ەلباسى ەل ەكونوميكاسىن مودەرنيزاسيالاۋ جانە سيفرلاندىرۋ جونىندە ءبىرقاتار مىندەتتەر قويدى. وسى مىندەتتەردى ورىنداۋ ماقساتىندا اق جايىق وڭىرىندە اۋقىمدى جۇمىستار جاسالۋدا.
باتىس قازاقستان وبلىستىق كاسىپكەرلىك جانە يندۋستريالدىق- يننوۆاسيالىق دامۋ باسقارماسىنىڭ باسشىسى ارمان جالماعامبەتوۆتىڭ ايتۋىنشا، جالپى ايماقتىق ونىمدە ونەركاسىپ سالاسىنىڭ ۇلەسى شامامەن 50%-عا جۋىق، ال رەسپۋبليكانىڭ ونەركاسىبىندەگى وبلىس ۇلەسى شامامەن 9%-دى قۇرايدى. 2017 جىلدىڭ قورىتىندىسى بويىنشا وبلىستىڭ ونەركاسىپ دامۋىندا وڭ ءۇردىس بايقالادى.
– ەسەپتىك كەزەڭدە وبلىستىڭ كاسىپورىندارىمەن 1،9 ترلن. تەڭگەگە ءونىم ءوندىرىلدى جانە ول 2016جىلعى كورسەتكىشپەن سالىستىرعاندا 5،5%-عا ءوستى. مۇنداي وسىمگە تاۋ-كەن جانە وڭدەۋ ونەركاسىبى سالاسىنداعى ءوندىرىس كولەمىن ارتتىرۋ ەسەبىنەن قول جەتكىزىلدى. وڭدەۋ ونەركاسىبى سالاسىنىڭ ەكسپورت كولەمى 2016 جىلعى كورسەتكىشتەن 20،8%-عا ءوسىپ، 182،2 ملن. اقش دوللارىن قۇرادى. بۇل سالادا 2017 جىلدىڭ توعىز ايىنىڭ قورىتىندىسى
بويىنشا ەڭبەك ەتەتىن جۇمىسشىلار سانى 18،5 مىڭ ادامدى قۇراپ، 22،7% پايىزعا ارتتى.تارتىلعان ينۆەستيسيا كولەمى 16 ملرد. تەڭگە، – دەدى ارمان جانات ۇلى.
ونىڭ بايانداۋىنشا، وڭدەۋ ونەركاسىبى سالاسىنداعى نەگىزگى ۇلەس تاماق ونەركاسىبىنە تيەسىلى، ياعني ونىڭ ۇلەسى 30%-عا جۋىق، ماشينا سالاسىنىڭ ۇلەسى – 21،1%، مۇناي وڭدەۋ سالاسىنىڭ ۇلەسى – 17،6%. وتكەن جىلى ءوڭىردىڭ ماشينا جاساۋشىلارىمەن 33،3 ملرد. تەڭگەنىڭ، مۇناي وڭدەۋشىلەرمەن 27،8 ملرد. تەڭگەنىڭ ونىمدەرى ءوندىرىلدى. بۇل سالادا ءونىم ءوندىرۋ 2016 جىلعى كورسەتكىشپەن سالىستىرعاندا 1،8 ەسەگە ءوستى. بۇل سالاداعى ءوسىم «كوندەنسات» اق-نىڭ وندىرىستىك بازاسىنداعى بەنزين ءوندىرىسىنىڭ ىسكە قوسىلۋى ەسەبىنەن بولدى. اتالمىش كاسىپورىندا وتكەن جىلى جەڭىل مۇناي ونىمدەرىن الۋدى قامتاماسىز ەتەتىن ۆاكۋۋمدىق ايداۋ سەكسياسى ىسكە قوسىلدى. زاۋىت جاڭعىرتۋدان ءوتىپ، ەندى جىلىنا بۇرىنعىداي 600 مىڭ توننا ەمەس، 850 مىڭ تونناعا دەيىن كومىرسۋتەگى وڭدەلەدى. بيىل ك5 ەكولوگيالىق كلاسىنا دەيىن ديزەل وتىنىن گيدروتازارتۋعا ارنالعان قوندىرعى ورناتۋ جوسپارلانعان. قازىرگى ۋاقىتتا گيدروتازارتۋ قوندىرعىسى قۇرىلىسى جۇرۋدە»، – دەدى ارمان جالماعامبەتوۆ. «زەنيتتەحسەرۆيس» ج ش س الداعى ۋاقىتتا 10 مەتردەن جوعارى بۇيىمداردى ىستىقتاي مىرىشتاۋ سەحىن ۇيىمداستىرۋدى، «گيدروپريبور» عزي» اق بازاسىندا مەتالل جانە تۇربالاردى مەتاللوگرافيكالىق زەرتتەۋ جۇرگىزەتىن زەرتتەۋ زەرتحاناسىن اشۋدى جوسپارلادى. ءوڭىردىڭ كاسىپكەرلىكتى قولداۋ كارتاسى اياسىندا II بەسجىلدىقتا 1340 تۇراقتى جۇمىس ورنىن قۇرۋمەن جالپى قۇنى 84،4 ملرد. تەڭگەنى قۇرايتىن 29 ينۆەستيسيالىق جوبا جۇزەگە اسىرىلۋدا. وتكەن جىلى 8 ملرد. تەڭگەگە 10 جوبا ىسكە قوسىلدى. بيىل 10 جوبانى ىسكە اسىرۋ كوزدەلگەن جانە 3،3 ملرد. تەڭگەگە التى جوبا يندۋستريالاندىرۋ كارتاسىنا ەنگىزىلدى. سوندا شامامەن 200 جۇمىس ورىن قۇرىلادى. ولاردىڭ قاتارىندا «مال شارۋاشىلىعىنىڭ قالدىقتارىن وڭدەۋ سەح قۇرىلىسى» («كۋبلەي» ج ش س)، «سەندۆيچ-پانەلدەر شىعاراتىن زاۋىت قۇرىلىسى» («اگران» ج ش س)، «حيميالىق ءوندىرىس بازاسىنىڭ قۇرىلىسى» («توپان» ج ش س)، «كىرپىش زاۋىتىنىڭ قۇرىلىسى» («134» ج ش س)، «بەتون ارالاستىرۋ سەحى» («Global Procurement» ج ش س)، «كونديتەرلىك ونىمدەر شىعاراتىن سەحتىن جاڭعىرتىلۋى» («حاسانوۆ» جك) سەكىلدى جوبالار بار. «بيزنەستىڭ جول كارتاسى – 2020» بيزنەستى قولداۋ مەن دامىتۋدىڭ ءبىرىڭعاي باعدارلاماسى بويىنشا «ورال ساۋدا-ونەركاسىپ كومپانياسى» جشس-عا قورعانىش جابىندى پلاستيكالىق تۇربالار وندىرىسىنە قوسىمشا جابدىق، «ورال كابەل» جشس-عا ەلەكتر كابەلىن وندىرۋگە جانە «ستەكلو-سەرۆيس» جشس-عا شىنىنى وندىرىستىك وڭدەۋ، بەرىكتىگىن نىعايتۋ كەشەنىن جاڭعىرتۋعا، كەڭەيتۋگە قاجەتتى جابدىقتار الۋعا قولداۋ كورسەتىلدى.
وڭىردەگى جاس جانە ءوز ىستەرىن جاڭادان باستاعان كاسىپكەرلەر اراسىندا قايتارىمسىز گرانتتىق قارجىعا قۇشتارلىق باسىم. 2015-2017 جىلدارى 45 كاسىپكەرگە 76 ملن. تەڭگە يننوۆاسيالىق گرانتتىق قارجى بەرىلگەن. ونىڭ ىشىندە 32 گرانتقا اۋىلدىق جەرلەردەگى كاسىپكەرلەر يە بولدى. 2017 جىلى 19 كاسىپكەرگە 47 ملن. تەڭگە گرانت بۇيىردى. بيىل 3 ساۋىردەن باستاپ گرانتقا وتىنىمدەر قابىلدانۋدا. بۇعان بيۋدجەتتەن 47 ملن. تەڭگە قارجى ءبولىندى. سونداي- اق، «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى» اياسىندا 2017 جىلى نەسيەلەۋگە 852،8 ملن. تەڭگە، بيىل 300،3 ملن. تەڭگە ءبولىندى. بۇل نەسيە 6%-بەن ەكىنشى دەڭگەيدەگى بانكتەر ارقىلى بەرىلەدى.
پىكىر قالدىرۋ