الەمگە تانىمال فۋتبولشى كريشتيانۋ رونالدۋعا شاپان تىككەن ماڭعىستاۋلىق ديزاينەر، «نۇر-شاح» ءسان ءۇيىنىڭ يەسى جانە «ماڭعىستاۋ وبلىسىنىڭ ديزاينەرلەرى قاۋىمداستىعىنىڭ» پرەزيدەنتى نۇرجامال نۇرپەيىسوۆا تاپسىرىستىڭ قالاي تۇسكەنىن جانە ورىندالۋى تۋرالى ايتتى، دەپ حابارلايدى Qamshy.kz اقپارات اگەنتتىگى قازاقپاراتتىڭ دەرەگىنە سۇيەنىپ.

اقتاۋ قالاسىنداعى نازاربايەۆ زياتكەرلىك مەكتەبىنىڭ وقۋشىلارىمەن كەزدەسكەن ديزاينەر العاش تاپسىرىس تۋرالى ەستىگەندە ابدىراپ قالىپ، ءتىپتى سەنبەگەنىن جەتكىزدى.

«مەن تاپسىرىس تۇسكەندە رەسەيدە ساپاردا بولدىم. ەلگە ورالعانىمدا ماعان رونالدۋعا شاپان تىگۋ تۋرالى ۇسىنىس ءتۇستى. مەن العاشىندا تۇسىنبەي قالدىم، نە، نە دەپ سۇراي بەرىپپىن. تاڭعالعانىم سونشالىق، ارىپتەستەرىمنەن باسقا بىرەۋمەن شاتاستىرىپ تۇرعان شىعار دەپ سۇرادىم. ادام سەنگىسىز عوي. قاتەلەسكەن بولار دەپ ويلادىم. ارىپتەستەرىم دە ايگىلى رونالدۋ ەكەنىن ايتۋدا. دەرەۋ تاپسىرىس بەرگەن مەكەمەمەن بايلانىسقا شىقتىم»، - دەيدى نۇرجامال نۇرپەيىسوۆا.

ديزاينەردىڭ سوزىنە قاراعاندا، تاپسىرىس بەرۋشىلەر الدىمەن شاپاننىڭ ەسكيزىن سۇراتقان. سوندىقتان ديزاينەر لەزدە ىسكە كىرىسىپ، ەسكيز سالاتىن جەرگىلىكتى جانە رەسەيدەگى سۋرەتشىلەرىمەن بايلانىسقا شىعادى. ۇزدىگىن تاڭداپ، كوڭىلىنەن شىققان ۇلتتىق كيىمنىڭ 10 ءتۇرلى سىزباسىن تاپسىرىس بەرۋشىلەرگە جولدايدى. ال، ولاردىڭ باستى تالابى - شاپاننىڭ ارتىندا قازاقستاننىڭ تۋىندا بەينەلەنگەن كۇن مەن قىراننىڭ بولۋى.

«ءبىز ونى ورىندادىق. سونىڭ ىشىندە ۇناعان ەسكيزدى مەكەمە تاڭداپ الدى. ءتىپتى، كريشتيانۋ رونالدۋدىڭ باپكەرىنە دە شاپان كيگىزدىك. ول دا مەنىڭ ءسان ۇيىمنەن شىققان دۇنيە»،-دەيدى ديزاينەر.  ءسان ءۇيىنىڭ ۇجىمى تاپسىرىستى ەكى اي بويى تىگىپتى. وسى ۋاقىتتا ماڭعىستاۋدىڭ باس ديزاينەرى بار ۋاقىتىن تاپسىرىستىڭ ءساتتى شىعۋىنا بولگەن. اسىرەسە، شاپانعا قاجەت  زاتتاردى ءوزى ىزدەپ، ءتىپتى تىگىلۋىن ءجىتى قاداعالاعان. سوندىقتان بۇل تاپسىرىستىڭ اسا ەرەكشە ەكەنىن ايتادى. كريشتيانۋعا شاپاندى تاپسىرعان ساتتە ديزاينەر دۋبايدا بولىپتى.  

«مەن دۋبايدا جۇرگەندە فوتو جىبەردى. سودان كەيىن عانا مەن ينستاگرامداعى پاراقشاما سالدىم. بارلىعى مەنى قۇتتىقتاپ جاتتى. بۇل ءبىز ءۇشىن ۇلكەن مارتەبە، ماقتانىش. مەن ونى ەرەكشە جاقسى كورەمىن.  ءوزىنىڭ ەڭبەگىمەن ءوزىنىڭ بولاشاعىن قالىپتاستىرعان جان. ونىڭ فۋتبول ويناۋداعى تەحنيكاسى كەرەمەت»، - دەپ اياقتادى ءسوزىن نۇرجامال نۇرپەيىسوۆا.