قازاقستان رەسپۋبليكاسىنىڭ دۋبايداعى دۇنيەجۇزىلىك ەكسپو-2020 كورمەسىنە قاتىسۋ تۋرالى شارتقا قول قويىلدى، دەپ حابارلايدى Qamshy.kz اقپارات اگەنتتىگى «استانا ەكسپو-2017» ۇك» اق باسپا ءسوز قىزمەتىنە سىلتەمە جاساي وتىرىپ.

دۇنيەجۇزىلىك ەكسپو كورمەسى دۋباي شاھارىندا 2020 جىلدىڭ 20 قازانىنان 2021 جىلدىڭ 10 ءساۋىرى ارالىعىندا «بولاشاق ءۇشىن سانا-سەزىمدى بىرىكتىرۋ» تاقىرىبىندا، ونىڭ ىشىندە «مۇمكىندىك»، «موبيلدىلىك» جانە «تۇراقتىلىق» دەگەن ۇعىمداردان تۇرادى. ۇيىمداستىرۋشىلار كورمەنى 25 ملن. ادام تاماشالايدى دەپ كۇتۋدە. ايتا كەتسەك، ەكسپو كورمەسى تاياۋ شىعىستا ءبىرىنشى رەت وتكىزىلمەكشى.

كورمە كەشەنى «ءۇش جاپىراق» پىشىندە ۇسىنىلعان جانە بىرىككەن اراب امىرلىكتەرىنىڭ پاۆيلونى، سونداي-اق، كورمە ۇعىمدارىنا ساي 3 تاقىرىپتىق كلاستەر ديامەترى 150 مەتردى قۇرايتىن «ءال-ۆاسل» پلازاسى ورتالىق نىسانىنىڭ قاسىندا ورنالاسادى. ءباا پاۆيلونىنىڭ جوباسىن يسپاندىق ساۋلەتشى سانتياگو كالاتراۆا، «مۇمكىندىك» پاۆيلونىن – BIG (Bjarke Ingels Group)، «موبيلدىلىك» - Foster and Partners، «تۇراقتىلىق» - Grimshaw Architects جاسادى.

ەكسپو كەشەنىنىڭ جالپى اۋماعى 438 گا. قۇرايدى. وعان 150 گا. كولەمىندە كورمە اۋماعى، سونداي-اق، جەرۇستى مەترو ستانساسى، «Dubai South Mall» ساۋدا ورتالىعى، تۇرعىن ءۇي، لوگيستيكالىق جانە قوناق ءۇي نىساندارى كىرەدى.

قازىرگى ۋاقىتتا، «ەكسپو-2020 دۋباي» كورمەسىنە 170 ەل قاتىساتىندىعىن راستاپ، 55 ەل كەلىسىمگە قول قويعان.

ەستەرىڭىزگە سالا كەتەيىك، كەلىسىمگە دۋبايداعى دۇنيەجۇزىلىك ەكسپو-2020 كورمەسىندە قازاقستان رەسپۋبليكاسىنىڭ ۇلتتىق سەكسياسىنىڭ باس كوميسسارى، «استانا ەكسپو-2017» ۇك» اق باسقارما ءتوراعاسىنىڭ ورىنباسارى اللەن ءشايجۇنىسوۆ پەن «ەكسپو-2020 دۋباي» بيۋروسىنىڭ اتقارۋشى ديرەكتورى نادجيب موحاممەد ءال-الي قول قويدى.