گەنناديي گولوۆكين (37-0-1، 33 كو) مەن مەكسيكالىق «كانەلو» الۆارەسپەن (49-1-2، 34 كو) ءوتۋى ءتيىس ريەۆانش 5 مامىردا وتپەيتىن بولدى. بۇل تۋرالى WBC پرەزيدەنتى ماۋريسيو سۋلەيمان ايتتى، دەپ جازادى Qamshy.kz اقپارات اگەنتتىگى SPORTINFORM  مالىمەتىنە سۇيەنىپ. 

— مەنىڭ پىكىرىمشە گولوۆكين مەن  الۆارەس اراسىندا جەكپە-جەك بولمايدى. الۆارەس ءىسى بويىنشا نيەۆاداداعى تىڭدالىم 18 ساۋىرگە كوشىرىلدى. سوندىقتان جەكپە-جەكتىڭ 5 مامىردا وتەتىنىن كوز الدىما كەلتىرە المايمىن، — دەيدى سۋلەيمان ESPN Deportes-كە بەرگەن سۇحباتىندا.

ەسكە سالا كەتسەك، ساۋل الۆارەس نيەۆادا شتاتى اتلەتيكالىق كوميسسياسىنىڭ (NSAC) شەشىمىمەن ۋاقىتشا سپورتتان شەتتەتىلگەن ەدى. ناۋرىزدىڭ  باسىندا ساۋل الۆارەستەن الىنعان دوپينگ-سىنامالاردىڭ بىرىنەن تىيىم سالىنعان پرەپارات تابىلدى. ونىڭ مۇددەسىن قورعايتىن Golden Boy پروموۋتەرلىك كومپانياسى بوكسشىنىڭ قان قۇرامىنان تىيىم سالىنعان پرەپارات — كلەنبۋتەرول تابىلعانى تۋرالى اقپاراتتى راستادى.