الماتى قالا­سى قوعامدىق كە­ڭەسى­ءنىڭ مۇشەلەرى ەكى كۇن­نەن بەرى شاھار­داعى اۆتو­ۆوك­زال­دارعا ۇيىم­­داس­تىرعان قوعامدىق موني­تورينگىنىڭ ءناتي­جەسى كوڭىل قۋانت­پاي­تىنىن جەتكىزدى. 

قوعامدىق مونيتورينگتەن كەيىنگى قوعامدىق كەڭەستىڭ وتى­رىسى قالاداعى اۆتوۆوكزالداردىڭ بۇگىنگى جاعدايى مەن جاي-كۇيىنە ارنالىپ، قىزۋ پىكىرتالاس پەن سىن-پىكىرلەرگە دە ورىن بەرىلدى.

جينالىسقا اۆتوۆوكزالدار باسشىلارى دا قاتىسىپ، ايتىلعان سىن-پىكىرلەرگە جاۋاپ بەرۋگە تىرىستى.

– «ساياحات» اۆتوۆوكزالىنىڭ  كىرەبەرىس جەرى بەي-بەرەكەت ساۋدا. سانيتارلىق تالاپتىڭ ءيىسى دە سەزىلمەيدى. قيراعان ازىق-تۇلىك بازارى، جاپپاي ساۋدا نۇكتەلەرى ورنالاسقان. بالىشتەر مەن سۋ ساتىلادى، دونەر مەن سامسا­لاردىڭ قانداي جاعدايدا دايىن­دا­لىپ جاتقانىن ايتپاي-اق قوي­سام دا بولاتىن شىعار. مۇنداي بازاردى قالدىرۋعا بولمايدى. قالانىڭ ورتاسىندا مۇنداي نىساننىڭ جۇمىس ىستەۋىنە كىم رۇقسات بەردى ەكەن؟ ءبىز تاكسي­لەردەن باسقا ەشقانداي اۆتو­بۋس كورمەدىك. اۆتوۆوكزال دەگەن اتى بولماسا، ونداعىلار تاكسي قىزمە­ءتىن كورسەتۋمەن  اينالىسادى دەپ تۇسىندىك. اۆتوۆوكزال  عيماراتى جوق. ال مۇنداعى دارەتحانالار مۇلدەم سىن كوتەرمەيدى، – دەگەن قوعامدىق كەڭەستىڭ مۇشەسى بەكنۇر قيسىقوۆقا اتالعان اۆتوۆوكزال  باسشىسى احمەت الەرويەۆ:

–       «ساياحاتتى» قازىرگى ورنىنان «جەتى­سۋ» بازارى جاققا كوشىرۋ تۋرالى اڭگىمە ايتىلعان بولاتىن. ءبىز تەك ماۋسىم سايىن جەڭىل-جەلپى جوندەۋ جۇمىس­تارىمەن اينا­لىسامىز. مەنىڭ ءوزىم جالداۋشىمىن، اۆتوۆوكزال  ەگەسى باسقا  ادام. بازاردىڭ بىزگە قاتىسى جوق، ول قالاعا قارايدى، – دەپ جاۋاپ بەردى.

قوعامدىق كەڭەس مۇشەلەرىنىڭ باسا نازار اۋدارىپ، ەڭ كوپ ەسكەر­تۋ جاساعان نىسانى – «سايران» اۆتوۆوكزالى  بولدى.

–       اۆتوۆوكزالدىڭ  مارتەبەسى حالىق­ارالىق بولعانى­مەن، ونداي تالاپتارعا   ساي  ەمەس. اۆتوۆوك­زال­دىڭ  جالپى اۋماعى – بەس گەك­تار. عيماراتتىڭ ىشىندەگى نىسان­داردىڭ ءبارى جالعا بەرىلەدى. ءورت قاۋىپسىزدىگى ەرەجەسى بۇزىلعان، ءورت سوندىرگىشتىڭ جارامدىلىق مەرزىمى ءوتىپ كەتكەن. قوسالقى ەسىكتەردىڭ جولى بوگدە زاتتارمەن جابىلعان. عيما­راتتىڭ جاعدايى قاناعاتتان­دىرارلىقسىز. كۇردەلى جوندەۋ جۇمىسىن قاجەت ەتىپ تۇر. مەديسي­نالىق پۋنكتكە سىلتەمە كورسەتىل­مەگەن. قوعامدىق تاماقتانۋ ورىن­دارىنىڭ ساني­تار­لىق كىتاپشاسى جوق ءارى قىزمەت­كەرلەردىڭ ۇستىندە ارنايى كيىمى جوق، – دەدى قوعام­دىق كەڭەستىڭ مۇشەسى جۇماگۇل تاجىبەكوۆا.

«سايران» اۆتوۆوكزالى  تاسى­مال­داۋ ءبولىمىنىڭ باسشىسى ەرلان ابىلدايەۆ قوعامدىق تاماقتانۋعا قاتىستى سىن-پىكىرلەرمەن كەلىسە­تىندىگىن ايتىپ، ول سالادا ماسەلە كوپ ەكەندىگىن جەتكىزدى. سوڭعى 10 جىلدا اۆتوۆوكزالدىڭ جوندەۋ جۇمىستا­رىنا 217 ميلليون تەڭگە جۇمسالعان.

ايتا كەتسەك، بۇعان دەيىن قالا­لىق قوعامدىق كەڭەس مۇشەلەرى حالىقارالىق «الماتى» اۋەجا­يىنا دا وسىلاي قوعامدىق موني­تورينگ جاساپ، ءبىراز كەمشىلىك­تەردىڭ ورنى تولتىرىلعان بولاتىن.