الماتىلىق يۋليا ششەگلوۆا الەۋمەتتىك جەلى ارقىلى حابارلاما تاراتىپ، بالاسىن 20 مىڭ اقش دوللارىنا ساتپاق بولادى. 5 ساۋىردە ماسكەۋگە كەلىپ، كەلىسىم بويىنشا بالانى وزگەنىڭ قولىنا بەرۋگە بەل بايلاپتى. ال يۋليانىڭ اناسى بارلىق جاعدايدى بولار ءىس بولعاننان سوڭ ەستىگەنىن ايتادى، دەپ حابارلايدى كتك-عا سىلتەمە بەرىپ Qamshy.kz اقپارات اگەنتتىگى.

"ەكىنشى ساۋىردە ۇيدە بولعان. ءبىراق، ۇيگە كەلسەك الدەنەگە اسىققانى بايقالادى. تەلەديدار قوسۋلى قالعان. تاماعى ىشىلمەگەن. ونىڭ قاشان رەسەيگە كەتكەنىن، نە ءۇشىن مۇنداي قادامعا بارعانىن بىلمەيمىن. و جاقتان حابار جەتكەندە، تالىپ قالا جازدادىم"، — دەيدى يۋليا ششەگلوۆانىڭ اناسى ليۋبوۆ زايسيەۆا.  

يۋليا ششەگلوۆا جۇكتىلىكتىڭ 3 ايلىق كەزەڭىندە كۇيەۋىمەن اجىراسقان ەكەن. وعان قولداۋ ءبىلدىرىپ، جاردەمدەسكەن جاندار يۋليا بوسانعان سوڭ قاتتى كۇيزەلىسكە ۇشىراعانىن ايتادى. 

"ەستىگەندە ەسەڭگىرەپ، تۇنىمەن ۇيىقتاماي شىقتىم. ءبارىمىز بىر-بىرىمىزگە حابارلاسىپ، بولعان جايتتىڭ اقيقاتتىعىنا كوز جەتكىزدىك. ءبىز وعان سەنىپ، ءۇمىت ارتقان ەدىك. ۇلىنا قاجەتتى دارى-دارمەك، كيىم-كەشەك بولسىن، بارلىعىن وعان تاپسىرعانبىز. شىندىعىندا ەشتەڭەگە مۇقتاج ەمەس بولاتىن"، — دەيدى الماتى قالاسىنىڭ تۇرعىنى انيتا گۋرمان.

ال، بالاسىن ساۋدالاعان بەزبۇيرەك كەلىنشەكتىڭ بۇرىنعى كۇيەۋى ءقازىر ماسكەۋگە اتتانىپتى. ودان جاۋاپ الىنىپ، جابىرلەنۋشى رەتىندە تانىلعان. ال تەرگەۋ وكىلدەرى بارلىق قۇجاتتارمەن تانىسقان سوڭ، بالانى اكەسىنىڭ قولىنا بەرگەن.

33 جاستاعى يۋليا ششەگلوۆانىڭ ارەكەتىن قارجىلىق قيىنشىلىقتان دەپ بولجاعاندار دا بار. ءبىراق الماتىدا تۇراتىن اناسى "بىزگە باسىنداعى احۋالدى ايتقاندا قىزىمىزدى كەز كەلگەن قيىندىقتان قۇتقاراتىن ەدىك" دەيدى. ءقازىر قازاقستاندىق ازاماتشاعا ادام ساۋدالاۋ بابى بويىنشا قىلمىستىق ءىس قوزعالىپ، قولىنا كىسەن سالىنعان.