الماتىدا وسىمەن جەتىنشى رەت حالىقارالىق مارافون ءوتتى. بيىل سپورتتىق شاراعا قاتىسۋعا رەسمي تۇردە 14 مىڭ ادام تىركەلدى. ءبىراق 16 مىڭداي الماتىلىق بۇقارالىق سپورت دوداسىنا قاتىسقان جاقىندارىنا قولداۋ بىلدىرۋگە كەلگەن. قاتىسۋشىلارعا بەرىلگەن ەڭ ۇزىن ديستانسيا 42 شاقىرىم بولدى. قاشىقتى العاشقى ەڭسەرگەن 3 جەلاياق قارجىلاي سىيلىققا يە بولدى. رەسپۋبليكا الاڭىنان باستالىپ، ءدال سول جەردە اياقتالعان مارافون جايلى كەلەسى بەينەماتەريالدا.

سالاۋاتتى ءومىر سالتىن ۇستاناتىندار جەكسەنبىنىڭ تاڭىندا الماتىداعى رەسپۋبليكا سارايىنىڭ الدىنا جينالدى. ۇيىمداستىرۋشىلار مارافوندا قاتىسۋشىلاردىڭ تاڭداۋىنا قاراي 10، 21 جانە 42 كيلومەترگە جۇگىرۋدى، ال بالالار ءۇشىن 3 كيلومەتر قاشىقتىقتى ۇسىندى. كوتەرىڭكى كوڭىل-كۇيدە كەلگەن قالا قوناقتارى مەن تۇرعىندارىنا الماتى اكىمى باۋىرجان بايبەك ساتتىلىك تىلەدى.

«الماتى قالاسىندا ءبىز سپورتشىلار ءۇشىن، قالا تۇرعىندارى ءۇشىن قولايلى جاعداي جاساپ وتىرمىز سپورتپەن شۇعىلدانۋعا. ەلباسى ايتقانداي، ءبىزدىڭ ۇلتىمىزدىڭ دەنساۋلىعى - ءبىزدىڭ تابىستى بولاشاعىمىزدىڭ كەپىلى، نەگىزى. سوندىقتان سپورتپەن اينالىسقان ازاماتتار، ارينە. ەڭ باستىسى وزدەرىنىڭ دەنساۋلىعى ءۇشىن جۇمىس ىستەيدى. سوندىقتان بۇگىن ۇيىمداستىرۋشىلاردى، قولداۋشىلاردى، بارشا قوناقتارىمىزدى وسى ىس-شارامەن شىن جۇرەكتەن قۇتتىقتايمىن»، - دەدى الماتى قالاسىنىڭ اكىمى باۋىرجان بايبەك.

سونداي-اق قالا باسشىسى الىپ شاھاردا بۇقارالىق سپورت تۇرلەرىنىڭ دامۋىنا باسا نازار اۋدارىلىپ كەلە جاتقانىن جەتكىزدى. ماسەلەن، الماتىدا كوپتەپ ۆەلوجولاقتار مەن جۇرگىنشىلەر جولى سالىنۋدا. ال الەمدەگى قايىرىمدىلىق ماقساتتاعى 5 ءىرى جارىستىڭ قاتارىنا ەنگەن شاراعا بۇل جولى ەۆروپادان، ازيادان، ءتىپتى سولتۇستىك امەريكادان جانە اۆستراليادان دا قاتىسۋشىلار كەلگەن. مارافونعا ستارتتى قالا اكىمى باۋىرجان بايبەك بەردى.

بەلگىلەنگەن نۇكتەلەردە دارىگەرلەر، قۇتقارۋشىلار مەن ءتارتىپ ساقشىلارى كەزەكشىلىك ەتتى. وعان قوسا، سۋ ىشەتىن پۋنكتتەر ورناتىلعان. مارافونعا قاتىسقانداردى جانكۇيەرلەر قولدادى. ال سپورتشىلاردىڭ كوڭىل-كۇيى كوتەرىڭكى.

بيىل جارىس باعىتى وزگەرىپ، مارافون رەسپۋبليكا الاڭىنان باستالىپ، ءدال وسى جەردە اياقتالدى. قاتىسۋشىلاردىڭ بارلىعى ناتيجەسىنە قاراماستان ەستەلىك مەدالدارعا يە بولدى. ايتا كەتەيىك، 42 شاقىرىمدى 2 ساعات 33 مينۋتتا ەڭسەرگەن الماتىلىق ميحايل كراسيلوۆ باس جۇلدەنى، ياعني 400 مىڭ تەڭگەنى قانجىعاسىنا بايلادى. ەكىنشى ورىن ءۇشىن 350 مىڭ، ۇشىنشىگە 250 مىڭ تەڭگە جۇلدە تاعايىندالدى. جالپى مارافوننان تۇسكەن قارجى قايىرىمدىلىققا جۇمسالادى.