شىمكەنتتە بالمۇزداقتان ۋلانىپ، اۋرۋحاناعا تۇسكەندەر سانى 188 ادامدى قۇرادى. ناۋقاستاندىرڭ اراسىندا 27 ادام سالمونەللەز جۇقتىرعانى انىقتالعان. بۇل تۋرالى بۇگىن وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆ مالىمدەدى، دەپ حابارلايدى Qamshy.kz اقپارات اگەنتتىگى قازاقپاراتتىڭ دەرەگىن نەگىزگە الىپ.

مۇقان كەڭەسبەك ۇلىنىڭ سوزىنشە، اۋرۋحاناعا جاتقىزىلعانداردىڭ 101ء-ى ەرەسەكتەر بولسا، 39-ى 14 جاسقا دەيىنگى بالا. سونداي-اق 48ء-ى كامەلەت جاسىنا تولماعان جاسوسپىرىمدەر.

«3ء-شى ساۋىرگە دەيىن 99 ناۋقاس ۇيلەرىنە شىعارىلدى. قازىرگى تاڭدا اۋرۋحانادا 89 اۋرۋ ەم قابىلداۋدا. اۋرۋلاردىڭ جاعدايلارى ورتا دارەجەدە. 4ء-شى جانە 5ء-شى ساۋىردە تاعى 50-60 ناۋقاس جاتقىزىلادى دەپ جوسپارلانۋدا. جاعدايى اۋىر ناۋقاستار جوق ازىرگە. اۋرۋحاناعا جاتقىزىلعان ناۋقاستاردىڭ بارلىعى جەدەل وتكىر-ىشەك ينفەكسياسىمەن تۇسكەن. 27 ناۋقاستا سالمونەللەز باكتەرياسى تابىلدى»،- دەدى وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆ.

ەسكە سالايىق، شىمكەنتتە تۇرعىندار بالمۇزداق ساتاتىن «يۋجنوە» ساۋدا ورىننان ءتاتتى جەپ، جاپپاي ۋلانىپ قالعان بولاتىن. سونىڭ سالدارىنان 27 ناۋرىزدان بەرى قالالىق جۇقپالى اۋرۋلار اۋرۋحاناسىنا 188 ادام ءتۇستى. وڭىردە وسى جاعدايعا بايلانىستى ارنايى كوميسسيا قۇرىلىپ، وبلىستىق قوعامدىق دەنساۋلىق ساقتاۋ دەپارتامەنتى تاراپىنان تەكسەرۋ شارالارى جۇرگىزىلۋدە. سونداي-اق وبلىستىق ىشكى ىستەر دەپارتامەنتى قىلمىستىق كودەكسىنىڭ 304-بابى «سانيتارلىق قاعيدالاردى نەمەسە گيگيەنالىق نورماتيۆتەردى بۇزۋ» بويىنشا قىلمىستىق ءىس قوزعاپ، بىرنەشە ساراپتامالار تاعايىنداعان بولاتىن.