مەكسيكالىق ساۋل الۆارەستىڭ مۇددەسىنە وكىلدىك ەتەتىن Golden Boy پروموۋتەرلىك كومپانياسىنىڭ پرەزيدەنتى ەريك گومەس گەنناديي گولوۆكيننىڭ پىكىرىنە جاۋاپ بەردى، دەپ جازادى Sports.kz.

گەنناديي 16 قىركۇيەك كۇنى وتكەن العاشقى جەكپە-جەكتە ونىڭ قارسىلاسى ساۋل الۆارەستىڭ تىيىم سالىنعان زاتتاردان «تازا» بولعانىنا كۇمان كەلتىرگەن. قازاقستاندىق بوكسشى سونداي-اق مەكسيكالىقتىڭ پروموۋتەرى، بىرنەشە سالماق دارەجەسىندەگى الەمنىڭ بۇرىنعى چەمپيونى  وسكار دە لا حوييانى دا دوپينگ قولدانۋدا ايىپتاعان بولاتىن.

«گولوۆكين بۇل سوزدەردى وز-وزىنە سەنىمسىز بولعاندىقتان جانە جەكپە-جەكتەن باس تارتۋ ماقساتىندا ايتقان سياقتى. ەگەر ول جۇدىرىقتاسقىسى كەلمەسە، سولاي ايتسىن. ونىڭ ايتقان سوزدەرى وتكەن اپتادا بىلدىرگەن پىكىرىنە قاراما-قايشى. ونىڭ «ينەكسيا ىزدەرى» تۋرالى جانە دە لا حوييانىڭ اتىنا ايتىلعان پىكىرلەرى مەن وزگە دە مالىمدەمەلەرىنە قايران بولدىم. بۇل - جالا جابۋ جانە ءبىز سايكەس شارالار قولدانامىز. ەكى اپتا بۇرىن توم لەففلەرمەن كەرەمەت كەزدەسۋ وتكىزدىك. ءبىراق، توم ابەل سانچەستىڭ ۇستىنەن قانداي دا ءبىر باقىلاۋ جۇرگىزە المايتىن سياقتى. ەگەر گەنناديي وسىنداي نارسەلەر ايتسا، دەمەك ول جەكپە-جەكتى ۋايىمداپ وتىر. ەگەر ول جۇدىرىقتاسقىسى كەلمەسە، بارشا جۇرتتىڭ الدىندا سونى ايتسىن»، - دەدى ەريك گومەس Boxingscene.com-گە بەرگەن سۇحباتىندا.