ءورت قاۋىپسىزدىگى جونىندەگى مەملەكەتتىك باعدارلامالاردى ىسكە اسىرۋدىڭ اياسىندا بۇگىن  «MEGA Silk Way»، «سارىاركا» جانە «ازيا پارك» ساۋدا ويىن-ساۋىق ورتالىقتارىندا «قاۋىپسىزدىك مەكتەبى اكسياسى جۇرگىزىلىپ جاتىر، دەپ حابارلايدى ەلوردا اكىمدىگىنىڭ رەسمي سايتى. 

شاراعا 13-14 جاستاعى 500-گە تارتا مەكتەپ وقۋشىسى قاتىسۋدا. ولاردىڭ جارتىسى «MEGA Silk Way» ساۋدا ويىن-ساۋىق ورتالىعىندا ءوتىپ جاتقان اكسيادا ءوز ءبىلىمىن ورتاعا سالىپ جاتىر. 

ساۋدا ويىن-ساۋىق ورتالىعىندا ەلوردانىڭ № 1، 3، 6، 15، 45 جانە № 54 مەكتەپتەرىنىڭ وقۋشىلارى قاۋىپسىزدىك ەرەجەلەرىن قانشالىقتى بىلەتىندەرىن كورسەتۋدە. ەڭ كىشكەنتاي كەلۋشىلەر ءۇشىن ەكى كەزەڭنەن تۇراتىن كۆەست-ويىن ۇيىمداستىرىلدى. 

ويىنعا 10 ادامنان تۇراتىن 6 كوماندا قاتىسىپ جاتىر. العاشقى كەزەڭدە كوماندالار «قۇتقارۋشىلار» ءرولىن سومدادى. ويىن بارىسىندا قاتىسۋشىلار ءوز ءبىلىمىن جاقسى كورسەتە الىپ، العاشقى مەديسينالىق كومەك كورسەتۋ كەزىندە تاپقىرلىق تانىتتى.

ەكىنشى كەزەڭدە قاتىسۋشىلار «زارداپ شەگۋشىلەر» بولدى. بۇل كەزەڭدە ولار سوسو نىساندارىنا بارىپ، ءتيىستى تاپسىرماسىن ورىنداپ، ءقاۋىپسىز الاڭدار مەن شىعۋ ەسىكتەرىن ىزدەدى.

ويىن باعدارلاماسىنىڭ ۇزاقتىعى ەكى ساعاتتى قۇرايدى. وسى ۋاقىت ارالىعىندا بالالار ءوز ەپتىلىگىن، زەرەكتىگى مەن جوسىعى، ءبىلىمى مەن قابىلەتتەرىن تانىتىپ قانا قويماي، اپاتتى جاعدايدا ءوزىن-وزى قالاي ۇستاۋ قاعيدالارىن مەڭگەردى. 

مەكتەپ وقۋشىلارى مۇنداي شارالاردىڭ پايدالى دا قىزىقتى ەكەندىگىن اتاپ وتەدى. 

«مەن مۇندا توتەنشە جاعداي ورىن العاندا ءوز-وزىمدى دۇرىس ۇستاۋ قاعيدالارىن مەڭگەرىپ، كوماندادا جۇمىس ىستەۋدى ۇيرەندىم. ءبىز باسقالارعا ۇلگى بولا الا الامىز دەپ ويلايمىن. مەكتەپ وقۋشىلارى ءۇشىن وسىنداي شارانىڭ ۇيىمداستىرىلعانى قۋانتادى»، -دەيدى № 6 مەكتەپ-گيمنازيانىڭ 8 سىنىپ وقۋشىسى اسىلحان جاباعين. 

ويىن اياقتالعان سوڭ، شارا قوناقتارىنىڭ الدىندا م. وتەمىسوۆ اتىنداعى مەكتەپ وقۋشىلارى سارايىنىڭ شىعارماشىلىق توبى مەن ەلوردالىق ارتىستەرى ونەر كورسەتتى.

استانا قالاسىنىڭ تجد قولداعان شارا ەلوردا اكىمدىگىنىڭ باستاماسىمەن «ءبىز ءقاۋىپسىز قالا ءۇشىن» اكسياسى اياسىندا وتۋدە.