رەسمي دەرەك بويىنشا رەسەيدىڭ كەمەروۆو قالاسىنداعى ورتتە 64 ادام كوز جۇمدى دەلىنەدى. بۇل شىندىققا جاناسا ما؟ الەۋمەتتىك جەلىدە قۇربان بولعانداردىڭ سانىنا قاتىستى ءارتۇرلى اڭگىمە ايتىلىپ جاتىر.

27 ناۋرىزدا مىڭداعان ادام الاڭعا شىعىپ، نارازىلىق ءبىلدىردى. جەرگىلىكتى تۇرعىندار گۋبەرناتور امان تولەيەۆتى قىزمەتىنەن بوساتىپ، شىندىقتى جاسىرماي، قۇربانداردىڭ ناقتى سانىن ايتۋدى تالاپ ەتتى.

«64 ادام قازا تاپتى دەگەن دەرەك – وتىرىك! دەمالىس كۇنى ءبىر زالدا وتىز ادام عانا بولدى دەگەنگە كىم سەنەدى؟ ساۋدا ورتالىعىنىڭ بارلىق زالدارى لىق تولدى، ءبىر زالدىڭ وزىندە 142 ورىن بار. قانشا بيلەت ساتىلدى، قانشا ادام جاپا شەكتى؟» - دەپ شۋلاستى.

رەسەيدەگى كەيبىر ازاماتتىق بەلسەندىلەر قايتىس بولعاندار سانى رەسمي حابارلانعاننان الدەقايدا كوپ ەكەنىن ايتادى. الەۋمەتتىك جەلىلەردە وسىعان بايلانىستى نەشە ءتۇرلى فوتولار مەن ۆيدەولار تاراپ كەتكەن. مىسالى، Youtube جەلىسىندە تاراعان مىنا ماتەريالدا ءورتتىڭ كەسىرىنەن 400-گە جۋىق ادام قايتىس بولدى دەلىنەدى.

سوندا بۇل قالاي بولعانى؟ رەسەي بيلىگى ورتتەن قازا تاپقانداردىڭ سانىن ادەيى كەمىتىپ كورسەتىپ وتىر ما؟

ەۆگەنيا ۆولنوۆا ەسىمدى ۋكراينالىق پرانكەر 25 ناۋرىزدا كەمەروۆوداعى ءمايىتحاناعا قوڭىراۋ شالعان. ءوزىن توتەنشە جاعدايلار كوميتەتىنىڭ ادامى رەتىندە تانىستىرىپ، قانشا بوس ورىن بارىن سۇراعان. شامامەن 70 ورىن بار ەكەنىن بىلگەن سوڭ، قازا تاپقان ادامدار سانى 300-گە جۋىق دەپ ەسەپتەپ شىعارىپتى.

سونىمەن قاتار ۋكراينالىق پرانكەر «زيمنيايا ۆيشنيا» ساۋدا ورتالىعىندا باسقا دا قۇيتىرقى ارەكەتتەر جاساپ، ونى ۆيدەودا جاريالاعان.

رف پرەزيدەنتى ۆلاديميروۆيچ پۋتين الەۋمەتتىك جەلىلەردەگى تەكسەرىلمەگەن اقپاراتتارعا سەنبەۋگە جانە رەسمي دەرەكتەرگە ەش كۇمان كەلتىرمەۋگە شاقىردى.

الايدا جاۋاپتى ورگاندارعا نانباعان ءبىر توپ بەلسەندى ءمايىتحاناعا بارىپ، قۇربانداردى وزدەرى ساناۋعا كىرىسكەن. ءمايىتحانانىڭ قۋىس-قۋىسىن ءتىنتىپ شىققان ولار 64 ادامنىڭ مۇردەسىن كورىپتى.

ەسكە سالايىق، 25 ناۋرىزدا رەسەيدىڭ كەمەروۆو قالاسىنداعى «زيمنيايا ۆيشنيا» ساۋدا ورتالىعىندا الاپات ءورت بولىپ، عيمارات وتقا وراندى. رەسمي دەرەكتەر بويىنشا 64 ادام قازا تاپقان، ونىڭ كوپشىلىگى – بالالار.