دەنەسى مەن باسىنان ينە تابىلىپ، اسقازانى ۋلى سۇيىقتىقتان ۋلانعان سەگىز جاستاعى اينانىڭ اكەسى زاڭگەر ايگۇل ورىنبەكپەن كەزدەسىپ، وقيعانىڭ ءمان-جايىن بايانداپ بەردى. قىزدىڭ اكەسىمەن سۇحبات بارىسىندا زاڭگەر Facebook جەلىسىندە تىكەلەي ەفيرگە شىقتى، دەپ حابارلايدى Qamshy.kz اقپارات اگەنتتىگى. 

اكەسىنىڭ قاۋىپسىزدىگى ءۇشىن ايگۇل ورىنبەك ونىڭ ءتۇرىن جاسىرىن ۇستاپ، ەسىمىن اتاماۋدى ءجون سانادى.

«ءقازىر قىزدىڭ جاعدايى جاقسى، ارۋجان ساينن ايتقانداي 8 كەلى ەمەس، 17 كەلىگە دەيىن جەتتى. ساباعىنا بارىپ ءجۇردى. مەن ول كىسىگە كومەك سۇراپ بارعان ەدىم، ءبىراق ول ۇستىمىزدەن ءىس قوزعاپ جىبەردى»، - دەيدى اكەسى. 

اكەسىنىڭ ايتۋىنشا، ارۋجان ساينمەن جولىقپاي تۇرىپ تا، قىزعا تالاي مارتە وتا جاسالعان. ال ارۋجان بولسا اتا-انا قۇقىعىنان ايىرۋ بويىنشا ارەكەتتەنىپ، قىزدى بالالار ۇيىنە تابىستاماق بولعان. قىزدىڭ اكەسى بۇعان تۇبەگەيلى قارسى. سەبەبى ولاردىڭ قىزدارىنا دەگەن مەيىرىمى مەن ماحابباتى شەكسىز ەكەن.

«ول بالالار ۇيىندە ءبىزدى ىزدەپ، ساعىناتىن بولادى. ول جەرگە ۇيرەنىسە المايدى. سەبەبى ءبىزدىڭ مەيىرىمىمىزگە بولەنىپ ءوستى»، - دەيدى اكەسى.

ايتا كەتەيىك، ارۋجان سايننىڭ باستاماسىمەن قۇقىققورعاۋ ورگاندارى ق ر قك 1 ءبولىمى 141 بابى بويىنشا قىلمىستىق ءىس قوزعادى. الايدا تەرگەۋ جۇمىستارى ناتيجەسىندە، اتا-انانىڭ ارەكەتىنەن قىلمىس قۇرامى تابىلمادى. قىلمىستىق ءىس توقتاتىلدى. دەگەنمەن قوعام قايراتكەرى ءالى كۇنگە دەيىن قىزدىڭ اكەسىنەن كۇدىكتەنەتىن كورىنەدى. بۇعان ەر ادام قاپالى.

«مەن تەرگەۋدەن بۇدان بۇرىن دا قاشپاعانمىن. بۇگىن دە دايىنمىن. پروكۋراتۋراعا دەيىن كەلىپ ەكسپەرتيزا جاساتسىن، مەن وعان دايىنمىن. تەك قىزىم ەمدەلسە بولعانى»، - دەدى ول.

ال قىزىنا كىمنىڭ قاستاندىق جاساۋى مۇمكىن ەكەنىنەن اكەسى حابارسىز. ونىڭ سوزىنە قاراعاندا، بۇعان دەيىن ايەلى ەكەۋىنەن وزگە جاقىن تۋىستارى مەن كورشىلەرىنە دەيىن تەرگەلگەن. ءبىراق كۇدىككە ىلىنەر ءبىر جان تابىلمادى. ەر ادام مۇنى «جۇمباق جاعداي» دەپ وتىر.

ەسكە سالايىق، ارۋجان ساين ءوزىنىڭ Facebook پاراقشاسىندا 2011 جىلعى اينا ەسىمدى قىزعا قاتىستى جانتۇرشىگەرلىك مالىمەتتەر جاريالاعان. ال بۇگىن تۇركىستانداعى بيلىك وكىلدەرى قىزدى تولىقتاي ءوز باقىلاۋىنا العانىن مالىمدەدى.