جاساندى جولمەن ۇرىقتاندىرۋ كەزىندە بالانىڭ جىنىسىن تاڭداۋعا رۇقسات بار. الماتىدا ءدىندارلار كەڭەسى كوپتىڭ كوكەيىندە جۇرگەن وسى ماسەلەگە قاتىستى ءپاتۋا شىعاردى، دەپ حابارلايدى Qamshy.kz اقپارات اگەنتتىگى كتك ارناسى-نا سىلتەمە بەرىپ.

ەكو جاساتۋ كەزىندە ۇل نەمەسە قىز ۇرپاقتى تاڭداپ الۋعا ەندى شاريعات قارسى كەلمەيدى. الايدا، ەرلى-زايىپتى قاتتى ءزارۋ بولعاندا عانا وسى ءادىستى قولدانۋى ءتيىس. ماسەلەن، بولاشاقا اتا-انانىڭ ءبىرى بەدەۋ نەمەسە تۇقىم قۋلايتىن اۋرۋلار بولسا عانا. ويتكەنى، گەنەتيكالىق دەرت كوبىنە ۇل بالاعا بەرىلەدى ەكەن. ال، قىز بالاعا بەرىلمەۋى مۇمكىن. ايتا كەتەرلىگى، ەرلى-زايىپتىلار زاڭ مەن شاريعات الدىندا نەكەدە بولۋلارى ءتيىس. سونداي-اق، بۇگىن عۇلامالار كەڭەسى تۋىلا سالا شەتىنەپ كەتەتىن شاقالاقتاردى جەرلەۋدىڭ ءجون-جورالعىلارىنا دا قاتىستى ءپاتۋا شىعاردى.

– ەگەر تۇسىك بولاتىن بولسا، 12 مۇشەسىنىڭ بەلگىسى بولاتىن بولسا، ولاي بولسا ءبىز تولىققاندى جاڭاعى اتىن ايتىپ، جەرلەۋىمىزگە بولادى. ال، ەگەر دە 12 مۇشەسى دە ءبۇتىن، اعزاسىندا كىشكەنە قىبىرلاعان، ياكي بولماسا، داۋىسى شىعىپ، سونداي بولاتىن بولسا وندا اتىن ايتىپ، جانە جانازا نامازىن وقىپ، جەرلەنەدى دەگەن ءسوز، - دەدى باس ءمۇفتي سەرىكباي قاجى وراز.