بۇگىن اقوردادا ءبىرقاتار شەت مەملەكەتتەردىڭ قازاقستانداعى توتەنشە جانە وكىلەتتى ەلشىلەرى ق ر پرەزيدەنتى نۇرسۇلتان نازاربايەۆقا سەنىم گراموتالارىن تابىستادى، دەپ حابارلايدى Qamshy.kz اقپارات اگەنتتىگى.
ەلباسى رف-نىڭ قازاقستانداعى ەلشىسى الەكسەي بوروداۆكين، وزبەكستان ەلشىسى سايديكرام نيازحودجايەۆ، تۇركىمەنستان ەلشىسى تويلى كومەكوۆ جانە يتاليانىڭ قازاقستانداعى توتەنشە جانە وكىلەتتى ەلشىسى پاسكۋالە د’اۆينودان سەنىم گراموتالارىن قابىلدادى.
شارا بارىسىندا شەت مەملەكەتتەردىڭ ەلشىلەرى ق ر پرەزيدەنتىنە سەنىم گراموتالارىن تابىستاۋ ۇلكەن قۇرمەت ەكەنىن ايتىپ، العىستارىن جەتكىزدى.
نۇرسۇلتان نازاربايەۆ، ءوز سوزىندە قازاقستان شيرەك عاسىر ىشىندە ديپلوماتيالىق جۇيەسى ورنىققان، ازاماتتىق قوعامى كەمەلدەنگەن، ەكونوميكاسى دامىعان مەملەكەتكە اينالعانىن باسا ايتتى.
«قوش كەلدىڭىزدەر! بارشاڭىزدى قازاقستانداەعى جاڭا ديپلوماتيالىق ميسسيالارىڭىزدىڭ رەسمي باستالۋىمەن شىن جۇرەكتەن قۇتتىقتايمىن. جاۋاپتى ءارى مارتەبەلى مىندەتتەرىڭىز ەلدەرىمىزدىڭ اراسىنداعى ىنتىماقتاستىقتى ودان ءارى دامىتۋعا سەرپىن بەرەدى دەپ سەنمىن. سىزدەردىڭ ديپلوماتيالىق قىزمەتتەرىڭىز مازمۇندى ءارى ماڭىزدى وقيعالارعا تولى كەزەڭدەردە بولعالى تۇر. قازاقستان شيرەك عاسىر ىشىندە دەموكراتيالىق جۇيەسى ورنىققان، ازاماتتىق قوعامى كەمەلدەنگەن، دامىعان مەملەكەتكە اينالدى دەپ سەنىممەن ايتا الامىز. قازاقستان حالىقارالىق بايلانىستارىن دامىتۋ ءۇشىن كوپجاقتى سىرتقى ساياسي باعىتىن جالعاستىرا بەرەتىن بولادى»، - دەپ اتاپ ءوتتى ەلباسى.
سونىمەن قاتار، ەلباسى بەيبىتشىلىك پەن قاۋىپسىزدىكتى جانە حالىقارالىق قۇقىق نەگىزدەرىن نىعايتۋدى كوزدەيتىنىن جەتكىزدى. بۇعان قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە اتقارىپ كەلە جاتقان جۇمىستارىنىڭ ناتيجەسى دالەل بولا الاتىنىن دا ايتىپ ءوتتى.
ق ر پرەزيدەنتىنىڭ ايتۋىنشا، قازاقستان حالىقارالىق كۇن تارتىبىندەگى وزەكتى ماسەلەلەردى، شيەلەنىستەردى شەشۋگە ءوز ۇلەسىن قوسىپ كەلە جاتىر. ولاردىڭ ءبىرى – سيرياداعى جاعدايدى بەيبىت جولمەن شەشۋ ماسەلەسى.
«سيرياداعى شيەلەنىستى تارقاتۋ ىسىندە استانا پروسەسى ماڭىزدى رولگە يە بولىپ، ايتۋلى شارالاردىڭ بىرىنە اينالدى. قازاقستان ەۋرازيالىق ەكونوميكالىق وداق، شانحاي ىنتىماقتاستىق ۇيىمى، تمد، ۇجىمدىق جانە قاۋىپسىزدىك تۋرالى شارت ۇيىمدارىنىڭ ءىس-قيمىلدارىنا ەرەكشە ءمان بەرەدى»، - دەدى نۇرسۇلتان نازاربايەۆ.
ءسوزىنىڭ سوڭىندا ەلباسى شەت ەلدەردىڭ قازاقستانداعى ەلشىلەرىنە العىس ايتىپ، جۇمىستارىنا تابىس پەن ساتتىلىك تىلەدى.
