الماتىداعى «يۋجنىي» پاركى جاڭاشا تۇرلەنبەك. دەمالىس ورنىن كىلتيپانسىز كەيىپكە كەلتىرۋ كەرەكتىگىن قالا باسشىسى باۋىرجان  بايبەك تاپسىردى. سىننان كەيىن جاۋاپتى ماماندار شۇعىل تۇردە جيىن وتكىزىپ، جەرگىلىكتى تۇرعىنداردىڭ پىكىرىن ەسكەردى. ەندى ساياباقتىڭ جولى جوندەلىپ، سۋ بۇرقاقتار ورناتىلادى. وعان قوسا، ۆەلوجولاق سالىنىپ،  ستاسيونارلى دارەتحانا مەن ورىندىقتار قويىلماق. ال بۇلدىرشىندەر ءۇشىن ارنايى بالالار الاڭقايى اشىلادى. باستىسى، ارىق جۇيەسى رەتكە كەلتىرىلەدى.

«سالاۋاتتى ءومىر سالتىن ساقتايتىن ازاماتتار ساياباقتىڭ ءىشىن دە گيمناستيكالىق جابدىقتار قويۋىمىزدى ءوتىندى. ال يتتەرمەن سەرۋەنگە شىعاتىندار ارنايى ورىننىڭ ءبولىنۋىن سۇرادى. ۇلكەندەر بولسا، قوقىس جاشىگى كوپتەپ قويىلسا دەگەن ءوتىنىش ءبىلدىردى. وسىنىڭ ءبارىن ءبىز ەسكەرەتىن بولامىز»، - دەدى الماتى قالاسى تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ ءبولىم باسشىسى ولجاس جانىسپايەۆ.

ساياباق جاروكوۆ كوشەسىنىڭ شىعىسى مەن حودجانوۆ كوشەسىنىڭ سولتۇستىگىنە قاراي 14،2 گەكتار اۋماقتى الىپ جاتىر. قالانىڭ تابيعي رەسۋرستار جانە تابيعاتتى پايدا­لانۋدى رەتتەۋ باسقارما­سىنىڭ باسشىسى اسەت ماسابايەۆ­تىڭ ايتۋىنشا،  جوباعا سايكەس ساياباقتا جارىق كوزدەرىن جاڭارتۋ، سۋبۇرقاقتار جاساۋ، ورىندىقتار مەن قوقىس جاشىكتەرىن قويۋ، بۇرىن­نان بار ارىقتاردى جاڭارتۋ، سونىمەن قاتار بالالار مەن سپورت الاڭدارىن، ۆەلوجولدار جاساۋ قاراستى­رىلعان. «وڭتۇستىك» سايابا­عىنا ىس-ساپارمەن بارعان شاھار باسشىسى:

– مۇندا حالىقتىڭ بارلىق توپتارىنا – ءسابيدىڭ ارباسىن ءسۇي­رەگەن انالارعا، بالالارعا، تى­نىش­تىقتى قالايتىن ەرەسەك جاندارعا دەمالۋ جايلى بولۋى ءتيىس. بۇل جەر كوڭىل كوتەرەتىن ەمەس، دەمالاتىن ورىن بولۋ كەرەك. مۇندا اسفالتتى الاڭداردى بارىنشا قىسقارتىپ، بۇرىننان بار توتە جانە جىڭىشكە جولداردى قايتا كوگال­داندىرىپ، بارىنشا قولايلى ءارى كولەڭكەلى كەڭىستىك جاساعان ءجون. ۇلكەن ساۋلەت پىشىندەگى ەمەس، شاعىن لوكالدى جارىق كوزدەرىن ورناتۋ قاجەت. سۋ ىشەتىن فونتاندار، ستاسيونارلى دارەتحانالار، ەڭ باستىسى، يتتەردى سەرۋەندەتەتىن ارنايى قورشالعان الاڭ بولۋى مىندەتتى»، – دەدى باۋىرجان بايبەك.

سونداي-اق باۋىرجان بايبەك جۇمىس بارىسىمەن وقۋشىلار سارايى ماڭىنداعى ساياباققا دا دەن قويۋدى قاداپ ايتتى. اكىم وڭتايلاندىرۋ بارىسىندا،  جاسىل جەلەككە كەسىرىن تيگىزبەۋى كەرەكتىگىن ەسكەرتتى.