ق ر مادەنيەت جانە سپورت مينيسترلىگى تاپسىرىسى بويىنشا تۇسىرىلگەن «تالان» كوركەم ءفيلمى يراننىڭ تەگەران قالاسىندا ءساۋىردىڭ 19-ى مەن 27ء-ى ارالىعىندا وتەتىن 36ء-شى حالىقارالىق فادجر كينوفەستيۆالىنىڭ «شىعىس پانوراماسى» باعدارلاماسىنا  قاتىسادى.

بەلگىلى رەجيسسەر بولات قالىمبەتوۆ تۇسىرگەن اتالمىش فيلمدە جيىرماسىنشى عاسىردىڭ 30-شى – 40-شى جىلدارداعى ەل تاريحىندا ورىن العان وقيعالار قاراپايىم ادامداردىڭ ءومىرى ارقىلى باياندالادى. ءفيلمنىڭ سەناريى جازۋشى  جۇسىپبەك قورعاسبەكتىڭ «قاسقىر-ادام» پوۆەسىنىڭ جەلىسى بويىنشا جازىلعان. 

- ءساۋىر ايىنىڭ ورتاسىندا تەگەرانعا جول تارتامىن، يران كورەرمەندەرىنە «تالان» ءفيلمىن تانىستىرامىن. «فادجر» سىندى بەلدى كينوفەستيلدە كارتينانىڭ الەمدىك پرەمەراسى وتەتىنىنە وتە قۋانىشتىمىن، - دەدى رەجيسسەر بولات قالىمبەتوۆ.

بيىل فەستيۆالدىڭ «شىعىس پانوراماسى» بايقاۋىنا 12 ەلدىڭ  – جۇڭگو، ۆەتنام، ءازىربايجان، يراك، گرۋزيا، ءۇندىستان، پالەستينا، جاپونيا، موڭعوليا، كۋۆەيت جانە سيريانىڭ فيلمدەرى قاتىسادى. 

 «فادجر» كينوفەستيۆالىندە «قازاقفيلم» كينوستۋدياسىنىڭ قاتىسۋىمەن تۇسىرىلگەن تاعى دا ءبىر كينوتۋىندى – «اكەگە قوڭىراۋ شالۋ» ءفيلمى كورسەتىلەدى. اتالمىش كارتينا فەستيۆالدىڭ نەگىزگى حالىقارالىق كونكۋرسىندا ب ا ق سىنايدى. ايتا كەتسەك، رەجيسسەر سەرىك اپرىموۆ «فادجر» فەستيۆالىنە وسىدان 27 جىل بۇرىن قاتىسقان. 1991 جىلى رەجيسسەر تۇسىرگەن «سوڭعى ايالداما» اتتى دەبيۋتتىق كارتينا «فادجر» فەستيۆالىنىڭ نەگىزگى بايقاۋىنا قاتىسىپ، «ۇزدىك فيلم» جۇلدەسىن العان بولاتىن.

ەستەرىڭىزگە سالا كەتسەك، «اكەگە قوڭىراۋ شالۋ» ءفيلمى قازاقستان كينوسىنشىلار قاۋىمداستىعى ۇيىمداستىرعان «سىنشىلار تاڭداۋى» كينوجۇلدەسىندە ەكى بىردەي جۇلدەگە – «ۇزدىك رەجيسسەر» جانە «ەكىنشى پلانداعى ۇزدىك ەر ادام ءرولى» (اكتەر ەربولات وسپانقۇلوۆقا تابىستالدى) قول جەتكىزدى. ودان بولەك، اتالعان تۋىندى رەسەيدىڭ «نيكا» اتتى كينوجۇلدەسىنە ۇمىتكەر بولعان. سونىمەن قاتار اتالعان فيلم  2018 جىلى ءساۋىردىڭ 19 مەن 26 ارالىعىندا ماسكەۋدە وتەتىن  40-شى ماسكەۋ حالىقارالىق كينوفەستيۆالىندە  «شەبەرلەر» باعدارلاماسىندا كورسەتىلەتىن بولادى.

فادجر حالىقارالىق فەستيۆالى 1982 جىلى يراننىڭ مادەنيەت مينيسترلىگى جانە يسلام باعىتى ۇيىمىمەن نەگىزى قالانعان. فەستيۆال قيىر شىعىستاعى ەڭ اۋقىمدى ءارى تانىمال كينوفەستيۆال ەسەپتەلەدى. بۇل فەستيۆال اياسىندا الەم كينەماتوگرافيستەرى مادەني بايلانىس ورناتا الاتىن بىردەن ءبىر الاڭ.

بىلتىر 2017 جىلى «فادجر» كينوفەستيۆالىنىڭ «ۇزدىك ازيالىق ءفيلمى» نوميناسياسىندا باس جۇلدەنى «قازاقفيلم» كينوستۋدياسى جارىققا شىعارعان رەجيسسەر ءسابيت قۇرمانبەكوۆتىڭ «ورالمان» ءفيلمى العان بولاتىن.

«فادجر» كينوفەستيۆالىنىڭ بيىلعى جەڭىمپازدارىن فەستيۆالدىڭ جابىلۋ سالتاناتىندا – 2018 جىلى 27 ساۋىردە جاريالاناتىن بولادى.

«تالان» ءفيلمى تۋرالى:

تاعدىردىڭ جازۋىمەن بار ءومىرىن ەلدەن جاسىرىن وتكىزگەن ادامنىڭ ورتامەن بايلانىسى اقىرى تراگەديامەن اياقتالادى. وسىنداي تالايلى تاعدىرلار ارقىلى ازاتتىق اڭساعان اتا-بابالارىمىزدىڭ ارمانى   –  تاۋەلسىزدىكتىڭ قادىر-قاسيەتى كورىنەدى. تالان – تاعدىردىڭ ءسينونيمى.
رەجيسسەرى: بولات قالىمبەتوۆ
سەناريي اۆتورلارى: عازيز ناسىروۆ، بولات قالىمبەتوۆ
رولدەردە: اسان كيركاباكوۆ، ەرىك جولجاقسىنوۆ، شىنار جانىسبەكوۆا، ەرجان نۇرىمبەت، ۇلان ءنۇسىپالى، وڭداسىن بەسىكباسوۆ، جاسۇلان ايتەنوۆ، قارشىعا الىكەنوۆ، ايان ءومىرجان.