قازاقستان بويىنشا مەملەكەتتىك كلينيكالاردى قوسا ەسەپتەگەندە 1380 مەديسينا ۇيىمى حالىققا تەگىن قىزمەت كورسەتەدى. كەپىلدەندىرىلگەن تەگىن مەديسينالىق كومەك پاكەتىنە كىرەتىن قىزمەتتەردىڭ كوپتەگەن تۇرلەرىن ازاماتتار اتالعان ەمدەۋ مەكەمەلەرى ارقىلى الا الادى. بيىلعى جىلى تەگىن پاكەتكە كىرەتىن قىزمەت سانى 1900-گە جۋىقتادى.

قازىرگى تاڭدا دەنساۋلىق ساقتاۋ سالاسىندا اۋرۋدىڭ الدىن الۋ ماسەلەسىنە اسا دەن قويىلىپ وتىر. قازاقستاندىقتاردىڭ باسىم بولىگى جاستايىنان دەنساۋلىعىن كۇتۋگە داعدىلانباعان. ال دەنساۋلىقتى كۇتۋدى  ادەتكە اينالدىرۋ كەرەك، سەبەبى اۋرۋدىڭ الدىن الۋ – دەنساۋلىق نەگىزى.

ستاتيستيكاعا سايكەس، ادامدار سوزىلمالى اۋرۋى ابدەن اسقىنىپ، شۇعىل كومەك قاجەت بولعانعا دەيىن دارىگەرگە قارالمايدى. ەلىمىزدە جىل سايىن 3 ميلليونعا جۋىق ادام اۋرۋحاناعا تۇسەدى. سونىڭ 68 پايىزى نەمەسە 1،9 ميلليونى - دارىگەر كومەگىنە اۋرۋى ابدەن اسقىنعاننان كەيىن جۇگىنگەندەر. ياعني، ءاربىر 10-شى ازامات ومىرىنە ءقاۋىپ تونگەن كەزدە اۋرۋحاناعا تۇسەدى دەگەن ءسوز. ءتىپتى، تەگىن كومەك كورسەتىلگەن كۇننىڭ وزىندە ولار باعاسى قىمبات بولىپ كەلەتىن كۇردەلى پروسەدۋرالارعا قوسىمشا اقى تولەۋگە ءماجبۇر بولادى.

«تيىمدىلىگى جوعارى، كوپ شىعىندى قاجەت ەتپەيتىن دياگنوستيكالىق پروسەدۋرالار ارقىلى اۋرۋدىڭ الدىن الۋعا بولادى. بيىلعى جىلى رەسپۋبليكا بيۋدجەتىنەن دەنساۋلىق ساقتاۋ سالاسىنا بولىنگەن 917 ملرد تەڭگەنىڭ 318 ميللياردى ەمحانالىق-امبۋلاتورلىق كومەككە باعىتتالىپ، پروفيلاكتيكالىق ءىس-شارالارعا باسىمدىق بەرىلدى. جۇيەلى وزگەرىستەر جاساپ، ۇلت دەنساۋلىعىن جاقسارتۋ ءۇشىن بارشامىز پروفيلاكتيكاعا ءمان بەرۋىمىز كەرەك»، - دەيدى «ءامسق» كەاق استانا قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.

جوسپارلى ەم شۇعىل كومەكتەن الدەقايدا ارزانعا تۇسەدى. دەنى ساۋ ادام  قول قۋسىرىپ قاراپ وتىرماي، ورگانيزمىندە قانداي وزگەرىستەر بولىپ جاتقانىن بىلگەنى ءجون. ەگەر قانداي دا ءبىر اقاۋ نەمەسە اۋىتقۋشىلىق تابىلىپ جاتسا، كەپىلدەندىرىلگەن تەگىن مەديسينالىق كومەك شەڭبەرىندە مەملەكەت ەسەبىنەن تەگىن ەمدەلۋگە بولادى.

دەنساۋلىق سالاسى ساراپشىلارىنىڭ پىكىرىنشە، ءولىم-جىتىمنىڭ باستى سەبەپكەرى بولاتىن ءقاۋىپتى 5 اۋرۋ بار. 2017 جىلى ولاردىڭ قاتارىندا مىناداي سىرقاتتار بولدى: قان اينالىمى جۇيەسىنىڭ اۋرۋلارى – 32 مىڭ ادام قايتىس بولعان، تىنىس جولدارىنىڭ اۋرۋلارى – 18 مىڭ، ونكولوگيالىق اۋرۋلار – 16 مىڭ، باقىتسىز جاعدايلار، جاراقاتتار مەن ۋلانۋ – 14 مىڭ، اس قورىتۋ ورگاندارىنىڭ اۋرۋلارى – 12،6 مىڭ.

رەسمي ستاتيستيكا بويىنشا، 2016 جىلى قازاقستاندا وسىنداي اۋرۋلاردان 96،3 مىڭ ادام كوز جۇمعان. ونىڭ 39،7 مىڭى - ەڭبەككە جارامدى جاستاعىلار. ياعني، نەبارى 18 ملن حالقى بار ەلىمىز جىل سايىن "تەپسە تەمىر ۇزەتىن" 40 مىڭعا جۋىق ازاماتىنان ايىرىلىپ وتىر دەگەن ءسوز.

تەگىن ەمدەلۋ مۇمكىندىكتەرى جايلى تولىعىراق - مەديسينالىق ساقتاندىرۋ قورىنىڭ fms.kz سايتىنان وقۋعا بولادى. وندا جەتكىزۋشى كومپانيالار مەن تەگىن كورسەتىلەتىن مەملەكەتتىك قىزمەتتەر ءتىزىمى دە بار.

گۋلزيرا جيبەكەنوۆا