الماتى اكىمى باۋىرجان بايبەك جۇمىس ساپارى بارىسىندا قايتا جاساۋعا قاتىستى دايىندىقتار ءجۇرىپ جاتقان «وڭتۇستىك- يۋجنىي» ساياباعىن ارالاپ كوردى. ساياباق جاروكوۆ كوشەسىنىڭ شىعىسى مەن حودجانوۆ كوشەسىنىڭ سولتۇستىگىنە قاراي 14،2 گەكتار اۋماقتى الىپ جاتىر.
قالانىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى اسەت ماسابايەۆ جوبا بويىنشا جارىق كوزدەرىن جاڭارتۋ، فونتاندار جاساۋ، ورىندىقتار مەن ۋرنالار قويۋ، بۇرىننان بار ارىقتاردى جاڭارتۋ، سونىمەن قاتار بالالار مەن سپورت الاڭدارىن، ساياباق پەرميەترىنە وراي ۆەلوجولدار جاساۋ قاراستىرىلعانىن ايتتى.
الايدا، مەگاپوليس اكىمى زاماناۋي تەندەنسيالار مەن تۇرعىنداردىڭ تالاپتارىنا ساي قولدا بار جوباعا تۇزەتۋلەر ەنگىزۋ قاجەتتىگىن اتاپ ءوتتى.
«مۇندا حالىقتىڭ بارلىق توپتارىنا - ءسابيدىڭ ارباسىن سۇيرەگەن انالارعا، بالالارعا، تىنىشتىقتى قالايتىن ەرەسەك جاندارعا دەمالۋ جايلى بولۋى ءتيىس. بۇل كوڭىل كوتەرەتىن ەمەس، دۇرىس دەمالاتىن ورىن، سوندىقتان اسفالتتى الاڭدى قىسقارتىپ، بۇرىننان بار توتە جانە جىڭىشكە جولداردى قايتا جاسىلداندىرىپ، بارىنشا قولايلى ءارى كولەڭكەلى كەڭىستىك جاساعان ءجون جانە ۇلكەن ساۋلەت پىشىندەگىلەردىڭ ورنىنا شاعىن لوكالدى جارىق كوزدەرىن ورناتۋ قاجەت. سۋ ىشەتىن فونتاندار، ستاسيونارلى دارەتحانالار، ەڭ باستىسى يتتەردى سەرۋەندەتەتىن ارنايى قورشالعان الاڭ بولۋى مىندەتتى»، - دەدى باۋىرجان بايبەك.
الماتى اكىمى قايتا جاساۋدىڭ باستى قاعيداسى بۇرىننان بار جاسىل جەلەكتى ساقتاۋمەن قاتار جاڭاسىن قالىپتاستىرۋ ەكەنىن قاداپ تۇرىپ ايتتى. جوعارىدا ايتىلعان بارلىق ۇسىنىستاردى ەسكەرە وتىرىپ، جوباعا ءتيىستى تۇزەتۋلەر ەنگىزۋ تاپسىرىلدى. جالپى، بۇدان بىلاي ساياباق اۋماعىندا قوعامدىق قاۋىپسىزدىكتى قامتاماسىز ەتۋگە ەرەكشە نازار اۋدارىلاتىن بولادى.
جۇمىس ساپارى بارىسىندا باۋىرجان بايبەك مەدەۋ اۋدانىنداعى وقۋشىلار سارايىندا دا بولدى. الماتى اكىمى بۇرىننان بار جوبانى وڭتايلاندىرۋدى جانە جاسىل جەلەككە تيىسپەۋدى تاپسىردى. سكۆەردى جاڭعىرتۋ بارىسىندا سۋارۋ جۇيەسىن جاڭارتۋ، كوشە جارىعى باعانالارىن جوندەۋ جانە باسقا دا شارالاردى جۇزەگە اسىرۋ مىندەتتەلدى.
پىكىر قالدىرۋ