ESPN تەلەارناسىمىنىڭ مامانى جانە اقش-تاعى ەڭ اتاقتى شولۋشىلاردىڭ ءبىرى دەن رافاەل ورتا سالماقتاعى WBA (Super)، IBO، WBC جانە IBF تۇجىرىمدارى بويىنشا الەم چەمپيونى قازاقستاندىق گەنناديي گولوۆكينگە  (37-0-1، 33 كو) ەگەر ونىڭ 5-مامىر كۇنگە جوسپارلانعان مەكسيكالىق ساۋل "كانەلو" الۆارەسپەن (49-1-2، 34 كو) كەزدەسۋى وتپەي قالاتىن بولسا، كىمنىڭ لايىقتى قارسىلاس بولاتىنىن اتادى، دەپ حابارلايدى Qamshy.kz اقپارات اگەنتتىگى vesti.kz-كە سىلتەمە جاساپ. 

بۇعان دەيىن رافاەل گولوۆكين مەن "كانەلو" اراسىنداعى 5-مامىرعا جوسپارلانعا ەكىنشى كەزدەسۋدىڭ ءدال ۋاقىتىنداي وتپەي قالۋى مۇمكىن ەكەنى تۋرالى پىكىر ءبىلدىردى. ويتكەنى، ەكىنشى جەكپە-جەكتىڭ ماسەلەسى "كانەلونىڭ" قانشا ۋاقىتقا شەتتەتىلىتىنە تىكەلەي بايلانىستى. سوندىقتان دا مامان گولوۆكين جۋىق ارادا باسقا بوكسشىمەن كەزدەسەدى دەپ ەسەپتەيدى. 

رافاەلدىڭ ايتۋىنشا، گولوۆكينگە الداعى ۋاقىتتا ەڭ ءتيىمدى قارسىلاسى ورتا سالماقتاعى WBO بەلبەۋىنىڭ يەگەرى بيللي دجو سوندەرس (26-0، 12 KO) ەكەن. ەگەر بۇل جەكپە-جەكتى ۇيىمداستىرىپ، گولوۆكين جەڭەتىن بولسا، وندا ول ءابسوليۋتتى چەمپيون اتانادى. 

مامان ەكىنشى نۇسقا رەتىندە وتكەن جىلى ناۋرىزدا وتانداسىمىزدان جەڭىلگەن امەريكالىق دەنيەل دجەيكوبستى (33-2، 29 KO) ايتىپ وتىر. امەريكالىق بوكسشى Triple-G-گە 12 راۋند توتەپ بەرگەن ءبىرىنشى بوكسشى اتانىپ ەدى. 

سونىمەن قاتار بۇل تىزىمگە ۋكراينالىق سەرگەي دەريەۆيانچەنكو (12-0، 10 KO)، امەريكالىق دەمەتريۋس اندرادە (25-0، 16 كو) سەكىلدى بوكسشىلار كىرگەن. 

ناۋرىز ايىنىڭ باسىندا الۆارەستىڭ 17 جانە 20 اقپاندا تاپسىرعان دوپينگ-سىناماسىنان كلەنبۋتەرول دەگەن تىيىم سالىنعان زاتتىڭ تابىلعانى حابارلانعان. بوكسشىنىڭ كومانداسى مۇنى جەلىنگەن ەتتىڭ قۇرامىندا بولدى دەپ تۇسىندىرگەن. كەلەسى ءۇش دوپينگ-سىناقتى مەكسيكالىق اقش-تا تاپسىرىپ، وندا تىيىم سالىنعان زات تابىلماعان. 

ەسكە سالا كەتەيىك، 5 مامىرعا بەلگىلەنگەن گولوۆكين - الۆارەس اراسىنداعى ريەۆانش ماچ لاس-ۆەگاستا T-Mobile ارەناسىندا وتەدى.

گولوۆكين مەن الۆارەستىڭ العاشقى جەكپە-جەگى 2017 جىلدىڭ 16 قىركۇيەگىندە لاس-ۆەگاستا وتكەن بولاتىن. 12 راۋندقا سوزىلعان جەكپە-جەك تەڭ ەسەپپەن اياقتالعان ەدى.