دەنەسىنەن ينە تابىلىپ، اسقازانى ۋلى سۇيىقتىقتان كۇيگەن وقو-نىڭ اينا ەسىمدى تۇرعىنىنا قاتىستى وقيعا حالىق اراسىندا قاتتى تالقىلانىپ جاتىر. 8 جاستاعى قىزدىڭ تاعدىرىنا قوعام بەلسەندىلەرى نازار اۋدارعان سوڭ تۇركىستانداعى بيلىك وكىلدەرى جاعدايدى باقىلاۋعا الدى، دەپ جازادى Qamshy.kz اقپارات اگەنتتىگى tengrinews.kz-كە سىلتەمە جاساپ.

تۇركىستان قالاسى اكىمىنىڭ ورىنباسارى عاني ىرىسبەك قىزدىڭ ۇيىنە الەۋمەتتىك قىزمەتكەرلەر ءجيى بارىپ، وتباسىنداعى پسيحولوگيالىق احۋالدى قاداعالايتىنىن ايتادى.

«ءبىز قىزدىڭ قازىرگى جاعدايىنا جاۋاپ بەرەمىز. قىزدى وتباسىندا رەنجىتپەي مە، قالاي وقىپ جاتىر – سونى تەكسەرەدى. مەن قىزدىڭ اتا-اناسىمەن سويلەستىم. اينا ءقازىر مەكتەپتە وقيدى، دامۋىندا ەشقانداي اقاۋ جوق. وبلىستىق دەنساۋلىق ساقتاۋدان باسقارماسىنان كەلگەن كوميسسيا دا تەكسەردى. قىزدىڭ دامۋى جاقسى ەكەنىن ولار دا ايتىپ وتىر. ءان ايتادى، وقيدى، مەكتەپتەگى ءىس-شارالارعا قاتىسادى»، - دەدى عاني ىرىسبەك.

اكىم ورىنباسارىنىڭ ايتۋىنشا، 8 جاستاعى ايناعا قاتىستى ەلدى الاڭداتقان جاعداي 2012-2014 جىلدار ارالىعىندا بولعان. ول ۋاقىتتا قىز مۇلدە كىشكەنتاي ەدى.

قىزدىڭ اتا-اناسى ونىڭ جاعدايى ناشارلاعانىن بايقاعان. تۇركىستانداعى اۋرۋحانادا قىزدىڭ باسىن مرت-عا ءتۇسىرىپ، باسىنان ەكى ينە تاپقان.

«ول ۋاقىتتا قىز 2-3 جاستا بولاتىن. مرت جاساعاندا باسىنان ەكى ينە تابىلعان. دارىگەرلەر وپەراسيا جاساۋ كەرەك ەكەنىن ايتقان. وسىدان كەيىن قىزدىڭ اتا-اناسى ارۋجان سايننىڭ «مەيىرىم» قورىنا جاردەم سۇراپ بارعان. ول قاراجات جيناپ، قىزعا استانادا كومەك كورسەتىلدى. شەتەلگە دە جىبەردى، ءبىراق اتا-اناسى ەلگە كەلىپ، قىزدارىن قازاستاندا ەمدەتۋدى ۇيعاردى»، - دەدى اكىم ورىنباسارى.

ارۋجان سايننىڭ باستاماسىمەن قۇقىققورعاۋ ورگاندارى ق ر قك 1 ءبولىمى 141 بابى بويىنشا قىلمىستىق ءىس قوزعادى. الايدا تەرگەۋ جۇمىستارى ناتيجەسىندە، اتا-انانىڭ ارەكەتىنەن قىلمىس قۇرامىن تاپپادى. قىلمىستىق ءىس توقتاتىلدى.

ايتا كەتەيىك، قوعام قايراتكەرى ارۋجان ساين ءوزىنىڭ Facebook پاراقشاسىندا 2011 جىلعى اينا ەسىمدى قىزعا قاتىستى جانتۇرشىگەرلىك مالىمەتتەر جاريالاعان.