21 ناۋرىز، سارسەنبىدە اقتوبە قالاسىنا قاراستى سازدى اۋىلدىق وكرۋگىندە ناۋرىز مەيرامى قارساڭىندا جاڭا دارىگەرلىك امبۋلاتوريا اشىلدى، دەپ جازادى Qamshy.kz اقپارات اگەنتتىگى.

مەديسينالىق مەكەمە مەملەكەتتىك-جەكەمەنشىك سەرىكتەستىك اياسىندا جۇزەگە اسىرىلعان كەزەكتى الەۋمەتتىك ماڭىزى بار جوبا بولىپ تابىلادى.

سالتاناتتى شاراعا وبلىس اكىمى بەردىبەك ساپاربايەۆ قاتىستى.

- مەملەكەت باسشىسى نۇرسۇلتان نازاربايەۆتىڭ تاپسىرماسىنا سايكەس، وتكەن 26 جىلدىڭ ىشىندە ەلىمىزدە حالىق دەنساۋلىعىن جاقسارتۋ جانە دەنساۋلىق سالاسىن دامىتۋدىڭ اۋقىمدى جۇمىستارى جۇرگىزىلدى. تەك اقتوبە وبلىسىنىڭ وزىندە سوڭعى جىلدارى ونداعان مەديسينالىق مەكەمە اشىلىپ، مەديسينالىق كلاستەر قۇرىلدى. ءبىزدىڭ ماقساتىمىز – اقتوبەلىكتەر بارلىق قاجەتتى مەديسينالىق قىزمەتتى وبلىستان شىقپاي-اق، جوعارى ساپالى دەڭگەيدە الۋ ءۇشىن جاعداي جاساۋ،-دەدى ءوزىنىڭ قۇتتىقتاۋ سوزىندە ءوڭىر باسشىسى.

وبلىس اكىمى سونداي-اق، اقتوبەلىكتەردى ناۋرىز مەرەكەسىمەن قۇتتىقتاپ، ولارعا وتباسى اماندىعىن تىلەدى.

جوبانىڭ جۇزەگە اسىرۋ قۇنى - 83 ملن. تەڭگە. عيماراتتىڭ الاڭى شامامەن 400 شارشى مەتر، ينفەكسيالىق اۋرۋحاناعا قاراي ارنايى جول بار. مەديسينالىق مەكەمە باۋىرلاستار–1 جانە باۋىرلاستار–2 شاعىن اۋداندارىندا تۇراتىن 3 مىڭداي ادامعا قىزمەت كورسەتپەك. جوسپارلى قۋاتتىلىعى – ءبىر اۋىسىمدا ەلۋ ادامدى قابىلداۋ.

جاڭا امبۋلاتوريادا اۋىل تۇرعىندارى زەرتحانالىق زەرتتەۋلەردىڭ ستاندارتتى جيىنتىعىن، ستوموتولوگيالىق كومەك، فيزيوتەراپيالىق جانە پروسەدۋرالىق كابينەتتەردىڭ قىزمەتىن، كۇندىزگى ستاسيونار جاعدايىنداعى ەم الۋ قىزمەتتەرىن الادى. امبۋلاتوريا شتاتى قاجەت ماماندارمەن جاساقتالعان. جالپى دارىگەرلىك تاجىريبە جانە پەدياتورلىق ۋچاستوك سەكىلدى ەكى ۋچاسكەسى بار. كەلەشەكتە تار شەڭبەرلى ماماندار قىزمەت كورسەتەدى دەپ جوسپارلانۋدا.

ايتا كەتەيىك، مەرەكە كۇندەرى وبلىستا تاعى ءتورت مەديسينالىق مەكەمە پايدالانۋعا بەرىلمەك. اتاپ ايتقاندا، اقشات، ۋكراينكا، ماگاجان اۋىلدارى مەن ك.نوكين اتىنداعى كەنتتە دارىگەرلىك امبۋلاتوريالار مەن فەلدشەرلىك-امبۋلاتوريالىق پۋنكتتەر العاشقى ناۋقاستارىن قابىلدايدى.

بىلتىر اۋىلدىق ەلدى مەكەندەردە مجس اياسىندا سالىنعان 21 مەديسينالىق نىساننىڭ قۇرىلىسى باستالعان بولاتىن. ولاردىڭ دەنى ءقازىردىڭ وزىندە ىسكە قوسىلدى.