ورال قالاسىنىڭ اكىمى مۇرات مۇقايەۆ جەر قاتىناستارى سالاسىندا كورسەتىلەتىن مەملەكەتتىك قىزمەتتەردى  سيفرلاندىرۋ جايىن وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگتە باياندادى.

          ايتا كەتسەك، ورال قالاسىنىڭ اۋماعى 73،1 مىڭ گەكتاردى قۇرايدى. سونىڭ ىشىندە ەلدى مەكەن جەرى – 10،9 مىڭ گا، ونەركاسىپ، ترانپورت ساناتىنداعى جەر – 2،5 مىڭ گا، اۋىل شارۋاشىلىعى ماقساتىنداعى جەر – 48،9 مىڭ گا، ال قور جەرى – 3،9 مىڭ گەكتار. مۇرات راحمەت ۇلى جەكە تۇرعىن ءۇي ءۇشىن جەر تەلىمدەرىن بەرۋ كۇن تارتىبىندەگى وزەكتى ماسەلەلەردىڭ ءبىرى ەكەندىگىن باسا ايتتى. بۇگىنگى تاڭدا ورال قالاسىندا 71 426 ادام جەر تەلىمى كەزەگىندە تۇر. شاھار باسشىسىنىڭ ايتۋىنشا، دايىندالعان الاڭداردىڭ بولماۋىنا بايلانىستى جەكە تۇرعىن ءۇي قۇرىلىسى ءۇشىن جەر تەلىمدەرىن بەرۋ جۇمىستارى 2012 جىلدان قازىرگى كەزگە دەيىن توقتاپ تۇر. جەكە تۇرعىن ءۇي قۇرىلىسى ءۇشىن جەر تەلىمدەرىن بەرۋ سوڭعى رەت 2010-2012 جىلدارى جۇرگىزىلىپ، سول ۋاقىت ارالىعىندا ازىرلەنگەن تۇپكىلىكتى جوبالاۋ جوسپارىنا سايكەس دەركول كەنتىنەن بەرىلگەن. وسىلايشا 2000-2012 جىلدار ارالىعىندا 15 مىڭعا جۋىق ازاماتقا جالپى كولەمى 1 496،72 گا جەر تەلىمى بەرىلىپ، ورال قالاسىندا پدپ-2، پدپ-3ا، «سولتۇستىك-شىعىس»، «جۇلدىز»، «بالاۋسا»، «بولاشاق»، «ارمان»، «كوكتەم»، «كەڭ دالا» جانە «سارى تاۋ» شاعىناۋداندارى بوي كوتەرگەنى بەلگىلى. 2004 جىلدان بەرى جەر كەزەگىندە تۇرعان ورالدىقتار تيەسىلى جەر تەلىمىن الار كۇندى اسىعا كۇتىپ ءجۇر. – «نۇرلى جەر» باعدارلاماسىن ىسكە اسىرۋدىڭ ءبىرىنشى كەزەڭى 2017-2021 جىلداردى قامتيدى. ءقازىر كرۋگلووزەرنىي اۋىلدىق وكرۋگى اۋماعىندا تۇپكىلىكتى جوبالاۋ جوسپارىنا سايكەس 1145 جەر تەلىمىن دايىنداۋ كوزدەلىپ وتىر. الايدا جەر تەلىمىن بەرۋ جول، تابيعي گاز، اۋىز سۋ، ەلەكتر جەلىسى سياقتى ينجەنەرلىك ينفراقۇرىلىمدار تارتىلىپ، مەكتەپ، بالاباقشا، ەمحانا سياقتى الەۋمەتتىك نىساندار قۇرىلىسى اياقتالعان سوڭ عانا باستالادى. ۇكىمەتتىڭ تالابى سولاي. ينفراقۇرىلىمدار مەن الەۋمەتتىك نىسانداردىڭ قۇرىلىسىن 2019 جىلدىڭ العاشقى جارتىجىلدىعىندا باستاۋدى كوزدەپ وتىرمىز، – دەدى مۇرات راحمەت ۇلى.

ق ر جەر كودەكسىنىڭ 48-بابىنا سايكەس اۋىل شارۋاشىلىعى ماقساتىنداعى جانە كوممەرسيالىق باعىتتاعى جەر ۋچاسكەلەرى كونكۋرستار مەن اۋكسيوندار ارقىلى بەرىلەدى. بۇگىنگە دەيىن ورال قالاسىندا اۋكسيونمەن 17 كوممەرسيالىق باعىتتاعى جەر تەلىمى بەرىلسە، ءساۋىر ايىندا 10 جەر تەلىمىنىڭ جالداۋ قۇقىعىن ساتۋ جونىندە اۋكسيون وتكىزىلمەك. – ورال قالاسىنىڭ اۋماعىندا 165 باۋ-باقشا سەرىكتەستىگى ورنالاسقان. تۇرعىنداردىڭ دەنى زاڭ تالاپتارىن جەتىك بىلمەگەندىكتەن، وزدەرىنىڭ جەر تەلىمدەرىن زاڭداستىرماعان رۇقسات بەرەتىن قۇجاتتارى بولماسا دا، جەر تەلىمدەرىن ماقساتتى پايدالانىپ وتىر. 2016 جىلدىڭ 6 مامىرىنداعى «جەر زاڭدىلىعىنىڭ جەكەلەگەن نورمالارىن قولدانۋعا موراتوريي ەنگىزۋ تۋرالى» جارلىققا بايلانىستى ءبىز اۋىل شارۋاشىلىعى ماقساتىنداعى جەرلەردى جەكە مەنشىككە بەرە المايمىز. موراتوريي 2021 جىلدىڭ 31 جەلتوقسانىنا دەيىن كۇشىندە بولادى، – دەدى قالا اكىمى.

وتكەن جىلدىڭ سوڭىندا وبلىس اكىمى التاي كولگىنوۆتىڭ باستاماسىمەن جەر تەلىمدەرىن تاڭداۋ اكتىسىن كەلىسۋ ءۇردىسى تولىق اۆتوماتتاندىرىلدى. ەندى قۇجات راسىمدەۋ تولىعىمەن اۆتوماتتى رەجىمدە جۇرگىزىلەدى. ناتيجەسىندە قىزمەتتى الۋ مەرزىمى 2-3 ايدان 5-10 كۇنگە دەيىن قىسقاردى. قازىرگى تاڭدا اتالمىش جوباعا 19 مەكەمەۇيىم تارتىلدى. سونىمەن قاتار «قولجەتىمدى اكىمدىك» جوباسى اياسىندا ازاماتتارعا 16 مەملەكەتتىك قىزمەت ءتۇرى كورسەتىلۋدە. وپەراسيالىق زال اشىلعان كۇننەن باستاپ 40364 ادامعا قىزمەت كورسەتىلگەن. ورتاشا ەسەپپەن كۇنىنە 300-گە جۋىق قالا تۇرعىنى كەلەدى. قىزمەت كورسەتۋ دەڭگەيىن ارتتىرۋ ترانسپورەنتتى جۇيەنى قالىپتاستىرۋ، كورسەتىلەتىن مەملەكەتتىك قىزمەتتىڭ اشىقتىعىن جەتىلدىرۋ باستى نازاردا، – دەپ اتاپ ءوتتى مۇرات مۇقايەۆ.