جەتىسۋدىڭ استاناسى تالدىقورعاندا وتەتىن ناۋرىز مەرەكەسىنە دايىندىق جۇمىستارى قىزۋ جۇرگىزىلۋدە. يپپودرومدا ۇلتتىق ويىن ءتۇرىنىڭ ءبىرى — سالىم كوكپار،  “جاستار” ساياباعىنىڭ اۋماعىندا “ناۋرىز كوجە” مەن “باۋىرساق party”، قولونەر بۇيىمدارىنىڭ كورمەسى،  سپورتتىق جارىستار وتكىزۋ جوسپارلانۋدا. سونداي-اق، جيىرما قازان پالاۋ تەگىن تاراتىلاتىن بولادى. وسى جانە وزگە دە ءبىرقاتار اقپاراتتار  وڭىرلىك كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا بەلگىلى بولدى.

جيىنعا قاتىسقان  الماتى وبلىستىق قازاقستان حالقى اسسامبلەياسى ءتوراعاسىنىڭ ورىنباسارى، حاتشىلىق مەڭگەرۋشىسى عابيت تۇرسىنباي مەن تالدىقورعان قالاسى اكىمىنىڭ ورىنباسارى مارلەن كولبايەۆ اتالمىش مەرەكەنىڭ ايماعىمىزدا اتاپ ءوتىلۋى جايىندا كەڭىنەن تارقاتىپ بەردى. عابيت تۇرسىنباي ۇلى: “قازاقستاندىقتار ءۇشىن ناۋرىز مەرەكەسى بيىل ەرەكشە باستالۋدا. وسى كەزەڭدە بىر-بىرىنە جاقسىلىق جاساۋ، قۋانتۋ، سىيلىق سىيلاۋ  حالقىمىزدىڭ ەجەلدەن كەلە جاتقان قالىپتاسقان ءداستۇرى. ءبىزدىڭ وڭىرىمىزدە  كوپتەگەن يگى شارالار ۇيىمداستىرىلدى. سونىڭ باسىم كوپشىلىگى ۇلىستىڭ ۇلى كۇنى قارساڭىندا اتقارىلادى. سەبەبى، ناۋرىز بەرەكەلى جىلدىڭ باسى”-دەپ مەرەيلى مەرەكەنىڭ 14 ناۋرىز كورىسۋ كۇنىندە باستاۋ العاندىعىن تىلگە تيەك ەتتى.  ايتا كەتەيىك، مادەنيەت وكىلدەرى وبلىسىمىزعا قاراستى اۋىل، اۋداندى  ارالاپ  كونسەرتتەر ۇيىمداستىرىپ، مەرەكەلىك شارالار سالت-داستۇرلەر شەرۋىمەن جالعاسىن تابادى.

 “ناۋرىز اۋىلىنا” بەس قازاق ءۇي تىگىلەدى. تالدىقورعاندىقتار ەسترادامىزدىڭ جارىق جۇلدىزدارى جانار دۇعالوۆا، ايگەرىم قالاۋبايەۆا، ولجاس اباي، مۇقاسان شاحزادايەۆتىڭ اسەم انىمەن قاتار اكروباتتاردىڭ دا ونەرىنە كۋا بولادى.  “جالپى مەرەكەلىك شارا “جاستار” سپورت كەشەنىنىڭ، “رۋحاني جاڭعىرۋ” ورتالىعىنىڭ اۋماعىندا جانە “جاستار” ساياباعىنىڭ الاڭىندا  وتەدى. مەيرام ادەتتەگىدەي  بۇلاق كوزىن اشۋدان باستالادى. جينالعان قاۋىم بيىل وبلىس اقىندارى اراسىندا وتەتىن   ايتىستى تاماشالاي الادى. ناۋرىز -جىل باسى. جەر-انا بۋسانىپ، تىرشىلىك جانداناتىن كەزەڭ. وسىعان سايكەس ساياباقتا “ناۋرىز تال وتىرعىزۋ”  ءراسىمى جۇرگىزىلەدى. ياعني، شاراعا قاتىسقىسى كەلەتىن بارشا جانعا   كوشەتتەر تاراتىلادى”-دەپ مارلەن قاپاش ۇلى اتاپ ءوتتى.