بيىل استانا قالاسىنىڭ جيىرما جىلدىعى رەسپۋبليكا كولەمىندە كەڭىنەن اتالىپ وتىلمەك. اتاۋلى داتاعا وراي الماتى وبلىسىنىڭ مادەنيەت، ارحيۆتەر جانە قۇجاتتاما باسقارماسىندا ەلوردامىزدىڭ شيرەك عاسىرعا جۋىق ۋاقىتتا جەتكەن جەتىستىكتەرىن تالقىلاۋ ماقساتىندا دوڭگەلەك ۇستەل وتىرىسى ءوتتى.

جيىنعا ءى.جانسۇگىروۆ اتىنداعى جمۋ-دىڭ وقىتۋشىلارى، سالا ماماندارى جانە ب ا ق وكىلدەرى قاتىستى. باسقوسۋ بارىندا «الماتى وبلىستىق مەملەكەتتىك مۇراعاتى» مەكەمەسىنىڭ جەكە قۇرام بويىنشا تالدىقورعان فيليالىنىڭ ديرەكتورى ەركەبۇلان باقابايەۆ العاش ءسوز الدى. ول استانا قالاسىنىڭ جيىرما جىلدىعىنا وراي اتقارىلاتىن شارالار جايىن ايتىپ، بۇعان ارحيۆتەر سالاسىنىڭ دا قوسار ۇلەسى بار ەكەنىن تىلگە تيەك ەتتى. سونىمەن قاتار مەكەمە باسشىسى: «ەلباسىمىز وسىدان 20 جىل بۇرىن استانانى اقمولا قالاسىنا كوشىرگەن جاعدايدا دامۋدىڭ 32 تيىمدىلىگى بار ەكەنىن ايقىنداپ بەرگەن بولاتىن. بۇگىندە ءبىز سونىڭ كورىنىسىنە كۋا بولىپ وتىرمىز»، — دەپ اتاپ ءوتتى.

سونىمەن قاتار جيىنعا قاتىسقان سالا ماماندارى استانانىڭ جيىرما جىلداعى دامۋىن ءۇش كەزەڭگە ءبولىپ قاراستىردى. ياعني، ول 1998-2005 جىل، 2005-2010 جىل جانە 2011 مەن 2017 جىلدار. ماسەلەن، 1999 جىلى يۋنەسكو شەشىمىمەن استانا بەيبىتشىلىك قالاسى اتانسا، 2000 جىلى حالىقارالىق استانالار مەن ءىرى قالالار ىشىندەگى اسسامبلەياعا ەلوردامىز مۇشە بولعان. سونداي-اق، ءار جىلدا سانىمەن ساۋلەتى كەلىسكەن اسەم عيماراتتاردىڭ بوي كوتەرگەندىگى جانە ۇلى دالا تورىندە وتكەن «ەكسپو-2017» حالىقارالىق كورمەسى ايتۋعا تۇرارلىق ماقتانىش.

كەلەسى دە ءسوز تىزگىنىن ءى.جانسۇگىروۆ اتىنداعى جمۋ-دىڭ گۋمانيتارلىق فاكۋلتەتى، جۋرناليستيكا كافەدراسىنىڭ مەڭگەرۋشىسى جۇماعالي ەسەنبەك الدى. ول اتالمىش ۋنيۆەرسيتەتتە استانانىڭ 20 جىلدىعىنا وراي ستۋدەنتتەردىڭ قاتىسۋىمەن ءتۇرلى مادەني تانىمدىق شارالار ءوتىپ جاتقانداعىن ايتتى.

ال، ءوز كەزەگىندە ءسوز العان قازاقستان تاريحى كافەدراسىنىڭ وقىتۋشىسى قۋانعان ونەربەك ەلباسىنىڭ سارابدال ساياساتىن تىلگە تيەك ەتتى. «پرەزيدەنتكە ەلوردانى الماتىدان اقمولا قالاسىنا كوشىرۋ يدەياسى توسىننان كەلمەگەن ەدى. ياعني، مەملەكەتتىڭ استاناسى شەكاراعا جاقىن تۇرۋ ۇلكەن ءقاۋىپتى توندىرەدى، سوندىقتان ول قازاقستان كارتاسىنىڭ ناق ورتاسىندا ورنالاسۋ كەرەك. وسى جاعىنان العاندا ەلباسىمىز دۇرىس شەشىم قابىلداعان»، — دەپ كەلتىردى.

سونىمەن قاتار ق.ونەربەك ەلوردانى باسقا شاھارعا اۋىستىرۋ تۋرالى شەشىم شىققاندا كانديدات قالالاردىڭ ىشىنەن تالدىقورعان ەڭ كوپ داۋىس جيناعاندىعى تۋرالى قىزىقتى مالەمەت ايتتى. ايتۋىنشا، تابيعاتى قولايلى جانە ەكونوميكاسى جاعىنان ۇلكەن ماگيسترالدى جولدىڭ بويىندا جاتقاندىقتان جاسىل جەلەكتى شاھار 74 پايىز داۋىس جيناعان. ەكىنشى ورىندى قاراعاندى السا، اقمولا ءۇشىنشى ورىندى قۇراعان. الايدا، ەلباسى استانا ورتالىقتا بولۋ كەرەكتىگىن ەسكەرىپ، اقمولا قالاسىن تاڭداپ العان. ودان بولەك، اقمولانى تاڭداپ الۋداعى باستى سەبەپتەردىڭ ءبىرى – سولتۇستىك ءوڭىردى قازاقشالاندىرۋ بولسا، ەكىنشى جاعى سول جاقتىڭ ەكونوميكاسىن دامىتۋ. وسىنداي جايتتار اقمولا قالاسىنىڭ ەلدىڭ استاناسى اتانۋىنا سەبەپ بولعان ەكەن.

دوڭگەلەك ۇستەلگە جينالعاندار وسىلايشا ەلوردانىڭ 20 جىلدا جەتكەن جەتىستىكتەرىن ءسوز ەتىپ، الداعى ۋاقىتتا دا دامىپ، جاناي تۇسۋىنە تىلەكتەس ەكەندىكتەرىن جەتكىزدى.

جيىن سوڭىندا مەكەمە باسشىسى ەركەبۇلان باقابايەۆ ارحيۆ سالاسىندا اتقارىلىپ جاتقان جۇمىستاردى اتاپ ءوتتى. «بۇگىندە قاراپايىم حالىق ارحيۆ قىزمەتكەرلەرىن تەك شاڭ باسقان قۇجاتتاردى رەتكە كەلتىرىپ نەمەسە ەلدەردىڭ سۇرانىسىنا جاۋاپ بەرۋمەن عانا اينالىسادى دەپ ويلايدى. نەگىزى، ءارحيۆتىڭ ءۇش نەگىزگى باعىتى بار. العاشقىسى قۇندى قۇجاتتاردى قاداعالاۋ بولسا، ودان كەيىن سول قۇجاتتاردى جيناقتاۋ جانە ونى حالىققا جەتكىزۋ. ءبىز وسىنداعى قۇندىلىقتاردى نەعۇرلىم حالىققا وڭاي، ءارى ءتيىمدى جەتكىزۋ ماقساتىندا ءتۇرلى باعىتتا انىقتامالىق كىتاپتاردى شىعارامىز. ماسەلەن، 1932-2000 جىلداردا الماتى وبىلىسىنىڭ اۋماعىندا ورىن العان تاريحي وزگەرىستەر تۋرالى كىتابىمىز جارىق كوردى. ويلاپ قاراساڭ مۇنىڭ بارلىعى ۇلكەن ەڭبەكتى تالاپ ەتەدى»، —دەيدى.