الماتى وبلىسىندا ءاتى-جونى بەلگىسىز جاندار كومىلەتىن بەيىتتە مارقۇمدار دۇرىس جەرلەنبەي، تابىتتار سىرتقا شىعىپ قالعان. مۇنداي سوراقىلىققا نالىعان زيارات ەتۋشىلەر تابىت ىشىندەگى ءمايىتتى قاڭعىعان يت تارتقىلاپ، كۇن ىسىعاندا ءتۇرلى اۋرۋ تاراۋى مۇمكىن دەپ قاۋىپتەنەدى، دەپ حابارلايدى Qamshy.kz اقپارات اگەنتتىگى كتك ارناسىنىڭ دەرەگىن نەگىزگە الا وتىرىپ.

ال، مارقۇمداردى جەرلەۋ ءراسىمى تەندەر ارقىلى جۇرگىزىلەتىنىن ايتقان اكىمدىكتەگىلەر، جىلىنا 2 ميللليون تەڭگە بولىنەتىن جۇمىستان كەتكەن ولقىلىقتى ەندى وزدەرى اتقارۋعا ءماجبۇر ەكەن.

قورىمداعى كورىنىستەن دەنەڭ تۇرشىگىپ، ازا بويىڭ قازا بولادى. وڭدى-سولدى كومىلگەن تابىتتاردىڭ شەتى كورىنىپ، اشىق-شاشىق جاتىر. قارايعان قورشاۋى دا جوق. وكىنىشتىسى، بەيىتتەگى  بەيبەرەكەتسىزدىكتى قۇزىرلى ورىندار ەمەس، اۋەلى زيارات ەتۋشىلەر بايقاعان. 

"مەملەكەتتىك بيۋدجەتتەن قانشا اقشا بولىنسە دە، ادام سەكىلدى جەرلەي الماعان. ماڭايدا جۇرت بار، بالالار ويناپ ءجۇر. قاڭعىعان كەز كەلگەن قازىپ الۋى دا عاجام ەمەس. تابىت توپىراقتان اشىق جاتىر، قالعان جەرى 10-15 سانتيمەتر تەرەڭدىكتە كومىلگەن"، — دەيدى ەۆگەنيي دياگيليەۆ.

"شىندىعىندا مورالدىق تۇرعىدان الساق، ادامگەرشىلىكتەن جۇرداي جانداردىڭ ارەكەتى دەر ەدىم. قايتكەندە دە زيراتقا قارايتىن جاۋاپتى مەكەمە بولۋى كەرەك قوي. ءبىراق، ءبىز جان-جاققا حابارلاسىپ، ەشكىمدى تاپپادىق"، — دەپ كەيىدى  انجەليكا  احمەدوۆا.

مەجدۋرەچەنسك اۋىلدىق وكرۋگىندەگى ارنايى جەرلەۋ ورنى  5 جىل بۇرىن اشىلعان. تاعدىردىڭ جازۋىمەن وسى زيراتتان توپىراق بۇيىرعاندار، الدىن-الا قازىلعان شۇڭقىرعا جەرلەنەدى. ال، بەيىت باسىنا جينالعاندار،  ءارۋاقتى قورلاعاندار جازاسىن الۋى ءتيىس دەپ ەسەپتەيدى. ءبىراق، جەرگىلىكتى اكىمدىكتەگىلەر، بار كىنانى تابيعاتتىڭ توسىن مىنەزىنە ارتىپ قويدى.   

"وزدەرىڭىز بىلەسىزدەر، ءقازىر كوكتەم مەزگىلى. قار جاۋادى، جاڭبىر جاۋادى، جەر وتىرادى. ءوزىمىزدىڭ اكىمدىك تاراپىنان ماماندار كەلىپ، قاراپ تۇرادى. ىستەگەن جۇمىسىنا قاراي اقشاسىن بەرىپ تۇرامىز"، — دەپ ءتۇسىندىردى مەجدۋرەچەنسك اۋىلدىق وكرۋگىنىڭ اكىمى سەرىك ابدىبەكوۆ. 

تالاپ بويىنشا تەندەردەن جەڭىمپاز اتانعان جەكە كومپانيا مارقۇمداردى جەرلەۋ ءراسىمىن ىسكە اسىرىپ كەلىپتى. وعان جىلىنا باقانداي 2 ميلليون تەڭگە ءبولىنىپ وتىرعان. 

قورىمعا تەك ىلە اۋدانىنداعى ءمايىتحانالاردان جەتكىزىلەتىن ءاتى-جونى بەلگىسىز جاندار جەرلەنەدى. جىلىنا ورتا ەسەپپەن 30-عا جۋىق ادام جەر قوينىنا تاپسىرىلادى. ءبىراق، ماڭايداعى تۇرعىندار تابىتى كورىنىپ، اشىق-شاشىق قورىمنان كۇن ىسىعاندا ءتۇرلى اۋرۋ تاراي ما دەپ قورقادى. ال، تەندەردەن ۇتىپ، ءىس ءبىتتى، قۋ كەتتىنىڭ كەرىن كەلتىرگەن كومپانياعا شارا قولدانا المايمىز دەگەن اكىمدىكتەگىلەر، ەندى مارقۇمداردى قايتا كومۋ جۇمىسىن ءوز مويىندارىنا الاتىنىن ايتتى.