وڭتۇستىك قازاقستان وبلىسىندا 2018-2025 جىلدارعا ارنالعان الەۋمەتتىك-ەكونوميكالىق دامۋ تۇجىرىمداماسى تالقىلاندى. وبلىس اكىمى جانسەيىت تۇيمەبايەۆتىڭ توراعالىعىمەن وتكەن القالى جيىندا تۇركىستان قالاسىنىڭ اكىمى تاجىبەك مۇسايەۆ قالانىڭ دامۋ كوپسەپسياسىمەن تانىستىردى، دەپ حابارلايدى قازاقپارات.
قالا اكىمىنىڭ سوزىنشە، تۇركىستاندا بيىل جالپى وڭىرلىك ءونىم كولەمى 125 524،8 ملن تەڭگەنى قۇراپ، 7 پايىزعا ارتتىرۋ جوسپارلانۋدا. ال، 2025 جىلعا بۇل كورسەتكىشتى 227 825،5 ملن تەڭگەگە جەتكىزۋ كوزدەلىپ وتىر.
«تۇران جەرىندە ءتۋريزمدى دامىتۋ ءۇشىن 2018 جىلى 3 جۇلدىزدى قوناق ءۇي، 2000 ادامعا ءتۇرلى قىزمەت كورسەتۋ مۇمكىندىگى بار «Mega city» ويىن-ساۋىق كەشەنى مەن 100 ادامعا ارنالعان سپورت ساۋىقتىرۋ كەشەنىن ىسكە اسىرۋ كوزدەلۋدە. قالا تۇرعىندارىن تازا اۋىز سۋمەن قامتاماسىز ەتۋ بويىنشا بيىل جالپى 5 نىساننىڭ قۇرىلىسىنا 821،6 ملن تەڭگە ءبولىنىپ، 2018-2019 جىلدارى پايدالانۋعا بەرىلەدى. 2025 جىلعا دەيىن تۇركىستان قالاسىندا جانە ەلدى مەكەندەردە حالىقتىڭ تابيعي گازبەن قامتاماسىز ەتۋ كورسەتكىشى 99،9 پايىزعا جەتكىزۋ جوسپارلانىپ وتىر»، - دەدى تاجىبەك مۇسايەۆ.
اكىم سونداي-اق تۇرعىن ءۇي سالاسىندا بيىلعى جىلى 20 كوپقاباتتى تۇرعىن ءۇيدىڭ قۇرىلىسى جۇرگىزىلەتىنىن جەتكىزدى. ونىڭ ايتۋىنشا، 2019-2025 جىلدار ارالىعىندا تۇركىستان قالاسىندا بيۋدجەت ەسەبىنەن جالپى 280 مىڭ شارشى مەتر ارەندالىق تۇرعىن ءۇي سالىنىپ، 4 800 وتباسىعا پايدالانۋعا بەرىلەتىن بولادى. ال، كەنتاۋ قالاسىنىڭ 2018-2025 جىلدارعا ارنالعان دامۋ كونسەپسياسىن تانىستىرعان قالا اكىمى ءابدىباقىت ماقۇلبايەۆ شاھاردىڭ دامۋ كونسەپسياسى 4 باعىتتا ىسكە اسىرىلاتىن ايتتى.
«اۋەلگى باعىت - ونەركاسىپ سالاسىن دامىتۋ، شاعىن جانە ورتا كاسىپكەرلىكتى ىلگەرىلەتۋ، سونداي-اق اۋىل شارۋاشىلىعى سالاسى جانە الەۋمەتتىك نىسانداردىڭ جانە ينجەنەرلىك ينفراقۇرىلىمداردى جاڭعىرتۋ. ماسەلەن، كەنتاۋدا جالپى 2018-2025 جىلدارى ونەركاسىپ سالاسىندا جوبالىق قۇنى 55،5 ملرد تەڭگەنى قۇرايتىن 9 ينۆەستيسيالىق جوبانى ىسكە اسىرۋ كوزدەلۋدە. 2018 جىلى شاعىن ورتا بيزنەس سالاسىندا 760،0 ملن تەڭگەگە 151 جوبا قارجىلاندىرىلىپ، 265 ادام جۇمىسپەن قامتىلاتىن بولادى»، - دەدى ءابدىباقىت ءتىللاباي ۇلى.
قالا اكىمىنىڭ مالىمدەۋىنشە، جىل سوڭىنا دەيىن قالا جانە اۋىل حالقى تولىق ورتالىقتاندىرىلعان تازا سۋمەن قامتىلاتىن بولادى. تابيعي گازبەن قامتاسىز ەتۋ ءۇشىن 2018 جىلدان باستاپ ىشكى ورام جۇيەلەرىنىڭ قۇرىلىسى جۇرگىزىلىپ، 2021 جىلعا دەيىن قالا جانە اۋىل تۇرعىندارى 100 پايىز تابيعي گازبەن قامتۋ جوسپارلانۋدا.
«وڭىرلەردى دامىتۋ - 2020» جانە «نۇرلى جەر» مەملەكەتتىك باعدارلامالارى اياسىندا 2018-2025 جىلدارى ءبىر تيپتىك ۇلگىدەگى 5-قاباتتى 60 پاتەرلى 37 تۇرعىن ءۇيدىڭ قۇرىلىسىن جۇرگىزىلىپ، تۇرعىن ۇيگە مۇقتاج، كەزەكتە تۇرعان 2 220 وتباسى كوممۋنالدىق تۇرعىن ۇيمەن قامتىلادى.
تۇركىستان، كەنتاۋ قالالارىنىڭ دامۋ كوپسەپسياسىن تىڭداعان وبلىس اكىمى قالا اكىمدەرىنە جوبانى ناقتى جۇزەگە اسىرۋ ءۇشىن الە دە زەرتتەپ، زەردەلەۋ جۇمىستارىن تاپسىردى.
