بۇگىن وقو-عا بارعان باقىتجان ساعىنتايەۆ جوسپارداعى باعدارلامادان تىس سارىاعاش اۋدانىنداعى «جىبەك جولى» كەدەن بەكەتىندە بولدى.

حالىقارالىق باقىلاۋ–وتكىزۋ بەكەتى وزبەكستانمەن شەكارادا جىبەك جولى كەنتىندە ورنالاسقان. مۇندا ەكى باعىتتا شەكارادان وتەتىن ادامدار مەن كولىك قۇرالدارىنىڭ شەكارالىق باقىلاۋى جۇزەگە اسىرىلادى.

ق ر پرەمەر-مينيسترى باقىتجان ساعىنتايەۆقا كەدەن بەكەتى ارقىلى تاۋلىگىنە 25 مىڭعا دەيىن ادام جانە 100-گە جۋىق كولىك وتەتىنى تۋرالى ايتىلدى. سونىمەن قاتار «قازجولسەرۆيس» ج ش س باسشىسى ە. ديقانبايەۆتىڭ ايتۋىنشا، اۆتوۆوكزالدىڭ جاڭا عيماراتىنىڭ سالىنۋى ەكى ەل اراسىنداعى جولاۋشىلار اعىنىن جانە جۇك تاسىمالىنىڭ كولەمىن ۇلعايتۋعا مۇمكىندىك بەرەدى.

سونىمەن قاتار سارىاعاش اۋدانىنىڭ اكىمى قايرات ابدۋالييەۆ ءبوب قىزمەتى، كەدەن اۋماعىن كەڭەيتۋ، سارىاعاش اۋدانىنىڭ اۋماعىندا ورنالاسقان ءتورت كەدەن پۋنكتىن كورىكتەندىرۋ جۇمىستارى تۋرالى باياندادى.

ەسكە سالا كەتەيىك، بۇگىن مەملەكەت باسشىسىنىڭ تاپسىرماسى بويىنشا ق ر پرەمەر-مينيسترى باقىتجان ساعىنتايەۆ جۇمىس ساپارىمەن وڭتۇستىك قازاقستان وبلىسىنا باردى. ساپاردىڭ ماقساتى —  پرەزيدەنتتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك»، «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» جولداۋلارى مەن بەس الەۋمەتتىك باستاماسىنىڭ جۇزەگە اسىرىلۋ بارىسىمەن تانىسۋ.