ماسكەۋدە وتكەن اپتانىڭ سوڭىندا تەرەزەدەن قۇلاپ كەتكەن قازاقستاندىق ستۋدەنتتىڭ جاعدايى اۋىر.

توميريس بايسافا – قازاقستاندىق ستيليست جاننا احمەتوۆانىڭ قىزى. اتا-اناسى بولعان وقيعانى ەستي سالا ماسكەۋگە ۇشقان. قىزدارىمەن تەلەفون ارقىلى سويلەسۋگە تىرىسقانىمەن، ءتوميريستىڭ جاعدايى اۋىر بولدى.

«ءبىز ماسكەۋگە جەتە سالا رەسەيدەگى قازاقستان ەلشىلىگىنىڭ قىزمەتكەرلەرى كومەكتەستى. توميريسكە وتا جاسالدى، ءقازىر كومادا جاتىر، جاعدايى اۋىر»، - دەدى اناسى «ۆرەميا» باسىلىمىنىڭ تىلشىسىنە.

ءتوميريستىڭ قۇربىسى ايگەرىم ءاشىموۆانىڭ ايتۋىنشا، ەلشىلىكتىڭ قولداۋىمەن وتا تەگىن جاسالدى. الايدا بولاشاقتا قىزدىڭ تولىق ايىعىپ كەتۋى ءۇشىن اۋرۋحانا ەسىگىن تالاي قاعارى انىق. سول سەبەپتى ايگەرىم ءتيىستى قاراجاتتىڭ جارتىسىن جيناۋ ءۇشىن قازاقستاندىقتاردان كومەك سۇرادى.

ايتا كەتسەك، 13ء-شى ساۋىردە ماسكەۋدە حالىقارالىق قاتىناستار ينستيتۋتىنىڭ ستۋدەنتى،  توميريس بايسافا ءتورتىنشى قاباتتاعى اۋديتوريانىڭ تەرەزەسىنەن قۇلاپ كەتكەن. تۋىستارى مەن دوستارى قىزدى بىرەۋدىڭ يتەرىپ جىبەرگەنىنە سەنىمدى. ازىرگە كۇدىكتى رەتىندە ءتوميريستىڭ داعىستاندىق دوسى ماگومەد كوتييەۆ تانىلدى. رەسەيلىك باق-تىڭ دەرەگىنە سۇيەنسەك، توميريس پەن داعىستاندىق ازاماتتىڭ ۇرسىسىپ تۇرعان ءساتىن كورگەن كۋاگەرلەر بار. دەرەكتەر قىز بەن جىگىتتىڭ اراسىندا دوستىقتان دا جاقىن قارىم-قاتىناستىڭ بولعانىن كەلتىردى. الايدا ماگومەد كوتييەۆ بولعان وقيعاعا قاتىسى جوق ەكەنىن ايتتى. جىگىتتىڭ ايتۋىنشا، توميريس ەكەۋى ارالاسپايدى، ءتىپتى تانىعان دا ەمەس.

قازىرگى ۋاقىتتا قازاقستاندىق قىزعا قاتىستى وقيعانى رەسەيدەگى قازاقستان ەلشىلىگى باقىلاۋىنا الدى.