بۇگىن ق ر ءدىن ىستەرى جانە ازاماتتىق قوعام ءمينيسترى دارحان كالەتايەۆ جانە استانا قالاسىنىڭ اكىمى اسەت يسەكەشيەۆ استاناداعى اۋليە كيريلل مەن مەفوديي اتىنداعى رۋحاني-مادەني ورتالىقتا بولىپ، قازاقستانداعى ورىس پراۆوسلاۆيە شىركەۋىنىڭ ميتروپوليت وكرۋگىنىڭ باسشىسى، استانالىق جانە قازاقستاندىق ميتريپوليت الەكساندرمەن كەزدەستى، دەپ جازادى Qamshy.kz اقپارات اگەنتتىگى.
ساپار اياسىندا قوناقتار ۋسپەن كافەدرالدى سوبورىنىڭ جۇمىسىمەن تانىسىپ، رۋحاني-مادەني ورتالىق عيماراتىن جانە شىركەۋ مۇراجايىن ارالادى.
كەزدەسۋ بارىسىندا دارحان كالەتايەۆ ورىس پراۆوسلاۆيە شىركەۋىنىڭ قوعامداعى تۇراقتىلىق پەن تىنىشتىقتى ساقتاۋعا، بەيبىتشىلىك پەن كەلىسىمدى نىعايتۋعا قوسقان ۇلەسىن اتاپ ءوتتى.
«پراۆوسلاۆيە شىركەۋى ىزگىلىكتى، قايىرىمدىلىقتى، ءداستۇرلى قۇندىلىقتاردى ناسيحاتتاۋدا مەملەكەتتىڭ سەنىمدى سەرىكتەسى بولىپ تابىلادى. اسىرەسە پراۆوسلاۆيە شىركەۋىنىڭ ءدىنارالىق جانە مەملەكەتتىك-كونفەسسيالىق سۇحباتقا بەلسەندى قاتىسۋى ايرىقشا ماڭىزعا يە»، - دەدى دارحان كالەتايەۆ.
مينيستر كەزدەسۋ بارىسىندا ورىس پراۆوسلاۆيە شىركەۋىنىڭ رۋحاني قۇندىلىقتاردى ساقتاۋعا جانە دامىتۋعا باعىتتالعان ۇسىنىستارىن قولداۋعا دايىن ەكەندىگىن ءبىلدىردى.
ميتروپوليت الەكساندر ءوز كەزەگىندە ۆەدومستۆو باسشىلارىنا شىركەۋدىڭ تىنىس-تىرشىلىگى تۋرالى ايتىپ، ميتروپوليت وكرۋگىنىڭ قىزمەتى مەملەكەت پەن قوعام تاراپىنان ءاردايىم قولداۋ تابىتىنىنا سەنىم ءبىلدىردى.
كەزدەسۋدە قازاقستانداعى پراۆوسلاۆيە دىنىنە قاتىستى كەڭ اۋقىمدى ماسەلەلەر بويىنشا پىكىر الماسۋ بولىپ ءوتتى. ونىڭ قورىتىندىسى بويىنشا تاراپتار سىندارلى ىنتىماقتاستىقتى جالعاستىرۋعا ۋاعدالاستى.
پىكىر قالدىرۋ