بۇگىن اقمولا وبلىستىق سوتىنىڭ ءتوراعاسى دوسجان ءامىروۆ جانە اقمولا وبلىسىنىڭ كاسىپوداقتار ورتالىعىنىڭ ءتوراعاسى قالي راحمەتوۆ ءوزارا ارىپتەستىك جونىندەگى مەموراندۋمعا قول قويدى، دەپ جازادى Qamshy.kz اقپارات اگەنتتىگى.

داۋلاردى بەيبىت تۇردە شەشۋ جانە قوعامداعى داۋلاردىڭ دەڭگەيىن تومەندەتۋ، قازاقستان رەسپۋبليكاسى پرەزيدەنتىنىڭ «قازاقستان-2050» ستراتەگياسىندا، «100 ناقتى قادام» ۇلت جوسپارى، «رۋحاني جاڭعىرۋ» باعدارلامالارىندا قويىلعان تاپسىرمالارىن ورىنداۋ ءۇشىن حالىقتىڭ ەڭبەك جانە باسقا دا داۋلاردى تاتۋلاسۋ تارتىبىمەن شەشۋ مۇمكىندىكتەرىن ارتتىرۋعا باعىتتالعان بىرىككەن ىس-ارەكەتتەر قابىلداۋ ماقساتىندا، وبلىستىق سوت جانە كاسىپوداقتار ورتالىعى داۋلار مەن جانجالداردى رەتتەۋ بويىنشا تۇرعىندارعا كەشەندى قىزمەت كورسەتۋ ءۇشىن تاتۋلاسۋ ورتالىعىن اشۋعا شەشىم قابىلدادى.

سوت جانە كاسىپوداقتار بىرلەستىكتەرى قول قويىلعان مەموراندۋمعا سايكەس، تاتۋلاسۋ ورتالىعىنىڭ جۇمىسىن ۇيىمداستىرۋ ماسەلەلەرى، حالىق اراسىندا تاتۋلاسۋ راسىمدەرى تۋرالى ناسيحات جۇرگىزۋ، داۋلاردى تاتۋلاسۋ تارتىبىمەن رەتتەۋ راسىمدەرى بويىنشا زاڭنامانى جەتىلدىرۋ، مەدياتورلاردى وقىتۋ جانە قىزمەت كورسەتۋ ساپاسىن جەتىلدىرۋ بويىنشا ءوزارا ارەكەتتەسەتىن بولادى. تاراپتار تاتۋلاستىرۋ راسىمدەرىن جانە داۋلاردى بەيبىت جولمەن شەشۋ تاجىريبەسىن دامىتۋ بويىنشا، قاجەتتى اقپاراتتارمەن الماسۋعا، ازاماتتاردىڭ قۇقىقتارى مەن مۇددەلەرىن قامتاماسىز ەتۋگە، قوعامداعى داۋلاردىڭ دەڭگەيىن تومەندەتۋگە باعىتتالعان بىرلەسكەن جوبالارعا قاتىسۋعا، ازاماتتاردىڭ قۇقىقتارى مەن مۇددەلەرىن جۇزەگە اسىرۋدى قامتاماسىز ەتۋگە جانە باسقا دا بىرلەسكەن ءىس-شارالار وتكىزۋدى جوسپارلادى.

اقمولا وبلىستىق سوتىنىڭ ءتوراعاسى د.ءامىروۆ ءىس-شارادا ءسوز سويلەي وتىرىپ، مەدياسيانى كەڭىنەن قولدانۋ جانە دامىتۋدىڭ ماڭىزدىلىعىن ءتۇسىندىرىپ ءوتتى. سونىمەن قاتار، مەدياتورلاردىڭ قاتىسۋىمەن سوتتاردا قارالعان ىستەردىڭ سانى تۋرالى ستاتيستيكالىق مالىمەتتەر جونىندە ايتىپ ءوتتى.

ماسەلەن، اقمولا وبلىسى سوتتارىمەن 2016 جىلى مەدياسيا تارتىبىمەن 3،3%، ال 2017 جىلى – 7،4%، 2018 جىلدىڭ ەكى ايىندا 12،1% قارالدى.

«داۋدى مەدياسيا تارتىبىمەن رەتتەۋ تۋرالى كەلىسىم جاساۋدىڭ تاراپتارعا تيىمدىلىگى ولاردىڭ تالاپ ارىز بەرۋ كەزىندە مەملەكەتتىك بيۋدجەتكە تولەگەن مەملەكەتتىك باج سومالارى قايتارىلادى. مىسالى، 2016 جىلى – 19 002 996 تەڭگە، 2017 جىلى – 94 102 392 تەنگە، ال 2018 جىلدىڭ ەكى ايىندا – 5 797 493 تەڭگە مەملەكەتتىك باج تالاپ قويۋشىعا قايتارىلدى» - دەدى ءتوراعا.

د.ءامىروۆ مەدياسيا ينستيتۋتىن ودان ءارى دامىتۋ ماقساتىندا ەڭبەك داۋلارى مەن جانجالداردى شەشۋ ماسەلەلەرىندە، مەدياتورلاردى وقىتۋ جانە تاتۋلاستىرۋ راسىمدەرىنىڭ تيىمدىلىگى مەن ونى ناسيحاتتاۋدا سوتتار مەن كاسىپوداق ۇيىمدارىنىڭ بىرلەسكەن جۇمىس اتقارۋلارى قاجەتتىلىگىن اتاپ ءوتىپ، سونىمەن قاتار، باستاپقى بىرلەسىپ جاسالىپ جاتقان ءىس-قيمىلدارى ءۇشىن العىس ءبىلدىردى.