تاراز قالاسىنداعى جەڭىس ساياباعى تۇپكىلىكتى تۇرلەنبەك. باۋىرجان مومىش ۇلى اتىنداعى دەمالىس ورنىندا قۇرىلىس ءجۇرىپ جاتىر. ماڭگىلىك الاۋ مەن مۋزەي، 68 مىن جاۋىنگەردىڭ ەسىمى جازىلاتىن كوركەم كەسەنەلەر جوندەۋ جۇمىستارى بىتكەن سوڭ ساياباق تورىنەن ورىن الماق، دەپ حابارلايدى Qamshy.kz اقپارات اگەنتتىگى.

قۇرىلىسشىلار ەكى اۋىسىمدا جۇمىس ىستەپ، بارلىق شارۋانى مامىرعا دەيىن ءبىتىرۋدى جوسپارلاپ وتىر.

قالانىڭ قاق ورتاسىندا تۇرعان، باۋىرجان مومىشۇلىنا جانە اۋعان سوعىسى ارداگەرلەرىنە ارنالعان ەسكەرتكىشتەر وسى ساياباققا اكەلىنبەك. سونىمەن قاتار بىلعارى كومبيناتى اۋماعىنداعى «ماڭگىلىك الاۋ دا» وسىندا ورنالاساتىن بولادى. ەكىنشى دۇنيەجۇزىلىك سوعىسقا قاتىسقان 68 مىڭ جاۋىنگەردىڭ ەسىمى دە ساياباقتاعى ءمارمار تاسىنا قاشالىپ جازىلماق.

جەڭىس ساياباعىمەن بىرگە كولدەنەڭ جاتقان جانسۇگىروۆ كوشەسى دە اجارلانا تۇسپەك. بۇرىن ەنى 7 مەتر بولعان داڭعىل ەندى 12 مەترگە دەيىن كەڭەيتىلۋدە. قالا تۇرعىندارى ءۇشىن دە، قالاداعى كولىك قوزعالىسى ءۇشىن دە ونىڭ ماڭىزى وراسان زور.

تاراز قالاسىنىڭ اكىمى رۇستەم داۋلەتتىڭ ايتۋىنشا، ساياباق قۇرىلىسىنا 120 جۇمىسشى مەن 30 تەحنيكا جۇمىلدىرىلعان.

— جان-جاقتان بارلىق جوبالاۋشى مەكەمەلەردى، ساۋلەتشىلەردى، مۇسىنشىلەردى شاقىرىپ، سولارمەن كەڭەسە وتىرىپ، ءار جوبانى سول كەڭەستە قاراپ، بەكىتىپ، ارى قاراي سونى جۇمىسقا قوسىپ جاتىرمىز. ساياباقتىڭ ىشىندە قىمىزحانا، بالالار وينايتىن الاڭدار سالىنىپ، جاستاردى پاتريوتتىق سەزىمگە باۋليتىن ارحيتەكتۋرالىق جوبالار دا بوي كوتەرەدى، — دەيدى اكىم.

رۇستەم داۋلەت ساياباق ارقىلى وتەتىن قاراسۋ وزەنىنىڭ جاعالاۋى دا رەتكە كەلتىرىلىپ، ءتۇرلى دەمالىس ورىندارى اشىلاتىنىن ايتادى. ساياباق ىشىندە جاياۋ جۇرگىنشىلەرگە جانە ۆەلوسيپەدكە ارنالعان جولدار پايدا بولماق.  وسىنداي يگى ىستەرگە وبلىستىق بيۋدجەتتەن 370 ملن تەڭگە قاراستىرىلعان. جوسپار بويىنشا جامبىلدىقتار الداعى «جەڭىس كۇنى» مەرەكەسىن وسى ساياباقتا اتاپ وتەدى.