قازاقستان مۇسىلماندارى ءدىني باسقارماسىنىڭ ءتوراعاسى سەرىكباي قاجى ساتىبالدى ۇلى اتىراۋ وبلىسىنا جاساعان رەسمي ساپارى اياسىندا ماقات اۋدانى دوسسور ەلدىمەكەنىنە باردى، دەپ جازادى Qamshy.kz قمدب باسپا ءسوز قىزمەتىنە سىلتەمە جاساپ.

اۋىلداعى مەشىت جۇمىسىمەن تانىسىپ، تۇرعىندارمەن سۇحباتتاستى. ماقات اۋدانىنىڭ اكىمى بەرىكقالي جولان ۇلى باس مۇفتيگە ءوڭىردىڭ تىنىس-تىرشىلىگى مەن قازىرگى ءدىني احۋال تۋرالى اڭگىمەلەپ بەردى.

«ءبىز ەلدىڭ شەتىن جاۋدان قورعاپ، حالىقتى ىزگىلىككە ۇيىتقان كەشەگى ەرجۇرەك ماحامبەت، يساتاي سىندى بابالاردىڭ بۇگىنگى ۇرپاعىمىز. ءباھادۇر بابالارىمىز وسىناۋ ۇلانعايىر جەردى بىزگە اماناتتاپ كەتتى. دەمەك، مەملەكەت تىنىشتىعىنىڭ مىعىم بولۋىنا ۇلەس قوسىپ، حالىقتى ىنتىماققا باستاۋ – ءار ازاماتتىڭ اسىل بورىشى. ءبىز ىزگى ىستەرىمىزبەن عانا تاريحتا قالامىز. بىرلىك بولماعان جەردە بەرەكە كەتەدى. اللاعا شۇكىر، مەشىتتەرىمىز اشىق، مەدرەسەلەرىمىز جۇمىس ىستەپ تۇر. وسىنىڭ ءبارى اللانىڭ بەرگەن ۇلكەن نىعمەتى. حالقىمىزدا: «باعالاماساڭ ب ا ق كەتەدى»، – دەگەن جاقسى ءسوز بار. بارىمىزدى باعالاپ، بىر-بىرىمىزگە قامقورشى بولىپ جۇرەيىك»، – دەدى سەرىكباي قاجى وراز.

كەزدەسۋ سوڭىندا باس ءمۇفتي اۋدان باسشىسى بەرىكقالي جولانۇلىنا «ۇلى دالا توسىندەگى يسلام» اتتى كىتابىن سىيعا تارتتى.

قمدب ءتوراعاسى س.ساتىبالدى ۇلى جەرگىلىكتى يمامدارعا ناقتى تاپسىرمالار بەرىپ، ەلگە قىزمەت ەتۋدە بەلسەندىلىك تانىتۋعا شاقىردى.