ءۇشارال قالاسىندا الاكول اۋدانى ىسكەر ايەلدەرىنىڭ ءبىرىنشى فورۋمى ءوتتى، دەپ جازادى Qamshy.kz اقپارات اگەنتتىگى.

اتالمىش شاراعا الماتى وبلىسى كاسىپكەرلەر پالاتاسى وڭىرلىك كەڭەسىنىڭ ءتورايىمى، وبلىستىق ىسكەر ايەلدەر كەڭەسىنىڭ جەتەكشىسى ريمما سالىقوۆا، الماتى وبلىسى كاسىپكەرلەر پالاتاسى ادامي كاپيتالدى دامىتۋ ءبولىمىنىڭ باسشىسى الماگۇل وڭعاربايەۆا، الاكول اۋدانى اكىمىنىڭ ورىنباسارى الماس احانوۆ، كاسىپكەرلەر پالاتاسىنىڭ الاكول اۋداندىق فيليالىنىڭ باسشىسى مۇحتار اديكوۆ، اقسۋ جانە سارقان اۋداندارىنداعى ىسكەر ايەلدەر كەڭەسى جەتەكشىلەرى، سونداي-اق الاكول اۋدانىنىڭ كاسىپكەر ايەلدەرى قاتىستى.

الماتى وبلىسى كاسىپكەرلەر پالاتاسى وڭىرلىك كەڭەسىنىڭ ءتورايىمى، وبلىستىق ىسكەر ايەلدەر كەڭەسىنىڭ جەتەكشىسى ريمما سالىقوۆا اتاپ وتكەندەي، الاكولدىك بيزنەس حانىمدارىنىڭ كەڭەسى اۋدان ايەلدەرىنىڭ ەكونوميكالىق جانە الەۋمەتتىك باستامالارىن قولداۋداعى باستى قوزعاۋشى كۇشكە اينالۋى كەرەك.

«ىسكەر ايەلدەر كەڭەسى قۇرامىن كەڭەيتىپ، قاتارىنا بيزنەس وكىلدەرىن عانا ەمەس،  مەملەكەتتىك مەكەمەلەر مەن قوعامدىق ۇيىمداردىڭ ايەل باسشىلارىن دا قوستى. اسىرەسە، كەڭەس ايەلدەردىڭ باستامالارى مەن سۇراقتارىن شەشۋگە قولداۋ كورسەتىپ وتىرۋى ءتيىس»، - دەدى ريمما سالىقوۆا.

الاكول اۋدانىنىڭ ىسكەر ايەلدەر كەڭەسىنىڭ ءتورايىمى بارشاگۇل ساياتوۆا كەڭەستىڭ جاڭارعان قۇرامىن، جۇمىس جوسپارى مەن الداعى مىندەتتەرىمەن تانىستىردى. اۋداندىق ىسكەر ايەلدەر كەڭەسى جانىنان كاسىپكەرلىك سالالارىنداعى ماسەلەلەردى ءجىتى قاراستىرىپ وتىراتىن سالالىق كوميتەتتەر قۇرىلاتىن بولادى.

«بۇگىندە اۋداننىڭ 1431 ايەل كاسىپكەرى اۋىل شارۋاشىلىعى، دەنساۋلىق ساقتاۋ، ءبىلىم بەرۋ، تۋريزم، قوناق ءۇي بيزنەسى، ساۋدا ءىسى سىندى كاسىپكەرلىكتىڭ بارلىق سالاسىندا جۇمىس ىستەيدى. وسىلايشا، كاسىپكەرلىك سۋبەكتىلەرىنىڭ 60%ء-ىن ايەل ازاماتتار باسقارىپ وتىر. ءبىزدىڭ الدىمىزدا جەگىلىكتى اتقارۋشى بيلىكپەن ءوزارا قارىم-قاتىناس دەڭگەيىن كۇشەيتۋ، جاس كاسىپكەرلەرگە قولداۋ ءبىلدىرۋ مىندەتتەرى تۇر»، - دەدى بارشاگۇل ساياتوۆا.

ءوڭىردىڭ الەۋمەتتىك-ەكونوميكالىق دامۋىنداعى اۋقىمدى ۇلەسىن اۋدان اكىمىنىڭ ورىنباسارى الماس احانوۆ ەرەكشە اتاپ ءوتتى.

«اتاپ ءوتۋ كەرەك، بۇگىنگى نارىقتا شارۋا قوجالىعىن باسقاراتىنداردىڭ باسىم بولىگى ايەل ادامدار. سونىمەن قوسا، جاقسى كورسەتكىشتەرگە قول جەتكىزىپ ءجۇر. ايەل كاسىپكەرلەردىڭ الەۋمەتتىك جاۋاپكەرشىلىگى وتە جوعارى، ولار بەلسەندى تۇردە قايىرىمدىلىقپەن اينالىسىپ كەلەدى»، – دەدى اۋدان اكىمىنىڭ ورىنباسارى.

اۋدان ىشىندە زور قايىرىمدىلىق قىزمەتى ءۇشىن «اليا» جك ديرەكتورى گۇلزادا سەمبينوۆا، جەكە كاسىپكەرلىكتى دامىتۋعا قوسقان ۇلەسى ءۇشىن «مۋكۋبايەۆا» جك جەتەكشىسى قيزات مۇقىبايەۆا مەن «اقساعىم» بالاباقشاسىنىڭ ديرەكتورى ايگەرىم قاناتحان العىس حاتتارمەن ماراپاتتالدى.

تالقىلاۋ بارىسىندا ايەل كاسىپكەرلىگىنىڭ دامۋ پروبلەمالارى، ايەل-كاسىپكەرلەردىڭ ەكونوميكالىق باستامالارىن قولداۋ مەن قارجىلىق ساۋاتتىلىعىن ارتتىرۋ بويىنشا سۇراقتار كوتەرىلدى.  شارا اياسىندا اۋدان بيزنەس حانىمدارىنىڭ جەتىستىكتەرىنە ارنالعان «تابىسكەر ايەل كەلبەتى» كورمەسى ۇيىمداستىرىلىپ، قاتىسۋشىلارعا كاسىپكەر قيزات مۇقىبايەۆانىڭ تابىس وقيعاسى ايتىلدى.

سونىمەن بىرگە، فورۋمعا «دامۋ» قورىنىڭ وڭىرلىك فيليالى ديرەكتورىنىڭ ورىنباسارى رۋسلان ساماكەيەۆ پەن قوردىڭ باس مەنەدجەرى جاندوس نۇرعازينوۆ، «الاكول» نەسيە سەرىكتەستىگىنىڭ وكىلى ءسابيت داريۆحان مەن پسيحولوگ تولقىن مۇقاشيەۆا قاتىسىپ، ءسوز سويلەدى.

فورۋم قورىتىندىسى بويىنشا ىسكەر ايەلدەر كەڭەسى الاكول كولىندەگى ءتۋريزمدى دامىتۋ ماسەلەلەرىنە ارنالعان دوڭگەلەك ۇستەلدى ۇيىمداستىرۋدى جوسپارلاپ وتىر.