24 ساۋىردە قازاقستان رەسپۋبليكاسىنىڭ سىرتقى ىستەر ءمينيسترى قايرات ءابدىراحمانوۆ بەيجىڭدە قىتايدىڭ سىرتقى ىستەر ءمينيسترى، مەملەكەتتىك كەڭەستىڭ مۇشەسى ۆان يمەن ەكىجاقتى كەزدەسۋلەر وتكىزدى، دەپ حابارلايدى Qamshy.kz اقپارات اگەنتتىگى ق ر ءسىم باسپا ءسوز قىزمەتىنە سىلتەمە جاساپ.

كەزدەسۋ بارىسىندا ەكى ەلدىڭ سىرتقى ىستەر مينيسترلەرى قازاقستان-قىتاي قارىم-قاتىناسىنىڭ اۋقىمدى ماسەلەلەرىن تالقىلادى. اسىرەسە، قازاقستان پرەزيدەنتى نۇرسۇلتان نازاربايەۆتىڭ قىتايعا ساپارىنا جانە شانحاي ىنتىماقتاستىق ۇيىمىنىڭ سامميتىنە قاتىسۋىنا دايىندىق ماسەلەسىنە اسا ءمان بەرىلدى. قوس تاراپ ەكى ەلدىڭ ازاماتتارىنىڭ قۇقىعىن قورعاۋ، ترانسشەكارالىق وزەندەردى بىرلەسە پايدالانۋ سىندى ماسەلەلەردى قارادى.

جۋىق ارادا كونسۋلدىق قىزمەتتەر جەلىسى ارقىلى سىرتقى ىستەر مينيسترلىكتەرى اراسىندا كونسۋلتاسيالار وتكىزۋ تۋرالى كەلىسىم جاسالدى. ق. ءابدىراحمانوۆ قازاقستان تاراپى «نۇرلى جول» مەن «ءبىر بىلدەۋ، ءبىر جول» باعدارلامالارىن توعىستىرۋ باعىتىندا بەلسەندى جۇمىس جاساي بەرەتىنىن جەتكىزدى. بۇل قىتايدان قازاقستان ارقىلى ەۋروپا مەن تاياۋ شىعىس ەلدەرىنە تاسىمالداناتىن كونتەينەردىڭ كولەمىن ارتتىرۋعا، ەلدىڭ كولىكتىك-ترانزيتتىك الەۋەتىن ارتىرۋعا جول اشپاق.

ەكى جاق الداعى ۋاقىتتا وندىرىستىك قۋاتتى ارتتىراتىن باعدارلامانى ءجىتى جۇزەگە اسىرۋ ماسەلەسىنە قىزىعۋشىلىق تانىتتى. قازىرگى تاڭدا قۇنى 27 ميلليارد دوللار بولاتىن 51 بىرلەسكەن جوبا بويىنشا جۇمىستار جۇرگىزىلىپ جاتىر، ونىڭ 5-ەۋى ىسكە قوسىلعان (قۇنى 158 ميلليون دوللار).

سونداي-اق، جۇڭگو نارىعىنا قازاقستاندىق اۋىلشارۋاشىلىق ونىمدەرىن جەتكىزۋ نومەنكلاتۋراسىن كەڭەيتۋ ماسەلەسى دە زور ماڭىزعا يە. مينيسترلەر، سونداي-اق، الداعى ۋاقىتتا ينۆەستيسيا، ەنەرگەتيكا، قارجى، شەكارا ماڭى ساۋداسى، «قورعاس» شەكارا ماڭى ىنتىماقتاستىعى حالىقارالىق ورتالىعى قىزمەتىنىڭ تيىمدىلىگىن ارتتىرۋ سىندى ماسەلەلەردەگى كەلەسى قادامداردى تالقىلادى.