الماتىداعى «Mercury Propertءىes» ءجشس-نىڭ باس ديرەكتورى ر.قاسى­موۆ ناۋرىز مەرەكەسىنە وراي «جاس­تار ۇيىندەگى» تاربيەلەنۋشى جاس­تارعا جاتتىعۋ زالىن قىمبات قۇرىل­عىلارمەن جابدىقتاپ بەردى.

الەۋمەتتىك مەكەمەلەردىڭ تۇلەكتەرىن بەيىمدەۋ جانە قولداۋ ورتالىعى 2006 جىلدان بەرى «جاستار ءۇيى» دەپ اتاۋىن وزگەرتكەن بولاتىن. مەكەمەدە تاعدىردىڭ ءتۇرلى تاۋقىمەتىمەن جەتىم، اتا-انا قام­قورلىعىنسىز قالعان بالالار ۇيلەرىنىڭ تۇلەكتەرى تاربيەلەنۋدە. 16-17 جاستاعى بالالار مۇندا باسپانامەن، بىلىممەن قامتاماسىز ەتىلىپ، كاسىبي باعدارىن انىقتاۋعا، ومىردەن ءوز ورنىن تابۋعا جول سالادى.

ولار ناۋرىزدى بيىل دا دۇبىرلەتە تويلادى. ىرىستىڭ، بەرەكە مەن بىرلىكتىڭ، جاڭعىرۋدىڭ مەرەكەسى سانالاتىن ناۋرىز مەيرامىنا جامبىل اتىنداعى قازاق مەملەكەتتىك فيلارمونياسىنىڭ ديرەك­تورى د.ءۋاش، قازاقستان رەسپۋبلي­كاسىنىڭ حالىق ءارتىسى ن.ءنۇسىپجانوۆ، «قوعامدىق كە­ءلىسىم» مەملەكەتتىك مەكەمەسىنىڭ ديرەك­تورى ج.مۇرىنوۆا، اۋەزوۆ اۋداندىق تىلدەردى دامىتۋ جانە مادەنيەت باسقار­ماسىنىڭ باسشىسى ب.قۋانىشيەۆ جانە تاعى دا باسقا قوناقتار كەلىپ، اق تىلەك، وڭ باتالارىن بەردى.

ءدۇبىرلى توي  «Mercury Propertءىes» ءجشس-نىڭ باس ديرەكتورى ر.قاسىموۆتىڭ دەمەۋشىلىگىمەن جابدىقتالعان جاتتىعۋ زالىنىڭ سالتاناتتى اشىلۋىمەن باس­تالدى. ناۋرىز-دۋمانعا كەلگەن قوناقتار مەكەمە جاستارىنىڭ سان قىرلى ونەرلەرىن تاماشالاپ، قازاقتىڭ سالت-داستۇرلەرىنىڭ ءبىرى – تۇساۋ كەسۋ راسىمىنە كۋا بولدى. ءتۇتىنىن بۋداقتاتىپ، قازان-وشاقتىڭ استىنا وت جاققان مەكەمە جاستارى دالادا قۇرىلعان التىباقانعا دا ۋاقىت تاۋىپ جاتتى. كەلگەن قوناقتار كيىز ءۇيدىڭ داستارحانىنداعى ۇلتتىق تاعامنان اۋىز ءتيىپ، ناۋرىز كوجەدەن ءدام تاتتى.

اتالعان مەكەمەنىڭ باسشىلىعىنا وتكەن جىلى ءلاززات شايكەنوۆانىڭ كەلۋىمەن كوپتەگەن يگى ءىس جاڭاشا قارقىن العان. جەتىم كورسە، جەبەپ جۇرەتىن قانىمىزداعى سالتقا بەرىك اتىمتاي جومارتتار بۇل مەكەمەگە ءجيى باس سۇعىپ، تاربيەلەنۋشى جاستارعا كومپيۋتەر، تەلەديدار الىپ بەرىپ، ولاردىڭ جۇمىسقا ورنالاسۋىنا كومەكتەسە باستاعان.

جاڭا باسشى وزىمەن بىرگە جاڭا لەپ الا كەلدى دەگەن مەكەمە قىزمەتكەرلەرى مۇنداعى تاربيەلەنۋشىلەردىڭ «بولاشاققا باعدار: رۋحاني جاڭعىرۋ» باعدارلاماسىندا اي­تىلعان «جالپىۇلتتىق قاسيەتتى ورىن­داردى» ارالاعانىن دا ايتتى.

– بالالار ورتالىقتا 29 جاسقا دەيىن بولادى. بۇل جەردەن ولار تولىق ءبىلىم الىپ، بەلگىلى ءبىر ماماندىققا بەيىمدەلىپ، جۇمىسقا ورنالاسادى. سوڭعى 4 جىلدا ۇكىمەت پاتەرمەن قامتاماسىز ەتۋدە. ەندى جەتىم بالالار دا بەلگىلى ءبىر جەڭىلدىكپەن ءۇي الا الادى. بالالار ۇيىندە كامەلەتتىك جاسقا تولماي تۇرىپ، ەگەر اكە-شەشەسىنىڭ قالدىرعان ءۇيى بولماسا، الماتى قالاسى تۇرعىن ءۇي باسقارماسىندا كەزەككە قويىلادى. ول كەزەكتى الەۋمەتتىك پەداگوگتار اي سايىن باقىلاپ وتىرادى.  ەگەر ءبىر وتباسىنىڭ ءۇش بالاسى وسى مەكەمەگە ءتۇسىپ، اكە-شەشەسىنەن ءۇي قالماسا، مەملەكەت ءۇش بالاعا دا جەكە-جەكە ءۇي بەرەدى، – دەدى «جاستار ءۇيىنىڭ» ديرەكتورى ءلاززات شايكەنوۆا.

بۇگىندە «جاستار ۇيىندە» بارلىعى 213 تاربيەلەنۋشى مەن تۇرعىن بار. وقۋ ورىن­دارىندا وقيتىن 17–23 جاس ارالىعىنداعى تۇلەكتەر «جاسوسپىرىمدەر ۇيىنە»، ال جۇمىس ىستەيتىن 20–29 جاسقا دەيىنگى تۇلەكتەر «جاستار ۇيىنە» قونىستان­دىرىلعان. ونىڭ ىشىندەگى 72ء-سى ستۋدەنتتەر. جوعارى وقۋ ورىندارىندا – 26، كوللەدجدە – 46 تاربيەلەنۋشى وقىپ ءبىلىم الۋدا.

مۇنداعى تاربيەلەنۋشى جاستار ومىردە وزدەرىنە عانا سەنىپ ءومىر سۇرەدى. كەيدە ولاردى ۇكىمەتتىڭ بالالارى دەپ تە جاتادى. ويتكەنى، ولاردىڭ 29 جاسقا دەيىنگى قولداۋشىلارى – ۇكىمەت. ياعني مەملەكەت تاراپىنان جەتىم بالالارعا اي سايىن ستيپەنديا بەرىلەدى، جىلدىڭ ءتورت مەزگىلىنە قاجەت كيىم-كەشەككە اقشا بولىنەدى.

دەگەنمەن، وسىنداعى تاربيەلەنۋ­شىلەرگە قاراپ، ومىردەگى ناعىز باقىت – كەيدە ءوزىمىز قادىرىنە جەتە بەرمەيتىن اتا-انامىزدىڭ ىستىق الاقانى مەن جىلۋ­لىعىندا، الىس-جاقىن تۋعان-تۋىسقانىمىز بار وتباسىلىق ومىردە ەكەنىن انىق تۇسىنەسىز.

– مۇنداعى بالالار ۇلكەن وتباسىم، تۋىسقانىم كوپ بولسا دەپ ارماندايدى. توپ بولىپ ءومىر سۇرگەنىمەن، ولاردىڭ ءارقايسىسى قايدان شىققانىن ءبىلىپ وتىر عوي، سوندىقتان اتا-اجەم بولسا ەكەن دەيدى. ويتكەنى، ادام ومىردە جالعىزدىقتان جالىعادى، – دەيدى «جاستار ۇيىندە» ون جەتى جىلدان بەرى قىزمەت ىستەپ كەلە جاتقان اعا تاربيەشى مارجان تاۋتەنبايەۆا.

بۇل بالالار ادامعا بەتىڭ بار، ءجۇزىڭ بار دەمەي، ويىنداعىسىن اشىق ايتادى. ءسىزدى ۇناتا ما، ۇناتپاي ما، ونى دا كوزىڭىزگە تۋرا قاراپ تۇرىپ تارس ەتكىزەدى. «ۇيات-اۋ» دەپ قىمسىنىپ، جان-دۇنيە­سىندەگىنى جاسىرىپ قالۋ ولارعا ءتان ەمەس. ەگەر ءسىزدى جاقسى كورسە، ۇلكەن ارماندارىن دا سىزبەن بولىسۋگە دايىن.

«جاستار ۇيىنەن» تۇلەپ ۇشقان جاستار­دىڭ جەكە كاسىپتەرىن اشىپ، ءوز ەڭبەك­تەرىمەن پاتەر ساتىپ العاندارى دا بار. ءۇش ءتىلدى جاقسى مەڭگەرگەن جاستار اۋەجايدا جۇمىس ىستەيدى، امەريكاعا كەتكەندەرى دە بار. ءتىپتى، مۇنداعى ۆوۆا ەسىمدى ورىس بالاسى يسلامدى قابىلداعان.

سوڭعى كەزدەرى ينتەرنەتتىڭ جاقسى دامۋىنا بايلانىستى اتا-انالارىن ىزدەپ تاۋىپ جاتقان بالالار دا كوپ كورىنەدى. سونداعى ماقساتتارى – ولار وزدەرىنىڭ قايدان شىققانىن، تەگىن ءبىلۋ. اكە-شەشە­ءسىن تاپقاندارى قوناققا بارىپ كەلۋدەن ارى اسپاي قالاتىن كورىنەدى. «سىنعان شىنى بىرىكپەيتىنى» سەكىلدى، ولاردىڭ دا اتا-انالارىمەن اراداعى قارىم-قاتىناس بىرىكسە دە، سىزىق قالىپ قالعان…