قوعامدىق باقىلاۋ كوميسسياسىنىڭ (قبك) پاۆلودار وبلىسىنداعى ءتوراعاسى ناتاليا كوۆلياگينا 13 ساۋىردە ول كوميسسيانىڭ 12 مۇشەسىمەن بىرگە پاۆلودارداعى رەسپۋبليكالىق ورتالىق سوماتيكالىق اۋرۋحانادا (پاۆلودارداعى اپ-162/2 مەكەمەسى، تۇرمە سانيتارلىق قالاشىعى) جاتقان بەلسەندى ماكس بوقايەۆقا بارعان دەپ جازادى Qamshy.kz اقپارات اگەنتتىگى ازاتتىققا سىلتەمە جاساپ. بوقايەۆ بۇل جەرگە ءبىر كۇن بۇرىن پەتروپاۆلدان بولجام بويىنشا قويىلعان «ومىرتقا جارىعى» دياگنوزىنان ەمدەلۋگە ەتاپپەن جەتكىزىلگەن.

ءقازىر ماكس بوقايەۆ ءوزىنىڭ دەنساۋلىق جاعدايىن قالىپتى دەپ باعالايدى. قۇقىق قورعاۋشى كوۆلياگيننىڭ ايتۋىنشا، اياعى ءالى ۇييتىن، ءبىراق بۇرىنعىداي قاتتى اۋىرمايتىندىقتان وزدىگىنەن جۇرە الادى. كەشە بوقايەۆتى حيرۋرگ قاراپ، وپەراسيا جاسايتىنداي سەبەپ تاپپاعان. حيرۋرگ بوقايەۆقا ءتۇرلى دياگنوستيكادان ءوتۋدى تاپسىرعان، تۇپكىلىكتى قورىتىندى كەيىنىرەك شىقپاق.

«ماكس بوقايەۆ قىلمىستىق-اتقارۋ جۇيەسىنىڭ ىشىندە ءجۇرىپ وزگە سوتتالۋشىلارعا كەڭەس نەمەسە كومەك بەرىپ، قۇقىق قورعاۋ قىزمەتىمەن اينالىسىپ جاتىر. ول كومەككە مۇقتاج بولعانداردىڭ ەشقايسىسىن نازاردان تىس قالدىرمايدى. بۇعان بۇگىن مەكەمەگە بارعاندا كوز جەتكىزدىك»،  دەدى ناتاليا كوۆلياگينا.

ماكس بوقايەۆتىڭ قارىنداسى جانارگۇل بوقايەۆا ازاتتىققا اعاسىنىڭ ەتاپپەن پاۆلودارعا جەتكىزىلگەنىنەن حاباردار ەكەنىن، ءبىراق ازىرگە جەكە سويلەسە الماعانىن ايتتى. ول مۇمكىندىك بولسا، پاۆلودارعا اعاسىنا بارىپ قايتاتىنىن ايتادى.

قارىنداسىنىڭ سوزىنشە، ماكس بوقايەۆتىڭ ومىرتقاسىندا جارىق بار جانە وزگە دە ءبىرقاتار سىرقاتى بار. ول كۇن سۋىتقاندا جانە دەنساۋلىققا جايسىز وزگە دە جاعدايلاردا ومىرتقاسى قاتتى سىرقىراپ اۋىراتىنىن ايتقان. قارىنداسىنىڭ سوزىنە قاراعاندا، كليماتى قىتىمىر سولتۇستىك قازاقستاننىڭ بيىل قىستاعى قاتتى ايازىندا ماكس بوقايەۆ وزگە تۇتقىندار سياقتى ونى دا تاڭعى جاتتىعۋعا شىعارعان كەزدە ومىرتقاسىنا سۋىق تيگىزىپ العان. ول الگى «پروسەدۋرالاردان» باس تارتقان، ءبىراق سول ءۇشىن بىرنەشە مارتە جازاعا تارتىلىپ، بۇرىن ايىپ كامەراسى (شيزو) دەپ اتالعان تارتىپتىك وقشاۋلاۋ كامەراسى (ديزو) - كارسەردە ۇزاق ۋاقىت وتىرعان. قارىنداسىنىڭ سوزىنشە، سونىڭ سالدارىنان بيىل قىستا ماكس بوقايەۆتىڭ ومىرتقاسىنىڭ سىرقىراۋى كوپكە دەيىن باسىلماعان.

اتىراۋلىق ازاماتتىق بەلسەندىلەر، «جەر ميتينگىسىنە» قاتىسقان ماكس بوقايەۆ پەن تالعات اياندى 2016 جىلعى قاراشادا سوت اتىراۋلىق بەلسەندىلەر «الەۋمەتتىك ارازدىق تۋدىردى»، «جالعان اقپارات تاراتتى» جانە «ميتينگ وتكىزۋ زاڭدارىن بۇزدى» دەپ تانىپ، بەس جىلعا باس بوستاندىقتارىنان ايىرۋعا ۇكىم ەتكەن. ەكى بەلسەندى دە وزدەرىنە تاعىلعان ايىپتىڭ ساياسي استارى بار دەپ مالىمدەپ، ونى مويىنداۋدان باس تارتقان. حالىقارالىق قۇقىق قورعاۋ ۇيىمدارى قازاقستان بيلىگىن تۇرمەدەگى بەلسەندىلەردى بوساتۋعا تالاي مارتە شاقىرعان.