ەلوردادا ەرلىك كۇنىنە ارنالعان ەسكە الۋ شاراسى ءوتتى. استاناداعى «وتان – انا» مونۋمەنتىنىڭ ىرگەسىندە ورنالاسقان 1995 جىلدىڭ 7 ساۋىرىندە قازاقستان رەسپۋبليكاسى ءىىم ىشكى اسكەرلەرىنىڭ (ۇلتتىق ۇلانىنىڭ) تاجىك-اۋعان شەكاراسىندا ەرلىكپەن قازا تاپقان جاۋىنگەرلەرىنە ارنالعان ەسكەرتكىشكە گۇل شوقتارىن قويىپ، ەرلىككە تاعزىم جاساۋعا ۇلتتىق ۇلان باسشىلىعى مەن جەرگىلىكتى اتقارۋشى بيلىك ورگاندارىنىڭ، اسكەري ارداگەرلەر مەن قوعامدىق ۇيىم وكىلدەرى جانە استانا قالاسىنداعى №25 مەكتەپتىڭ كادەت سىنىبىنىڭ وقۋشىلارى قاتىستى، دەپ حابارلايدى Qamshy.kz اقپارات اگەنتتىگى ق ر ۇلتتىق ۇلانىنىڭ باسپا ءسوز قىزمەتىنە سىلتەمە جاساي وتىرىپ.

سونداي-اق، شارا اياسىندا ۇلتتىق ۇلاننىڭ استانا گارنيزونىنىڭ جەكە قۇرامى سالتاناتتى شەرۋدە ساپ تۇزەپ، 23 جىل بۇرىن تاجىك-اۋعان شەكاراسىنداعى شايقاستا كوز جۇمعان ساربازداردى ءبىر مينۋت ۇنسىزدىكپەن ەسكە الىپ، ەرلىكتىڭ ۇلگىسىنە اينالعان ازاماتتار جايلى ەستەلىكتەر ايتىلدى.

سالتاناتتى جيىندا الدىمەن ءسوز العان قازاقستان رەسپۋبليكاسى ۇلتتىق ۇلانى باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور مۇحامەتقالي ساتوۆ ءوز وتانىنان شالعايداعى وزگە ەلدىڭ شەكاراسىن كۇزەتە ءجۇرىپ، جانىن پيدا ەتكەن ساربازدار تاۋەلسىز قازاقستاندى ەكسترەميزم مەن تەرروريزمنىڭ قاۋىپ-قاتەرىنەن قورعاعاندىعىن كوپشىلىكتىڭ قاپەرىنە سالدى.

– ياعني، ولار تاۋەلسىزدىگىمىزدىڭ نىعايۋ جولىنا ءوز ومىرلەرىن ارنادى. حالىقارالىق دەڭگەيدەگى قۇجاتتامالىق كەلىسىمگە ساي، ءبىزدىڭ ساربازدارىمىز تاجىك-اۋعان شەكاراسىن قىراعىلىقپەن كۇزەتىپ، باۋىرلاس ەلدىڭ تىنىشتىعىن قورعادى، ءوز ەلىمىزدىڭ قاۋىپسىزدىگىن ساقتادى. ەرلىكتىڭ جارقىن ۇلگىسىنە اينالعان ەرجۇرەك باتىرلارىمىزدى ءبىزدىڭ وتانداستارىمىز ەشقاشان ۇمىتپايدى. وسى كۇنى ۇلتتىق ۇلاننىڭ بارلىق بولىمدەرىندە 17 ساربازدىڭ رۋحىنا تاعزىم ەتكەن ءتۇرلى ءىس-شارالار ۇيىمداستىرىلۋدا. سونداي-اق، بيىل «ىشكى ىستەر ورگاندارى قىزمەتشىلەرىن الەۋمەتتىك قولداۋ قورى» ارقىلى مارقۇم بولعان ساربازداردىڭ وتباسىلارىن 100 مىڭ تەڭگە شاماسىندا قارجىلاي كومەك كورسەتۋدى قولعا الدى. وسىلايشا، ماتەريالدىق-مورالدىق قولداۋ ارقىلى ءبىزدىڭ مەملەكەتىمىز وتان قورعاۋ جولىندا باقيلىق بولعان باتىرلارىمىزدى جاس بۋىنعا ۇلگى-ونەگە ەتۋدە. تاعزىم ەتۋ ارقىلى جاستاردى ەلىن، جەرىن سۇيۋگە باۋليتىن مۇنداي شارالار مەملەكەت باسشىسى جاريالاعان «بولاشاققا باعدار: رۋحاني جاڭعىرۋ» ماقالاسىندا كورسەتىلگەن باعىت-باعدارمەن ءوزارا ۇندەس. كەلەشەكتە ءبىز وسىنداي ءىس-شارالار لەگىن ۇيىمداستىرۋدى جالعاستىراتىن بولامىز»، – دەدى م.ساتوۆ.

سونداي-اق، ەسكە الۋ جيىناندا ءوز ويىن بىلدىرگەن ازاماتتاردىڭ قاتارىندا قازاقستاندىق ءىىو مەن ۇلتتىق ۇلان ارداگەرلەرى كەڭەسىنىڭ ءتوراعاسى ميليسيا گەنەرال-مايورى ءومىرزاق بولسامبەكوۆ، «ق ر ىشكى ىستەر ورگاندارى قىزمەتكەرلەرىن الەۋمەتتىك قولداۋ قورىنىڭ» ءتوراعاسى كەمەل جۇماشيەۆ، 1995 جىلعى 7 ءساۋىر كۇنگى وقيعانىڭ قاتىسۋشىسى، تاجىك-اۋعان شەكاراسىندا قىزمەت اتقارعان ۇلتتىق ۇلان ارداگەرى قايرات ساتبايەۆ پەن استانا قالاسى № 25 ورتا مەكتەبى كادەت سىنىبىنىڭ وقۋشىسى جاندوس قۇمىرزاق بولدى.