الماتىدا مۇمكىندىگى شەكتەۋلى جانداردىڭ قۇقىعىن تابان استى ەتكەن كاسىپكەرلەرگە 3 ميلليون تەڭگەدەن استام ايىپپۇل سالىندى. ولار عيماراتتارىندا كەمباعال جانداردىڭ ەمىن-ەركىن كىرىپ شىعۋىنا مۇمكىندىك جاساماعان. ءتىپتى، قاراپايىم پاندۋستى ورناتۋدى دا شىعىن ساناعان. مۇنداي ولقىلىقتارعا اشىنعان مۇگەدەكتەردەن شاعىم دا كوبەيىپ كەتىپتى. ارباعا تاڭىلعاندار، اسىرەسە، ەمدەۋ مەكەمەلەرىنە باس سۇعا الماعانىنا نارازى.

الماتىداعى الەۋمەتتىك قورعاۋ جانە كوشى-قون كوميتەتىنىڭ دەپارتامەنتىنە سوڭعى كەزدەرى مۇگەدەكتەردەن تۇسكەن شاعىم كوبەيگەن. ولار ارنايى پاندۋس پەن اربانىڭ جوقتىعىنان 30-عا تارتا عيماراتقا كىرە الماي، قينالىپ جاتقانىن جەتكىزىپتى. اسىرەسە، ارباعا تاڭىلعاندارعا ءدارىحانالار مەن ەمدەۋ مەكەمەلەرىنە كىرۋ مۇڭعا اينالعان. مۇنى ەسكەرگەن ماماندار دەرەۋ تەكسەرىستى باستاپ كەتتى. ماسەلەن، ساتپايەۆ كوشەسىندەگى بۇل ءدارىحانا يەسى تالايدان بەرى كەمباعالداردىڭ قۇقىعىن ەسەرمەي كەلىپتى. تەك بۇل ارەكەتى ءۇشىن قوماقتى ايىپپۇل ارقالايتىنىن ەستىگەن سوڭ، كاسىپكەر دەرەۋ پاندۋس ورناتا باستاپتى. الايدا، ونىڭ ءوزى تالاپقا ساي بولماي شىقتى.

«ءقازىر قالا بويىنشا كوپ نىسانداردا پاندۋستاردى كورىپ جاتامىز، ءبىراق ولاردىڭ بارلىقتارى نورماتيۆتەرگە ساي كەلمەيدى. مىسالى، مىنا پاندۋستى الساڭىز، مۇگەدەك جاندارعا ىڭعايسىز. پاندۋستىڭ ەنى 1-دە 20 سم بولۋ كەرەك. تۇتقالار بولۋ كەرەك ەكى شەتىنەن. مۇگەدەك جاندار ەش قيىندىقسىز كوتەرىلۋىنە جانە تۇسۋىنە»، - دەدى ەڭبەك، الەۋمەتتىك قورعاۋ جانە كوشى-قون كوميتەتىنىڭ الماتى قالاسى بويىنشا دەپارتامەنتىنىڭ باس مامانى نۇرلان يۋليمبەتوۆ.

تەكسەرۋشىلەر باس سۇققان كەلەسى عيمارات تا مۇمكىندىگى شەكتەۋلى جاندارعا يكەمدەلمەگەن. ءتىس ەمدەۋ مەكەمەسىنىڭ يەسى مۇندا كەمباعال جانداردىڭ مۇلدەم كەلمەيتىنىن ايتتى. ال قاجەتتىلىك تۋىنداسا، مۇگەدەكتەرگە قىزمەتتى ۇيىنە بارىپ كورسەتۋگە دايىن ەكەندىكتەرىن جەتكىزدى.

«ءبىز مۇگەدەكتەرگە جاعداي جاساۋعا قارسى ەمەسپىز. تەك ساۋلەت باسقارماسىنان مەكەمەمىزدى كەڭەيتۋگە رۇقسات الىپ بەرسەڭىزدەر. مىنا ءۇي ەسكى، 70ء-شى جىلدارى تۇرعىزىلعان. ەسىكتەرىمىز دە تار، مۇگەدەكتەردىڭ ارباسى سىيمايدى. ال عيماراتتى قايتا جاساقتاۋ ءۇشىن بارلىعىنا قوماقتى اقشا جۇمساۋ قاجەت بولادى»، - دەدى ءتىس ەمحاناسىنىڭ قوجايىنى گاۋحار باجانوۆا.

مامانداردىڭ سوزىنشە، الماتىداعى وسىنداي 3 مىڭ نىساننىڭ تەك  جارتىسىندا عانا مۇگەدەكتەرگە جاعداي جاسالعان ەكەن. ال قالعانى تالاپقا مۇلدەم ساي ەمەس. كاسىپكەرلەر نىسانداردى اربامەن جابدىقتاۋ بىلاي تۇرسىن، قاراپايىم پاندۋس ورناتۋدىڭ ءوزىن ۇلكەن شىعىن سانايدى ەكەن. ءبىر پاندۋس ورناتۋ ءۇشىن شامامەن 100 مىڭ تەڭگە كەتسە، ارنايى كوتەرگىشى بار ليفت ورناتۋ 500 مىڭ تەڭگەگە دەيىن باراتىن كورىنەدى.

«كوبىسى بىلمەگەندىگىن ايتىپ جاتادى، ستاندارتتىڭ بىلمەگەندىگىن ايتىپ جاتادى. كەيبىرەۋى قاراجات جوق دەپ ءتۇسىندىرىپ جاتادى. كورسەتىلگەن كەمشىلىكتەردى جويۋ ءۇشىن ءبىز ەسكەرتۋ قالدىرامىز. سول ەسكەرتۋدىڭ ۋاقىتى كورسەتىلەدى. سول ۋاقىتتىڭ ىشىندە تولىعىمەن جويىلماعان جاعدايدا ايىپپۇل سالىنادى. ايىپپۇل وندىرىلمەگەن جاعدايدا، ءبىزدىڭ دەپارتامەنتپەن سوتقا بەرىلىپ، سوت ارقىلى ءوندىرىس جاسايمىز»، - دەدى ەڭبەك، الەۋمەتتىك قورعاۋ جانە كوشى-قون كوميتەتىنىڭ الماتى قالاسى بويىنشا دەپارتامەنتىنىڭ ءبولىم باسشىسى رۋسلان ىسقاقوۆ.

وتكەن جىلى قالادا شاعىم بويىنشا 44 نىسان تەكسەرىلىپ، مۇمكىندىگى شەكتەۋلى جانداردىڭ قۇقىعىن تابان استى ەتكەن كاسىپكەرلەرگە 3 ميلليون تەڭگەدەن استام ايىپپۇل سالىندى. ال بيىلعى جىل باسىنان بەرى 16 نىسان يەسى 300 مىڭ تەڭگەدەن استام ايىپپۇل ارقالاعان. ايتا كەتسەك، مۇگەدەكتەرگە جاعداي جاساماعان شاعىن كاسىپكەرلىك سۋبەكتىسىنە 120، ورتا بيزنەس وكىلدەرىنە 200 جانە ءىرى كاسىپ يەلەرىنە 400 ايلىق ەسەپتىك كورسەتكىش كولەمىندە ايىپپۇل جازىلادى. ولقىلىقتىڭ ورنى بەلگىلەنگەن مەرزىمدە تۇزەلمەسە، ايىپپۇل كولەمى ارتا بەرەدى.