18 ساۋىردە ق ر ءدىن ىستەرى جانە ازاماتتىق قوعام ۆيسە-مينيسترى بەرىك ارىننىڭ توراعالىعىمەن ءدىني بىرلەستىكتەرمەن بايلانىس جونىندەگى كەڭەستىڭ وتىرىسى وتكىزىلدى.

وتىرىسقا ءدىني بىرلەستىكتەردىڭ، قازاقستان حالقى اسسامبلەياسىنىڭ، مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى، سونىمەن قاتار ءدىنتانۋشى-عالىمدار، قوعام قايراتكەرلەرى قاتىستى.

كۇن تارتىبىنە سايكەس ينتەرنەت كەڭىستىگىندە ءدىني ەكسترەميزم مەن راديكاليزم يدەيالارىنىڭ تارالۋىنا قارسى ءىس-قيمىل، سونداي-اق قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگىنىڭ، استانا جانە الماتى قالالارى مەن وبلىستاردىڭ اكىمدىكتەرى جانىنداعى ءدىني بىرلەستىكتەرمەن بايلانىس جونىندەگى كەڭەستەردىڭ ءرولىن كۇشەيتۋ جونىندە ۇسىنىستار ازىرلەۋ ماسەلەلەرى قارالدى.

كەڭەس جۇمىسىن اشقان ۆيسە-مينيستر ب. ارىن ەكسترەميزم مەن تەرروريزمگە قارسى العىشارتتاردى انىقتاۋ جانە جويۋ ءۇشىن زاڭنامالىق جۇيەنى، ۇيىمداستىرۋشىلىق بازانى قۇرۋ جانە جەتىلدىرۋ ءۇشىن ايتارلىقتاي جۇمىستار اتقارىلعانىن اتاپ ءوتتى. سونىمەن قوسا ۆيسە-مينيستر ينتەرنەتتەگى راديكالدى يدەيالاردى ناسيحاتتاۋعا قارسى تۇرۋ قاجەتتىلىگىنە نازار اۋداردى.

اتالعان ماسەلەلەر بويىنشا ساراپشىلار دا ءوز ويلارىن ورتاعا سالدى. مادەنيەتتەر مەن دىندەردىڭ حالىقارالىق ورتالىعىنىڭ ديرەكتورى ايدار ءابۋوۆ ينتەرنەت-رەسۋرستاردا ورنالاستىرىلعان ءدىني ماتەريالداردىڭ مازمۇنىنا بايلانىستى زاڭناما تالاپتارىن بۇزۋدىڭ الدىن الۋ بويىنشا جۇمىستار جۇرگىزىلىپ جاتقانىن اتاپ ءوتتى. ونىڭ ايتۋىنشا، 2017 جىلى مينيسترلىك 10744 ينتەرنەت-رەسۋرستىڭ مازمۇنىنا تالداۋ جۇرگىزىپ، ونىڭ ىشىندە زاڭنامالارعا  قايشى كەلەتىن ماتەريالداردى قامتيتىن 3555 ينتەرنەت-رەسۋرستارى انىقتالعان.

ءدىن ىستەرى كوميتەتى ءتوراعاسىنىڭ ورىنباسارى بالعابەك مىرزايەۆ ءوز بايانداماسىندا ورتالىق جانە ايماقتىق دەڭگەيدەگى ءدىني بىرلەستىكتەرمەن بايلانىس جونىندەگى كەڭەستەردىڭ ءرولىن نىعايتۋ جونىندە ناقتى ۇسىنىستارىن ايتتى. ونىڭ ىشىندە كەڭەستىڭ تەك ءدىني عانا ەمەس، سونىمەن قاتار الەۋمەتتىك ماسەلەلەردى شەشۋگە قاتىسۋى، كوشپەلى وتىرىستاردى وتكىزۋ، كەڭەستىڭ سىبايلاس جەمقورلىققا قارسى ارەكەت ەتۋ مۇمكىندىكتەرىن پايدالانۋ ماسەلەلەرى قاراستىرىلادى.

وتىرىسقا قاتىسۋشىلار عالامتور كەڭىستىگىندە ءدىني ەكسترەميزم مەن راديكاليزم يدەيالارىنىڭ تارالۋىنىڭ الدىن الۋ ماقساتىندا مەملەكەتتىك ورگانداردىڭ، ازاماتتىق قوعام مەن بۇقارالىق اقپارات قۇرالدارىنىڭ بىرلەسكەن كۇش-جىگەرىن بىرىكتىرۋ ماڭىزدى ەكەنىن اتاپ ءوتتى. سونىمەن قاتار، كەڭەس مۇشەلەرى ءدىني بىرلەستىكتەرمەن بايلانىس جونىندەگى كەڭەستەردىڭ ءرولىن كۇشەيتۋ، سونداي-اق كونسۋلتاتيۆتى-كەڭەسشى ورگاننىڭ دەڭگەيىن كوتەرۋ جونىندە ۇسىنىستار جاسادى.