الماتى اكىمى باۋىرجان بايبەك قالانىڭ بارلىق مەردىگەرلىك ۇيىمدارىنىڭ قاتىسۋىمەن الداعى ۋاقىتتا مەگاپوليستىڭ كوشە-جول جەلىلەرىن جوندەۋ ماسەلەسىنە قاتىستى كەڭەيتىلگەن كەڭەس وتكىزدى. الماتىدا 2018 جىلى 157 كوشەنى جوندەۋ، سونىمەن قاتار ماقاتايەۆ، بايتۇرسىنوۆ جانە جاروكوۆ كوشەلەرىندەگى ۇزىندىعى 15،7 شاقىرىم بولاتىن ترامۆاي جولدارىن دەمونتاجداۋ جوسپارلانعان.

جيىن بارىسىندا قالانىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ماقسۇت يساحوۆ بارلىق جوندەۋ جۇمىستارىنىڭ 2018 جىلدىڭ قاراشا ايىندا اياقتالاتىنى جانە 24 كوشە بورديۋرلەرىنىڭ تولىق جاڭاراتىنى، كوشەلەردىڭ 43 پايىزىنىڭ جەكە بولىكتەرىنىڭ قايتا جاسالاتىنى تۋرالى حابارلادى.

ءوز كەزەگىندە مەگاپوليس اكىمى باسقارما جاساعان جوسپاردى قاتال سىنعا الىپ، جۇمىستىڭ ناقتىلى كەستەسىن جاساي وتىرىپ، جوبالاۋ ادىستەرىن قايتا قاراۋدى تاپسىردى.

«ءبىز الماتىنى «قالا – ادامدار ءۇشىن جايلى» قاعيداسى بويىنشا دامىتۋدامىز، سوندىقتان جۇمىستاردى جۇرگىزگەن كەزدە كەدەرگىلەردى بارىنشا ازايتىپ، ۋاقىتتتى قىسقارتقان ءجون. وتكەن جىلى جولداردى جوندەۋ، جىلۋ تراسسالارىن جاڭارتۋ، ورتالىقتى جاڭعىرتۋ جونىندە اۋقىمدى جۇمىستار جۇزەگە استى، دەگەنمەن پروسەسس بارىسىندا ءبىرقاتار كەمشىلىكتەر انىقتالدى، اسىرەسە تايم-مەنەدجمەنت بويىنشا. بيىلعى جىلعا جاسالعان جوسپاردا كەيبىر مەردىگەرلەردىڭ جوندەيتىن جولدارى نەبارى 5 شاقىرىم، ونى قاراشاعا دەيىن سوزۋدىڭ قاجەتى قانشا. قىستىڭ الدىندا تەگىس اسفالتتى جول كىمگە كەرەك»، - دەپ رەنىش ءبىلدىردى باۋىرجان بايبەك.

ول مەردىگەرلەردىڭ بىرنەشە كۇن بويىنا اسفالتتى الاتىن،بورديۋرلەردى شىعاراتىن جانە اسفالت توسەۋدى ۇزاققا سوزاتىن ەسكى ادىستەردەن تولىق ارىلۋىن قاداپ تۇرىپ ايتتى.

«جۇمىسقا كىرىسپەس بۇرىن جوندەلەتىن ءار كوشە بويىنشا اقاۋى كورسەتىلگەن اكتىلى فوتوالبومدى ۇسىنىڭىزدار. جۇمىسقا بارىنشا كەشەندى تۇردە قاراپ، ءاربىر اسپەكتىنى ويلانىپ بارىپ جاساۋ كەرەك. مەردىگەر كەيبىر جەرلەردە ارىق ناۋالارىن اۋىستىرۋ، قورشاۋلاردى، قاراۋسىز قالعان باعانالاردى، بەتون كونسترۋكسيالارىن، كەرەكسىز جەلىلەردى، ءبىر سوزبەن ايتقاندا بارلىق ۆيزۋالدى قوقىستى الىپ تاستاۋ قاجەت ەكەنىن ءبىلۋى ءتيىس، سوندا عانا ءىس بىرنەشە رەت قايتالاپ اتقارىلمايتىن بولادى. ونىڭ ۇستىنە بۇرىننان بار جاسىل جەلەكتى بارىنشا ساقتاعان ءجون»، - دەدى باۋىرجان بايبەك.

ايتا كەتەرلىگى، قالادا بۇرىنعىسىنشا دۇرىس ورنالاسپاعان تۇراق قالتالارى جەتكىلىكتى. ءتىپتى، كەيبىر ۋچاسكەلەردە كولىك يەلەرى اۆتوموبيلدەرىن بۇرىشتاپ قويىپ، قوزعالىس جەلىسىنىڭ وتكىزگىش قابىلەتىن تومەندەتىپ، اپاتتى جاعدايعا ۇرىندىرادى. مەگاپوليس باسشىسى جول جوندەگەندە وسى فاكتوردى ەسكەرۋدى، تۇراق قالتالارىنىڭ بەرگى بەتتەرىن عانا اباتتاندىرۋدى تاپرسىردى.

مەگاپوليس اكىمى جول جوندەۋ بارىسىندا كوشەلەردىڭ جابىلاتىن بولىكتەرى تۋرالى تۇرعىندارعا دەر كەزىندە حابارلاۋ كەرەكتىگىن دە ايتتى.

«قانداي جۇمىستاردىڭ جۇرەتىنى جانە قاشان اياقتالاتىنى تۋرالى تۇسىنىك بەرۋ قاجەت. كومپانيا باسشىلارىنىڭ بايلانىس نومىرلەرىنە دەيىن جازىلعان تولىق اقپاراتى بار ستەندىلەر ورناتىلۋى ءتيىس. اقپاراتتىق رەسۋرستاردا جۇمىس كەستەسىنىڭ بولعانى ءجون»، - دەدى اكىم.

باۋىرجان بايبەك كەڭەستىڭ جۇمىسىن قورىتىندىلاي كەلىپ، قالانىڭ جولاۋشىلار كولىگى جانە اۆتوموبيل جولدارى باسقارماسىنا ءبىر اپتا ىشىندە جوسپار جاساۋدى، وندا ءاربىر مەردىگەر ۇيىمداردىڭ قانداي جۇمىستاردى قاشان جانە قالاي جۇرگىزەتىنى، ناقتىلى مەرزىمى كورسەتىلۋى ءتيىس. وڭتايلاندىرىلعان جۇمىس كەستەسى كەلەسى كەڭەستە ۇسىنىلۋى قاجەت. وسىنداي تاپسىرما قالانىڭ ەنەرگەتيكا جانە كوممۋنالدى شارۋاشىلىق باسقارماسىنا دا بەرىلدى.