قازاقستان رەسپۋبليكاسى پرەمەر-مينيسترى باقىتجان ساعىنتايەۆ جۇمىس ساپارىمەن جەزقازعان وڭىرىنە باردى، دەپ حابارلايدى Qamshy.kz اقپارات اگەنتتىگى پرەمەر-مينيستردىڭ باسپا ءسوز قىزمەتىنە سىلتەمە جاساپ.

ساپارىن قاراعاندى وبلىسى ساتبايەۆ قالاسىنان باستاعان ۇكىمەت باسشىسى قالادا جاڭادان سالىنىپ جاتقان «نۇرلى مەكەن» ىقشام اۋدانىندا بولدى. «نۇرلى مەكەن» شاعىن اۋدانىنا جەزقازعان قالاسىنىڭ اپاتتى ۇيلەرىنىڭ تۇرعىندارى جانە مىس كەن ورىندارىن قايتا وڭدەۋ كەزىندە قۇلاعان اۋدان ايماعىنداعى كورشى ەلدى مەكەن ادامدارى كوشىرىلەدى. ولار جەزقازعان، ساتبايەۆ جانە ۇلىتاۋ وڭىرلەرىن الەۋمەتتىك-ەكونوميكالىق دامىتۋدىڭ 2012–2020 جىلدارعا ارنالعان كەشەندى جوسپارى اياسىندا جاڭا پاتەرلەرگە يە بولادى.

سونىمەن قوسا، ب. ساعىنتايەۆ ساتبايەۆ قالاسىنداعى «حانۋم» ماكارون ونىمدەرىن شىعاراتىن كاسىپورىندى ارالاۋ بارىسىندا وڭىردە شوب دامىتۋ قارقىنىمەن، سونداي-اق ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىن ىسكە اسىرۋ بارىسىمەن تانىستى.

ارتىنشا ات باسىن جەزقازعانعا بۇرعان ۇكىمەت باسشىسى «كاzakhmysSmelting» ج ش س جەزقازعان مىس قورىتۋ زاۋىتىندا بولدى، وندا ەكىنشى كەن قىزدىرۋ پەشىن رەكونسترۋكسيالاۋ بارىسىمەن تانىستى.

باقىتجان ساعىنتايەۆ نىساندا كاتودتى مىس ءوندىرىسىنىڭ تەحنولوگيالىق ۇدەرىسىن، اينالمالى قۇيۋ ماشيناسى مەن انودتى مىس قۇيۋ جۇمىسىن تەكسەردى. جەزقازعان مىس قورىتۋ زاۋىتى ىسكە قوسىلعان كەزدەن بەرى جەر قويناۋىنان 1 ملرد توننادان استام كەن ءوندىرىلدى. 2018 جىلدىڭ قاڭتار-ناۋرىز ايلارىندا 30،7 مىڭ توننا تازارتىلعان مىس ءوندىرىلدى.

كاسىپورىننىڭ باس ديرەكتورى ءا. بارمەنقۇلوۆ دايىن ونىمدەر قويماسىن كورسەتىپ، جەزقازعان مىس قورىتۋ زاۋىتىن تەحنولوگيالىق جاڭعىرتۋ جوسپارلارىمەن تانىستىردى.

جەزقازعان مىس قورىتۋ زاۋىتىنىڭ قۋاتتىلىعى جاڭا كۇكىرت قىشقىلدى سەح قۇرىلىسى اياقتالعان سوڭ، ەكى كەن قىزدىرۋ بالقىتۋ پەشتەرىنىڭ (كقپ) جۇمىسى ەسەبىنەن ۇلعايتىلادى. ەستەرىڭىزگە سالا كەتەيىك، بۇعان دەيىن 2009 جىلى قولجەتىمدى شيكىزات كولەمىنىڭ ازايۋىنا بايلانىستى زاۋىت ءبىر كقپ جۇمىس رەجيمىنە كوشىپ، ەكىنشى بالقىتۋ اگرەگاتىنىڭ جۇمىسى توقتاتىلعان ەدى. اقتوعاي جانە بوزشاكول كەن بايىتۋ فابريكالارىنىڭ جوسپارلى ىسكە قوسىلۋى اياسىندا قۇرامىندا مىس بار شيكىزات كولەمىنىڭ ۇلعايۋىنا بايلانىستى ەكىنشى كقپ ىسكە قوسۋ تۋرالى شەشىم قابىلداندى.

ءا. بارمەنقۇلوۆتىڭ ايتۋىنشا، زاۋىت ءوز قۋاتتىلىعىن جارتىلاي پايدالانىپ جۇمىس ىستەۋ ارقىلى جىلىنا 100 مىڭ توننا مىس وندىرگەن. ەكىنشى پەشتىڭ ىسكە قوسىلۋىمەن ءونىم كولەمى ەكى ەسەگە ارتادى. بۇل مىس ءوندىرىسىنىڭ الەمدىك نارىعىنداعى كومپانيانىڭ باسەكەگە قابىلەتتىلىگىن ۇلعايتۋعا جول اشادى. 600-گە جۋىق ادام تۇراقتى جۇمىسپەن قامتاماسىز ەتىلەدى. مەملەكەتتىك بيۋدجەتكە سالىناتىن اۋدارىمدار جۇزدەگەن ميلليون تەڭگەگە وسەدى.

جەزقازعانعا ساپارى بارىسىندا ب. ساعىنتايەۆ «بايان» كومپانياسى مەن «قازاقمىس» كورپوراسياسىنىڭ مەديسينالىق ورتالىعىندا دا بولىپ، جۇمىس بارىسىمەن تانىستى.