىنا اشىلعان داڭعىل جول. كوزدەلىپ وتىرعان كورسەتكىشتەردىڭ وسى ساتتەن باستاپ ىسكە اسارى دا انىق. سەبەبى، ەلباسى جوعارى ءبىلىم الۋدىڭ قولجەتىمدىلىگى مەن وقۋ ساپاسىن ارتتىرۋ ءۇشىن ءبىرقاتار شارالاردى ۇسىنىپ، ناقتى شەشىمى بولۋىن تالاپ ەتتى. باعدارلامانىڭ ماقساتى بويىنشا گرانتتىڭ باسىم بولىگى تەحنيكالىق، ينجەنەرلىك، اقپاراتتىق-تەحنولوگيالىق ماماندىقتارعا بولىنبەك. وسى ارقىلى ءتورتىنشى ونەركاسىپتىك ريەۆوليۋسيا جاعدايىنداعى جاڭا ەكونوميكادا سۇرانىسقا يە بولاتىن ءبىلىمى مەن بىلىگى جوعارى مامان دايارلاۋ مۇمكىندىگى پايدا بولماق. مىنە، ەرتەڭگى ەل تىزگىنىن ۇستايتىن جاستارعا دەگەن قامقورلىقتىڭ كورىنىسى وسى. ەلباسى سوزىندەگىدەي ورتا مەكتەپ تۇلەكتەرىن جوعارى بىلىممەن قامتۋ، ولاردىڭ وقۋ جۇيەسىنە نازار اۋدارىپ، ساپاسىن كوتەرۋ  - الەمدىك ترەند. سونداي-اق پرەزيدەنت بىلىمگەرلەردىڭ ستاندارتقا ساي ساپالى ءبىلىم الۋىمەن قاتار ولاردىڭ تۇراتىن جەرىنە جاعداي جاساۋ ماسەلەسىن دە قاراستىرعان. بۇل دا بۇگىنگى كۇننىڭ وزەكتى ماسەلەسىنە اينالعان بولاتىن. كەز كەلگەن وقۋ ورنىنىڭ بىلىمگەردى جاتاقحانامەن قامتۋى كەنجەلەپ كەلگەنى بارىمىزگە بەلگىلى. ەندى بۇل تاقىرىپ تا  شەشىمىن تاپپاق. وسى ورايدا ەلباسى ۇسىنعان جەكەمەنشىك سەرىكتەستىگى قاعيداسىمەن ستۋدەنتتەر ءۇيىن سالۋدى باستاۋ ماسەلەسى وتە ۇتقىر دا ۇتىمدى وي ەكەندىگى انىق. جاقسىلىق جارشىسى بولعان جاڭالىقتىڭ ەرەكشەلىگى 2022 جىلدىڭ سوڭىنا دەيىن كەمىندە 75 مىڭ ورىندى جاڭا جاتاقحانا سالىنباق. ەندىگى كەزەكتە «جۇمىلا كوتەرگەن جۇك جەڭىل» دەگەندەي، ءبارىمىز بىرگە بەرەكەلى ىسكە باستاماشى بولايىق.