باتىس قازاقستان وبلىسىنىڭ ىسكەر ايەلدەرى ح. بوكەيەۆا اتىنداعى وبلىستىق قازاق دراما تەاترىندا باس قوستى.

جيىن قىز-كەلىنشەكتەر باسشىلىق ەتەتىن كاسىپورىنداردىڭ ونىمدەرى قويىلعان كورمەمەن اشىلدى. كورمەگە «بالزيا»، «وماروۆ تورتتارى» كونديتەرلىك سەحتارىنىڭ ءتاتتى تاعامدارى، «تۇمار» قولونەر شەبەرحاناسىنىڭ بۇيىمدارى، «ماريا حانىم» ءسان ءۇيىنىڭ كيىمدەرى قويىلدى. فورۋمنىڭ اشىلۋ سالتاناتىندا باتىس قازاقستان وبلىسى اكىمىنىڭ ورىنباسارى ميرجان ساتقانوۆ، ورال قالاسى  اكىمىنىڭ ورىنباسارى ميربولات نۇرجانوۆ، «اتامەكەن» ق ر ۇلتتىق كاسىپكەرلەر پالاتاسى وبلىستىق فيليالىنىڭ ديرەكتورى ساكەن كارين مەن پالاتا جانىنداعى ىسكەر ايەلدەر كەڭەسىنىڭ ءتورايىمى جۇلدىز قۇسپانوۆا ءسوز الىپ، ەل ەكونوميكاسىنىڭ دامۋىنا ۇلەس قوسىپ جۇرگەن قىز-  كەلىنشەكتەردىڭ جۇمىسىنا ساتتىلىك تىلەدى.

– بارشاڭىزعا بەلگىلى، ەلباسىنىڭ «قازاقستان – 2050» ستراتەگياسىندا ەلىمىزدەگى شاعىن  ورتا بيزنەستەگى ءونىمنىڭ ۇلەسىن 50 پايىزعا جەتكىزۋ كوزدەلگەن. ءوڭىرىمىز سول ۇدەدەن شىعۋعا تىرىسۋدا. وبلىسىمىزدا قالىپتى جۇمىس ىستەپ تۇرعان 48 مىڭعا جۋىق شاعىن جانە ورتا كاسىپكەرلىك نىسان بولسا، ونىڭ 22 مىڭعا جۋىعىن نازىك جاندىلار باسقارىپ وتىر. اتالمىش كورسەتكىش بۇگىندە ايەلدەردىڭ كاسىپكەرلىك قىزمەتىمەن اينالىسۋعا دەگەن بەلسەندىلىگىن كورسەتەدى. سىزدەردىڭ كاسىپتەرىڭىز ارقىلى ەلىمىزدىڭ ەكونوميكاسى دامىماق. سوندىقتان دەندەرىڭىزگە ساۋلىق تىلەيمىن،- دەدى وبلىس اكىمىنىڭ ورىنباسارى ميرجان ساتقانوۆ.

 ساكەن كارين اتالمىش فورۋم قىز-كەلىنشەكتەردىڭ كاسىبىنە تىڭ سەرپىن بەرەتىنىن جەتكىزدى. – ءبىز سىزدەردىڭ كاسىپتەرىڭىزدى دامىتۋعا مۇددەلىمىز. قىتايلىق «Alibaba» ءىرى ينتەرنەت كومپانياسىنىڭ نەگىزىن سالۋشى دجەك ما ءوز جەتىستىگىنىڭ سىرى ارۋلار ەكەنىن ايتقان. ويتكەنى ولار وزدەرىنەن گورى وتباسىنىڭ وزگە مۇشەلەرىنە قامقور بولعاندى ۇناتادى. بۇل فورۋم بيزنەستەرىڭىزدىڭ دامۋىنا جاڭا يدەيا قوسادى دەپ سەنەمىز، – دەدى ساكەن كارين.

شارا بارىسىندا ءبىرقاتار ىسكەر ارۋلار وبلىس اكىمىنىڭ اتىنان العىسحاتپەن ماراپاتتالدى. ولاردىڭ قاتارىندا «بالزيا» كونديتەرلىك سەحى مەن دۇكەندەر جەلىسىنىڭ قوجايىنى بالزيا ەۆەنەيەۆا، «ماريا حانىم» ءسان ءۇيىنىڭ قۇرىلتايشىسى ماريا قۇسپانوۆا، باتىس قازاقستان يننوۆاسيالىق تەحنولوگيالار ۋنيۆەرسيتەتىنىڭ قۇرىلتايشىسى ءلاززات رىسبەكوۆا، «جايىق دەنت» ستوماتولوگيالىق ورتالىعىنىڭ قۇرىلتايشىسى مەرۋەرت مۋسينا، «ەسەت» شارۋا قوجالىعى جانە«زاريا ۆوستوكا» بازارىنىڭ باسشىسى ايگۇل مولداشيەۆا بار. فورۋمدا ەل ەكونوميكاسىنىڭ دامۋىنداعى ايەلدەردىڭ ءرولى، ولاردىڭ كاسىبىن قولداۋ جانە قوعامداعى بەلسەندىلىگىن ارتتىرۋ تاقىرىبىندا باياندامالار وقىلىپ، وبلىس اكىمدىگى مەن «اتامەكەن» ق ر ۇلتتىق كاسىپكەرلەر پالاتاسى جانىنداعى ىسكەر ايەلدەر كەڭەسى ءوزارا ىنتىماقتاستىقتى دامىتۋ تۋرالى مەموراندۋمعا قول قويدى.